НЬУРБА УЛУУҺУГАР БАҺААРЫ УТАРЫ УРАТЫ ЭРЭСИИМ ОЛОХТОННО

Бу сайын Ньурба улууһугар номнуо ойуур баһаардара элбээбиттэринэн сибээстээн улуус баһылыгын ыам ыйын 26 күнүнээҕи 794 №-дээх дьаһалынан ити күнтэн улуус сиригэр-уотугар баһаары утары ураты эрэсиим олохтонно.

Ойуур-хаһаайыстыбаннай үлэлэри толорорго туһаныллар, итиэннэ ойуур баһаардарын сэрэтиигэ уонна умуруорууга үлэлиир тиэхиньикэлэртэн ураты, тыаҕа-ойуурга тырааныспар тахсыыта бобулунна. Маны сэргэ дьон ойуурга күүлэйдии-сынньана тахсара, ойуурга, нэһилиэнньэлээх пууннарга уонна таһынааҕы сирдэргэ кутааны оттуу, сэтиэнэҕи, мутугу уматыы эмиэ бобулунна. Муниципальнай тэриллиилэр баһылыктарыгар, Ньурбатааҕы лесничествоҕа уонна туһааннаах сулууспаларга ойуур баһаардарын сэрэтиигэ, баһаардары умуруорууга бэлэмнээх буолууга, нэһилиэнньэ ортотугар өйдөтүүлээх үлэни ыытарга уо.д.а. дьаһаллары ылыналларыгар сорудахтанна.

Ньурба улууһун сиригэр-уотугар билиҥҥитэ баһаар суох. Ньурбачаан нэһилиэгэр Чырааба диэн сиргэ ойуур баһаара ыам ыйын 26 күнүн киэһэтигэр “Авиалесохрана” отделениетын үлэһиттэрин уонна нэһилиэк көҥүл өттүнэн баһаарынай хамаандатын күүстэринэн умуруоруллубута. Уот барбыт сирин иэнэ 6 гааҕа тэҥнэспитэ.

Бүгүн сарсыарда Түмүк нэһилиэгин Уолбут диэн сирин баһаарын нэһилиэк олохтоохторо, көҥүл өттүнэн нэһилиэк баһаарынай хамаандата, “Якутлесресурс” ГАУ Ньурбатааҕы филиалын үлэһиттэрэ умуруордулар.

Ньурбатааҕы техникум бульдозера, “ОДьКХ” ГУП филиалын уонна олохтоох дьаһалта тыраахтардара тардыллан үлэлээтилэр.

Инньэ гынан улууска бу кылгас кэмҥэ турбут 5 ойуур баһаара дьон биир санаанан түмсүүлээх үлэтин түмүгэр түргэнник умуруорулуннулар. 20 гааны сиэбит Уолбут баһаарын саба баттыырга халлааммыт даҕаны самыырдаан уонна хаардаан көмөлөстө.

***

Ааптар: Геннадий АНТОНОВ