Бу сайын ааһан иһэн, киэҥ-куоҥ уһаайбаҕа саҥа тутуу баран эрэрин көрөммүн, туораан кэпсэтэн аастым. Герман төрөппүттэрэ Ангелина уонна Евгений Бережновтар 1993 с. саҥа ыал буоланнар, бу учаастакка улахан дьиэ-уот туттан, эдэр ыал дьон сиэринэн оҕо-уруу төрөтөн, үлэлээн-хамсаан барбыттара. Урукку сылларга ити түөлбэҕэ сааскы халаан уута кэлэн, олохсуйан хаалан, хойукка диэри турара. Элбэх ыал эрэйи көрөрө. Бережновтар хас эмэ сыл устата уу ортотугар олоро сатаан баран, учаастак ыланнар дьиэлэрин үөһэ көһөрбүттэрэ. Кэлин анал ханааба оҥоһуллан, уу барыыта хонтуруолланар буолбута.
Ангелиналаах Евгений үс оҕо күн күбэй ийэтин, амарах аҕатын быһыытынан улууспут биир сис ыала буолаллар. Ангелина Семен Данилов аатынан оскуола информатика учуутала, Евгений 106 №-дээх баһаарынай чаас туйгун үлэһитэ. Үлэлиэхтэрин тухары биир идэҕэ бэриниилээхтик сылдьаллар. «Сыл-хонук барара чыычаах түннүгүнэн элэс гынан ааһарын кэриэтэ» диэн мээнэҕэ эппэттэр. Оҕолор номнуо улаатан, кыыстара Людмила Монголияҕа омук тылын учууталанан үлэлиир. Уоллара Петя Дьокуускайга баһаарынай чаас байыаһа.
Оттон биһиги бүгүҥҥү сэһэргэһээччибит кыра уол Герман туһунан барыаҕа. Кини ааспыт сылтан перепелка иитиитин сэҥээрэн, төрөппүттэрин өйөбүлүнэн Саха сиригэр сэдэх көтөрдөрү ылаттаабыта. Бастаан 10 чоппуусканы иитэргэ холоммута. Оттон улам сыстан, элбэтэн 140 устуукаҕа тириэртэ. Көтөрдөрө ситэн, күн ахсын сымыыттыыр буолбуттар. Перепелка сымыыта төһө да кээмэйинэн киһи мыыннар куурусса, кус гиэнинээҕэр киһи доруобуйатыгар туһата хас эмэ төгүл эбит. Үгүс ыарыыны сымнатарын туһунан кэпсэнэр. Бэрдьигэстээх маҕаһыыннарыттан олохтоохтор ирэ-хоро ылаллар. 20 устуука сымыыт сыаната 200 солк кэриҥэ.
– Манна перепелка үс араас көрүҥэ баар. Нэдиэлэҕэ үстэ-түөртэ аһатабын. Өйдөөх ферма быһыытынан былааннаммыт буолан, уута-хаара, аһа-үөлэ бэйэтэ түһүөхтээх. Барытын бырагыраамалаан биэрэбин. Дьиэбит тас өттүгэр видеокамера холбонон турар. Сымыыттарын көрөммүн инкубаторга таһаарабын. Чоппуускалар тахсааттарын кытары хайа баҕарар көтөр курдук көрүүгэ-истиигэ наадыйаллар. Улааппыттарын да кэнниттэн син бүөбэйдэһэҕин. Холобур, тумсуларын игин көрө сылдьыахтааххын. Уһаан хаалар. Аһаабат буолан хаалаллар. Көрөн быһан биэрэҕин. Наһаа хамсаналлар. Бэйэ-бэйэлэрин бааһырдаллар. Ону эмтээн биэрэбин.
Билигин ити кыһыҥҥы саҥа теплица тута сылдьабыт. Оҕуруот аһын үүннэрэн көрүөхпүт. Перепелкаттан ураты коза тутабыт. Кус оҕолорун иитэн көрүөм. Бу маннык ферма тутарбытыгар гаас ситимэ кэлиитэ биир улахан тирэх буоллбута. Кыһыннары мэлдьи сылаас, көтөрдөрбүт биир температураҕа туралларын хааччыйарга олус табыгастаах. Төрөппүттэрим, эбэм, эһэм саҕалааһыммын күүскэ өйүүллэр. Кинилэр көмөлөспөттөрө буоллар туох да кыаллыа суоҕа этэ. Ол иһин махталым улахан, – диэн Герман санаатын үллэстэр.
Эдэр фермер хаһаайыстыбатыттан ураты спорду өрө тутар. Национальнай многоборьенан утумнаахтык дьарыктанар. Сүрүн болҕомтотун үөрэҕэр уурар. Билиҥҥи олох хаамыытынан компьютернай бырагыраамалары оҥоруунан үлүһүйэр. Бүтүн Россиятааҕы куоҥкурустарга ситиһиилээхтик кыттар. Уолбут ити үлэтин быыһыгар оһуокайдаан, тойуктаан эмиэ ылар. Саха омугун төрүт култууратын өрө тутан, умсугуйан үөрэтэр.
***
Вячеслав Алексеев
Оставить комментарий