Сунтаар улууһун баһылыга Анатолий Григорьев уонна улуустааҕы аҕалар сүбэлэрэ уол оҕону төрүт үгэскэ уһуйаллар

Сунтаар улууһун баһылыга Анатолий Григорьев уонна улуустааҕы аҕалар сүбэлэрин бырайыактарынан уол оҕону төрүт үгэскэ уһуйуу быыстала суох барар. Ол курдук, баай барыылаах сэтинньи ыйыгар ааспыт сырыыга оҕолор Маар Күөлгэ муҥхаҕа сылдьыбыт буоллахтарына бүгүн Тэҥкэҕэ идэһэни бэлэмнээһиҥҥэ кэллилэр.

Бастаан утаа саха сиэринэн алгыс баһын сыалаан, сири-уоту аһатан тэрээһин саҕаланна.

21 оҕо уонна тэрийээччилэр Тэҥкэ нэһилиэгэр икки убаһаны астаатылар. Маннык идэһэ бырааһынньыгар оҕолор төрүт үгэс быраабылатын, ньыматын, ымпыгын-чымпыгын барытын биллилэр.

Сибиэһэй салгыҥҥа үлэни үмүрүтэн күрэс түһүлгэтин тэрийдилэр, оллооҥҥо буспут эт миинин сырылаччы истилэр. Ытыыга уонна хапсаҕайга миэстэлэспит оҕолор убаһа быарынан, ойоҕос этинэн наҕараадаланнылар.

Маны тэҥэ, астаабыт эттэрин дьиэлэригэр илдьэ бардылар. Онон илии тутуурдаах, өттүк харалаах бэртээхэй күн буолла. 

***
Сунтаар улууhун пресс-сулууспата