Сахалыы эйгэни тэрийэр Анатолий БУРНАШОВ оскуолалара

Киһилии сыһыаҥҥа үөрэтэр, саха эйгэтин тэрийэр элбэх оҕолоох ыаллар – Бурнашовтар.

Биллиилээх ырыаһыт Анатолий Бурнашов кэргэнинээн сахалыы оскуола тэрийэн үлэлэппитэ хаһыс да сыла. Улахан рекламата суох, аргыый наллаан уостан уоска тиһиллэн бу оскуола туһунан бэрт истиҥ кэпсэтии тарҕанар.

Оскуолаларын аата “Сахат” – уол оҕо уонна “Аламай” – кыыс оҕо  оскуолалара. Быйыл 1-9 кылаас үөрэнээччилэрин  2024/25 үөрэх дьылыгар ыҥырбыттар. Оскуола уопсай үөрэхтээһин ФГОС ирдэбилинэн “Школы России” программанан үлэлиир эбит.

Биллэрииттэн көрдөххө уонна төрөппүттэр кэпсэтэллэриттэн биллэххэ  “Сахатка” уонна “Аламайга”:

– оҕоҕо тус сыһыан (индивидуальный подход) олохтонор, кини майгытын-сигилитин, кута-сүрэ туохха тардыһарын, туох кыһалҕалары көрсөрүн, күүстээх өрүттэрин кэтээн көрөн, онно сөптөөх сыһыан, усулуобуйа тэриллэн, оҕо арыллан, ис-иһиттэн үөрэххэ, оскуолаҕа, дьарыктарга үөрэ-көтө кэлэрин ситиһэллэр. 

– улаатан эрэр уолаттары, кыргыттары айыл5аны кытары ситимнэрин күүһүрдэн, күһүн-саас элбэхтик сатыы поход, тур-слеттар ыыталлар. Үөрэх дьылын улахан аҥарыгар хайаан да таһырдьа сынньалаҥ тэрийэн оҕолору чэбдигирэллэр.

– үлэнэн иитиини өрө туталлар: оҕо кыра эрдэҕиттэн хара үлэни ытыктыы, таптыы, толоро үөрэнэр. Илиинэн үлэоиир оҕо толкуйа уһуктар.  Тулуурдаах, дьулуурдаах, кыайыгас-хотугас буола улаатар, кыраттан толлон турбат майгыланар. Оскуоланан саас хортуоска ыһаллар, күһүн хомуйаллар. Оскуола иһигэр сууйуу-сотуу, бэйэ олорон үөрэнэр миэстэтин бэрээдэктээһин курдук үлэлэри бары күргүөмүнэн үмүрүтэллэр.

Бу оскуолалар ордук чуолаан куоракка олорор түргэн тэтимнээх, үлэ түбүгэр сылдьар, бириэмэтэ, солото суох төрөппүттэргэ олус табыгастаах эбит. Оҕону сарсыарда аҕалаҕын уонна киэһэ 18.00 чааска биирдэ ылаҕын. Оҕоҥ күнү быһа дьарыктаах: күн ортотугар диэри үөрэнэр, эбиэт кэннэ эбии дьарыктар, куруһуоктар, сиэксийэлэр бааллар. Күҥҥэ үстэ аһаталлар. Нэдиэлэҕэ биирдэ оскуоланан тэриллэн бэйэлэрэ бассейҥҥа, кинотеатрга сылдьаллар.

Бэл парикмахер кэлэн уолаттары баттахтарын кырыйан барар эбит.

Дьэ, саамай төрөппүккэ уустук дьарык – оҕону уруок аахтарыы. Ньиэрбэ-тирии баранар. Оттон бу оскуолаларга дьиэҕэ үлэни оскуолаҕа учууталы кытта оҥороллор эбит.

“Оҕо дьиэтигэр төрөппүттэрин, бииргэ төрөөбүттэрин кытта бодоруһар, истиҥник кэпсэтэр бириэмэлээх буолуохтаах”, – диэн санаалаахтар эбит.

Туох баар канцтовардарынан, учебниктарынан, рабочай тэтэрээттэринэн, рюкзагынан, школьнай форманан оскуола бэйэтэ хааччыйар. Ону көрдүүргэ, буларга-таларга төрөппүт сыраласпат. 

Оскуола базата конюшнялаах, аттардаах, сахалыы балаҕаннаах, хортуоска сирдээх, кэтэх хаһаайыстыбаны өссө да кэҥэттэр былааннаах. 

Куруhуоктар, дьарыктар: каллиграфия, английскай тыл, кинигэ ааҕыы, хайыһар, масигра, ВИА уо.д.а.

Кылааска муҥутаан 20-25 оҕо буолар, учуутал болҕомтото оҕоҕо барытыгар тиийэр. Кылаас салайааччыта кэтээн көрөн, нэдиэлэ аайы төрөппүккэ иһитиннэрии оҥорор: туохха болҕомто уурар тоҕоостооҕун, оҕо ситиһиилэрин, үөрэх туһунан, туох сыал-сорук баарын.

Дьиэ кэргэн уонна оскуола икки ардыгар истиҥ сыһыан, биир ситим олохтонор. Төрөппүт мунньаҕа – үүттээх чэй иһэ-иһэ атах тэпсэн олорон сэһэргэһии.   Ити оҕо уйулҕатын харыстыыр, төрөппүккэ күүс-көмө буолар, кини түбүгүн чэпчэтэр сыалтан дииллэр.

Саас буолла да хайыһар, сайын-күһүн велосипед, Ньукуолун күнүгэр бары коллективынан айылҕаҕа хонуу, оскуола иһинэн спорт күрэхтэр быыстала суох буолаллар.

“Выпускной банкет” диэн тэрээһин оннугар оҕолор өйдөрүгэр-сүрэхтэригэр иҥэн хааллын диэн 4 кылааһы түмүктээбиттэр – тимир суолунан Алдаҥҥа хонуктаах походка, онтон улахан кылаас уолаттара – Россия ураты сирин-уотун билсэ айаҥҥа туруналлар эбит. 

– Үгэс буолбут календарнай бырааһынньыктартан Ийэ, Аҕа күннэригэр, Билии күнүгэр – улахан суолта биэрэн, болҕомто ууран оскуоланан киэҥник бэлиэтиибит. Маны таһынан эбээ, эһээ суолтата иитэр үлэҕэ өрө тутуллар, кинилэр оскуола олоҕор көхтөөх кытталлар, диэн биллэриигэ суруйбуттар.

Оскуола тэрийээччилэрэ, олохтооччулара – элбэх оҕолоох Бурнашевтар дьиэ кэргэн. Ким оҕотун истиҥ эйгэлээх сиргэ үөрэттэриэн баҕарар бу нүөмэргэ эрийэн билсиҥ:

+7 914 273 01 70

+7 924 868 10 09

Оскуолаҕа үөрэнии төлөбүрэ ыйга 35 000 солк. Онно туга барыта киирэ сылдьар: куруһуоктарыгар, сиэксийэлэригэр, форматыгар тиийэ. Күҥҥэ 3-4 аһыыллар.

“Өссө детсадтаахтар. Саха детсадыгар тиксибэтэхтэр оннук-маннык платнайга биэриэхтээҕэр, А.Бурнашов киэнигэр биэриэх этилэр”, – диэн дьон социальнай ситимҥэ кэпсэтэр.

***

Aartyk.Ru  

Сонун туһанныбыт @NinaG каналтан.