Оҕоҕо аналлаах «Тиэргэн пати» Ньурбаҕа арылынна

Манна үс батут, икки бассейн, улахан шар, пена-пати, катапультка ыстаҥалыырга аналлаах тэриллэр бааллар.

Егоровтар дьиэ кэргэннэрэ билиҥҥи оҕо дьиэҕэ үксүн олорорун, бириэмэлэрин гаджет иннигэр ыыталларынан сибээстээн, сайынын оҕолор хамсанан, оонньоон-көрүлээн атааралларын туһугар, оҕолорго дьоллоох оҕо сааһы бэлэхтээри эрдэттэн толкуйдаан, былааннаан оҕо сынньалаҥын  атаарар «Тиэргэн пати» астыбыттар. Бу сайын маҥнайгы аҥаара сөрүүн, сорох күн ардахтаах буоланнар бастаан арыйалларыгар мэһэйдэр үөскүү сылдьыбыттар.

Ыал эдэр ийэтэ Күөрэгэй Егорова ханнык чэпчэтиилэр баар буолуохтарын билиһиннэрдэ:

— Элбэх оҕолоох, маны таһынан, СВО-ҕа сылдьар дьиэ кэргэннэр оҕолоругар, доруобуйаларынан хааччахтаахтарга 10% чэпчэтии көрүллэр.

Маны таһынан  оҕолор төрөөбүт күннэрин атааралларыгар анал сирдээхпит. Төрөөбүт күннээх оҕо босхо киирэр, доҕотторун кытары кэллэҕинэ доҕотторо 10% чэпчэтиинэн туһаналлар. 10-тан тахса оҕо кэлэн төрөөбүт күннэрин атаарыыга икки чааска болдьостохторуна, үһүс чааһа  босхо буолар. Төрөөбүт күҥҥэ аналлаах киэргэтиилэрин бэйэлэрэ илдьэ кэлэллэр, —  диэн үлэ хаамыытын кылгастык кэпсээн аһарда.

— Биһиги дьиэ кэргэн бу иннинэ Ньурба дьоно эт-сиин өттүнэн чэбдигирэллэрин туһугар «Егофит» тренажернай саала аһан үлэлэтэ сылдьыбыппыт. Инникитин спортзал аһан үлэлэтии былааммытыгар эмиэ баар.

***
Антонина Семенова