Сунтаар улууһугар быйыл суол өрөмүөннээһинэ далааһыннаахтык барар

Улуус салалтата, уопсастыбаннас, тустаах уорганнар да өттүлэриттэн тутар тэрилтэлэри талыыга, суолу оҥоруу үлэ хаачыстыбатыгар кытаанах хонтуруол ыыталлар, ол иһин барбыт үлэ төлөнөрүгэр нэһилиэк баһылыктара эмиэ илии баттаһаллар.
Тутуу управленията «Крестях-Куокуну-Хордогой» суолларыгар өрөмүөннээһин үлэлэрин контрактнай сулууспа нөҥүө аукциоҥҥа таһаарбытын ООО «Эскалибур» тэрилтэ ылсыбыт. Тэрилтэ үлэни ыытан иһэн сөптөөх техниката суох буолан суол көннөрүүтэ кыаллыбатах. Илимниир, Бордоҥ уонна Хордогой нэһилиэктэрин баһылыктара үлэ хаачыстыбата эппиэттэспэт диэн туруорсуу киллэрбиттэрэ, онно тутуу управленията бу дьыаланы кыраҕатык кэтээн көрүөхпүт диэн, контрагы быһарга быһаарыныы ылбыта. Ол бырассыаһа Федеральнай антимонопольнай сулууспа (ФАС) хонтуруолун ааһан от ыйын 16 күнүттэн, бу ый 19 күнүгэр тиһэххэ тийдэ. Билигин суол өрөмүөнүгэр хоһуттан аукцион ыытыллара былааннанар.
Төгүрүк сыл устата улууска айан сырыыта быстыбат, ол иһин суол оҥоһуллара хас биирдии улууспут олохтоохторугар улахан суолталаах буолар. Манна дьоҕус тэрилтэлэртэн «Айан суол» уонна «Сунтаравтодор» хампаанньа бэйэлэрин ылбыт хайысхаларыгар төһө кыах баарынан сөптөөх үлэ ыытан суолу түргэнник уонна хаачыстыбалаахтык тутан, дьон туһатыгар таһаараллар.
***
“Сунтаар улууhа (оройуона)” муниципальнай оройуон дьаһалтатын пресс – сулууспата
Оставить комментарий