“Ростелеком” ПАО филиалын кытта сөбүлэһии түһэрсилиннэ

Ааспыт нэдиэлэҕэ Дьокуускайга “Ростелеком” ПАО филиала Сахателеком уонна Ньурба улууһун икки ардыгар Ньурба улууһун сиригэр-уотугар инвестиционнай бырайыактары олоххо киллэрии эйгэтигэр бииргэ үлэлээһин туһунан сөбүлэһии түһэрсилиннэ. Докумуону “Ростелеком” ПАО филиала Сахателеком дириэктэрэ К.Л.Войтеховскай уонна Ньурба улууһун баһылыга А.М.Иннокентьев илии баттаатылар.

Аны күһүн “оптоволоконнай сибээс” магистральнай линията Ньурбаҕа тардыллан кэлиэхтээх. Суол таһыгар сытар нэһилиэктэр бары холбоноллор. Ыраах нэһилиэктэргэ тиэрдии кыһалҕата турар. Саамай кытыы сытар нэһилиэктэрбитигэр “оптоволоконнай сибээһи” киллэрии былааҥҥа суох этэ. Ол иһин Маарынан, Чуукаарынан, Малдьаҕарынан, Маалыкайынан Хатыыга тиийэр, онтон Чуукаартан Хорулаҕа диэри барыллаан схема оҥоһуллан, улуус уонна Ростелеком кыттыһан тардыахтаахтар диэн сөбүлэһии бэлэмнэммитэ.

Улуус баһылыгын тутууга уонна ОДьКХ-ҕа солбуйааччыта И.С.Ефремов иһитиннэрэринэн, Ньурба улууһа ирээттэһэн үбүлэһэр түгэнигэр “Ростелеком” ПАО көмөлөһүөх буолла. Хатыыга, Хорулаҕа диэри, итиэннэ Араҥастаах, Чкалов диэн кыра дэриэбинэлэргэ эмиэ “оптоволокно” тардарга сөбүлэҥ түһэрсилиннэ. Сөбүлэһии болдьоҕо – 2021 с. бүтүөр диэри. Билигин ити сыаната чопчу биллэн турар, кыттыһан харчы көрүнэн 2 эбэтэр 3 сылга бүтэрэргэ былаанныыллар. Сөбүлэһии быһыытынан кытыы нэһилиэктэргэ тиийэр “оптовокно” магистральнай линиятын тардарга биһиги улууспут аҥардаһан ирээттэһэн үбүлэһиэхтээх.

Нэһилиэктэргэ тиийдэҕинэ “Ростелеком” бэйэтин суотугар оборудование туруоруохтаах уонна хас биирдии уулуссаҕа, хас биирдии дьиэҕэ тиийэр линиялары тутуохтаах. Инньэ гынан “Ростелеком” син-биир үлэ үгүс өттүн бэйэтэ уйунар. Бу өрөспүүбүлүкэ үрдүнэн бастакы маннык сөбүлэһии буолар. Биир да атын улуустар маннык докумуону “Ростелеком” филиалын кытта илии баттаһа иликтэр.

***

Ньурба улууһун дьаһалтатын пресс-сулууспата