“НОВАЙ СОПХУОС” АУо БҮГҮҤҤҮ КҮҤҤЭ

Мииринэй оройуонугар тыа хаһаайыстыбатын бородууксуйатын сүрүннээн «Новай Сопхуос» АУо оҥорор. Бу тэрилтэ  үүт хайысхатынан, сымыыттыыр куурусса иитиитинэн дьарыктанар нэһилиэнньэни аһынан-үөлүнэн хааччыйыыга сүрүн миэстэни ылар оройуон социальнай-экэнэмиичэскэй сайдыытыгар улахан суолталаах тэрилтэ буолар.

Быйылгы кыстыкка хаһаайыстыба тэрээһиннээхтик киирэн үлэлии сылдьар. Бу сыл тоҕус ыйынааҕы чахчыларынан тэрилтэҕэ 482 төбө ынах баар. Ол иһиттэн ыанара 245 төбө. Тоҕус ый түмүгүнэн 707 тн үүт ыаммыт. Сыллааҕы былаан 1100 тн. Бу былаан туолуо диэн хаһаайыстыба үлэһиттэрэ бигэ эрэллээхтэр.

Хаһаайыстыба үүт хайысхатынан үлэлиирин быһыытынан манна хара эриэн боруода сүөһүнү аҕалан ииппиттэрэ хаһыс да сыла. Ол курдук билиҥҥи туругунан манна 179 төбө, ол иһиттэн ыанара 161 төбө турар. Бу боруода сүөһүттэн хас биирдии фуражнай ынаҕыттан 3400 киилэ үүт ыаммыт. Онтон сэммэнтээл боруода ынахтан 9 ый түмүгүнэн 1900 киилэ ыаммыт. Сыллааҕы былаан 2133 киилэ. Онон хаһаайыстыба үрдүнэн ортотунан биир ынахтан былаан быһыытынан 3875 киилэ үүтү ылыы соруга турар.

Этиллибитин курдук тэрилтэ дьарыгын биир хайысхата сымыыттыыр кууруссаны көрүү. Ол курдук хаһаайыстыбаҕа барыта 70581 куурусса баар. 9 ый түмүгүнэн барыта 11м075т устуука сымыыт ылыллыбыт. Сыллааҕы былаан быһыытынан 17м800т устуука сымыыт ылыллыахтаах. Итини тэҥэ тэрилтэ 13 тн куурусса этин оҥорон таһаарбыт.

Кэнники сылларга тэрилтэ атаҕар туруутугар элбэх үлэ ыытыллар. Ол курдук «Туймаада» Агрохолдинг АУо састаабыгар киирэрин быһыытынан тэрилтэҕэ аныгылыы сүөһү аһылыгын тарҕатар тиһик, саҥа оборудовнаие киириитигэр, техниканы саҥардыыга, сүөһү турар комплекстарын өрөмүөннээһин, сири чөлүгэр түһэрии уо.д.а. үлэни ыытыыга элбэх үлэ ыытылынна. Онон бу тэрилтэ сайдарыгар бары кыахтар бары бааллар.

***
Прокопий Хабаров