Юрий Николаев, Владимир Прокопьев, Георгий Балакшин Ньурба улууһугар үлэлээтилэр

Ил Түмэн Бэрэссэдээтэлин солбуйааччыта – бүддьүөккэ, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэт бэрэссэдээтэлэ Юрий Николаев, олохтоох салайыныыга сис кэмитиэт бэрэссэдээтэлэ Владимир Прокопьев, физкультураҕа уонна спортка сис кэмитиэт бэрэссэдээтэлэ Георгий Балакшин Ньурба улууһугар кэккэ мунньахтары ыыттылар.

Юрий Николаев өрөспүүбүлүкэ бүддьүөтүн туһунан дакылааты билиһиннэрдэ, үбү-харчыны көдьүүстээхтик туһаныы суолтатын уонна анал байыаннай операцияҕа сыһыаннаах билиҥҥи балаһыанньаҕа болҕомтолоох үлэ наадатын тоһоҕолоото. Улуус үп-харчы туруктаах буолуутун хааччыйыыга тэрилтэлэр салалталарын оруолугар ураты болҕомто уурулунна.

Владимир Прокопьев «СӨ олохтоох салайыныы туһунан» сокуон барылын таҥан оҥоруу хайдах баран иһэрин билиһиннэрдэ, бу сыл бүтүүтүгэр ылыллыыта былааннаммытын бэлиэтээтэ. Бу сокуон олохтоох былаас уорганнарын боломуочуйаларын чуолкайдаан, наадалаах нормативнай базаны бэлэмниэҕэ. Саҥа сокуон барыла олохтоохтор интэриэстэрин көмүскүүргэ туһуламмыт уларыйыылары кэлимник олоххо киллэриини көрөр.

Ону тэҥэ мунньахха улуус социальнай-экономическай сайдыытын, ол иһигэр олорор дьиэ усулуобуйата, нолуок дохуота, үөрэх кыһаларын өйөөһүн, инфраструктураны сайыннарыы боппуруостара эмиэ дьүүллэһиннилэр. Кыттааччылар ыйытыыларыгар киэҥ хоруйдары ыллылар. Мунньаҕы түмүктээн туран, Владимир Прокопьев мустубут дьоҥҥо махталын биллэрдэ уонна Убайаан орто оскуолатын эбии үөрэхтээһиҥҥэ учуутала Анна Павловаҕа Ил Түмэн наукаҕа уонна үөрэхтээһиҥҥэ сис кэмитиэтин грамотатын туттарда.

Салгыы Ньурба улууһугар Георгий Балакшин уонна Владимир Прокопьев Хатыы, Маалыкай, Быһыттаах, Чукаар уонна Өҥөлдьө олохтоохторун кытта көрүстүлэр. Бу оробуочай сырыылар сүрүн сыалларынан – СӨ олохтоох салайыныы туһунан сокуон саҥа барылын ырытыы буолла.

Олохтоохтор үөрэхтээһин систиэмэтин саҥа модельнай араспысаанньатын олоххо киллэриигэ сыһыаннаах каадыр боппуруостарыгар долгуйалларын биллэрдилэр. Үүт сыаната түһүүтүгэр уонна улахан промышленнай тэрилтэлэргэ айылҕа харыстабылын хонтуруолун күүһүрдэр наадатыгар эмиэ кыһалҕалар этилиннилэр.

Ити кэннэ дьокутааттар Дьиикимдэ, Сүлэ уонна Ньурбачаан олохтоохторун кытта көрсөн нэһилиэнньэни долгутар боппуруостары дьүүллэстилэр, ыйытыыларга хоруйдаатылар. Олохтоохтору үөрэх эйгэтигэр киирээри турар штаттары сарбыйыы боппуруостара долгуталлар, ону кытта үүт харчыта хаhан түhэрин туһунан ыйытыылар киирдилэр.

Күндээдэҕэ, Чаппандаҕа, Дьаархаҥҥа, Ынахсыкка, Маарга бу курдук ис хоһоонноох көрсүһүүлэр эмиэ ыытылыннылар. Олохтоохтор сүөһү субсидиятын кыччатыы уонна ас-үөл, уматык сыанатын хонтуруоллааһын туһунан боппуруостары туруордулар. «Сунтаар-Ньурба» үрдүк күүрүүлээх уот линиятын тутуутун түргэтэтэргэ уонна бэрээдэктиир уорганнар хонтуруолларын сымнатыыга туспа көрдөһүү киирдэ.

Оробуочай сырыылар Киров, Сайылык, Хатыҥ Сыһыы, Антоновка, Үөдэй сиригэр-уотугар салҕанан бардылар. Олохтоохтор олохтоох салайыныы саҥа сокуонугар сыһыаннаах кыһалҕалары эмиэ ыйдылар, каадырдары хааччыйыыга, тыа хаһаайыстыбатын боппуруостарыгар, сыана үрдээһинигэр уонна улахан тэрилтэлэргэ айылҕа харыстабылын кытаанахтык хонтуруоллуур наадатыгар болҕомтолорун уурдулар.

Ил Түмэн бэрэстэбиитэллэрэ ыытыллыбыт кэпсэтиигэ барытыгар көхтөөхтүк кыттан, олохтоохтор көрдөһүүлэригэр, кыһалҕаларыгар түргэнник хоруйдаан, наадалаах чуолкайдааһыннары биэрэн, туруоруллубут көҕүлээһиннэри көрүөхпүт диэн эрэннэрдилэр.

***

Ил Түмэн пресс-сулууспата