Александр Атласов I Хомустаахха А.Н. Окоемовка анаммыт өйдөбүнньүк бэлиэ арыллыытыгар кыттыынна

Ыам ыйын 23 күнүгэр СӨ Ил Түмэнин тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов  «Мичээр» үҥкүү народнай ансаамбылы төрүттээбит, СӨ култууратын үтүөлээх үлэһитэ, Нам улууһун Ытык киһитэ Александр Николаевич Окоемов төрөөбүтэ 65 сылынан кини сырдык аатын үйэтитэр, бэриниилээхтик үлэлээбит сиригэр «Алгыс» норуот айымньытын Киинин аартыгар өйдөбүнньүк стелла аһыллар бэлиэ түгэнигэр кытынна. 

I Хомустаахха  айылҕаттан айдарыылаах, сүдү талааннаах тэрийээччи А.Н. Окоемов кэлэн, нэһилиэк култуурата сайдыытыгар сүҥкэн кылааты киллэрэн күн бүгүн  нэһилиэк «Үҥкүүһүт нэһилиэгинэн» сураҕырар. Кини дьаныардаах үлэтин түмүгүнэн, икки улахан ааттаах-суоллаах үҥкүү кэлэктиибэ күн бүгүҥҥэ диэри көлүөнэттэн көлүөнэҕэ бэриллэн үлэлии сылдьаллара туоһу буолар.

Бэлиэ тэрээһини кини айан хаалларбыт «Намым сирэ» ырыатынан Александр Николаевич үөлээннээҕэ, доҕоро, СӨ култууратын туйгуна, Партизан нэһилиэгин «Хомус»  фольклор дьиэтин дириэктэрэ Семен Алексеев арыйда.

Өйдөбүнньүк стелланы арыйар тэрээһиҥҥэ кыттыыны ыллылар  – «I Хомустаах нэһилиэгэ»  түөлбэ баһылыга Василий Жирков,  СӨ Ил Түмэнин тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов,  «Нам улууһа» муниципальнай тэриллии  баһылыгын солбуйааччы Егор Протопопов,  РСФСР норуотун үөрэҕириитин туйгуна, Нам улууһун Ытык киһитэ  Галина Алексеева, бииргэ үөрэммит доҕоро, улуус баһылыгынан 2003-2008 сылларга үлэлээбит Дмитрий Корякин, «Нам улууһа» муниципальнай тэриллии култУураҕа уонна духуобунай сайдыыга Управлениетын начальнигын солбуйааччы Александра Новгородова, Аан дойду норуоттарын хомуһун киинин уонна түмэлин үлэһитэ Николай Жирков,  култуура эйгэтигэр  бииргэ үлэлэспит, алтыспыт  үөлээннэхтэрэ,  ансаамбыл бастакы выпускниктара, төрөппүттэр, оскуола кэмнэригэр бииргэ үөрэммит доҕотторо о.д.а. кыттыыны ыллылар.

Тэрээһиҥҥэ «Мичээри» мичээр дэппит, киэҥ сураҕырдыбыт ансаамбыл тумус туттар «Уһун суһуох» үҥкүүтүн  араас сыллардааҕы  выпускниктара уонна быйыл бүтэрэр оҕолор толордулар. Бэлиэ тэрээһин кыттыылаахтара Александр Николаевиһы истиҥник ахтан-санаан аастылар, үйэтитиигэ үлэлэспит дьоҥҥо махтал тылларын анаатылар.

***

«Алгыс» норуот айымньытын Киинэ