Отонунан эмтэнэбит. УУЛААХ ОТОН

Эмтэнэргэ анаан сэбирдэҕин уонна отонун туһаналлар. Саас эрдэ,хаар ууллуута эбэтэр ыкса күһүн хомуйар ордук. Оччоҕуна түргэнник уонна үчүгэйдик куурар. Сорохтор хараҥа сиргэ куурдар ордук диэн этэллэр. Хаппыт сэбирдэхтэртэн бөҕүн-сыыһын сирийэн көрөн ыраастаныллар. Отонун сибиэһэйдии сииллэр эбэтэр оргутан күүстээх ииктэтэр эмп быһыытынан туһаныллар. Ону таһынан куртах аһыытын көбүтэргэ,хаан баттааһынын намтатарга, тымныйыыга, ревматизмҥа, хойуу хаайтарыытыгар, хабах, бүөр, ыарыытыгар туттарга сүбэлиибит.

Отонун көөнньөрөн С уонна А битэмиин тиийбэтигэр, ыалдьан тоҥо- тоҥо тиритэр кэмҥэ туһаныахха сөп. Чэйгэ барыанньатын кутан иһэр ордук туһалаах.

Түүн иигин туппат буолбут оҕону эмтииргэ хатарыллыбыт отон сэбирдэҕин уонна отонун тэҥ кээмэйин булкуйан, икки улахан ньуосканы икки ыстакаан ууга кутан, 15 мүнүүтэ мөлтөх уокка сылытыллар. Сойутан, сиидэлээн, аҥаарын күн устата, ордугун киэһээ утуйуох иннинэ бэриллэр. Уҥуохтаах отон оннугар уулаах отон сэбирдэҕэ туттуллуон сөп. Сэбирдэҕинэн гипортониеҕа, цистиккэ, бүөр, быар, куртах ыарыытыгар, тымныйыыга эмтэниллэр. Онуоха 30г бытарытыллыбыт отон сэбирдэҕин 600 мл ууга 10 мүнүүтэ оргутан баран 1 чаас туруоран баран, сиидэлээн, ыстакаанынан күҥҥэ үстэ иһиллэр.

Сүһүөх-дьарҕа ыарыытыгар: икки кыра ньуоска бытарытыллыбыт отон сэбирдэҕин 1 ыстакаан ууга 15 мүнүүтэ мөлтөх уокка оргутан, сойутан, сиидэлээн нэдиэлэ устата иһиллэр. Аҕыйах күн сынньанан баран, эмиэ хатыланар.

***

Aartyk.ru