Александр Атласов Сайылык күнүнэн эҕэрдэтэ

Ил Түмэн тыа сиригэр уонна аграрнай бэлиитикэҕэ сис кэмитиэтин уонна тус бэйэм ааппыттан тыа сиригэр олорор, үлэлиир, тыа хаһаайыстыбатынан дьарыктанар дьоммутун бука барыларын Сайылык күнүнэн итиитик-истиҥник эҕэрдэлиибин!

Сайылыкка көһүү – саха киһитигэр тымныы кыһыны этэҥҥэ туораан, күөххэ үктэнэн, самаан сайын кэлбитин, өлгөм үүтү, үрүҥ аһы кытта дьүөрэлии суолталаах, өбүгэлэрбит ытык өйдөбүллэринэн Сахабыт сиригэр Саҥа сыл саҕаланар.

Айылҕаны кытта ыкса ситимнээх саха дьоно бу күн хайаан да айылҕаҕа сүгүрүйэллэрэ, алаадьы астаан сири-дойдуну аһатан арчылыыллара, уйгу-быйаҥ сайыны, сүөһү-сылгы этэҥҥэ сылы туоруурун Үрдүкү Айыылартан көрдөһөн сиэри-туому хайаан да тутуһаллара. Ньукуолун күнүгэр сүөһүлэрин-астарын илдьэ сайылыкка көһөн тахсыы, түптэ буруотун сыта, ынах маҥырааһына, оҕо аймах саҥата, кэҕэ этэн чоргуйара – бу барыта биһиэхэ ураты чугас, сайылыгы кытта ситимнээх олус дириҥ суолталаах өйдөбүллэр.

Ону учуоттаан, Ил Дархан Айсен Николаев саха төрүт үгэһин чөл тутар, салгыы сайыннарар, тыа хаһаайыстыбатын аһын-үөлүн дэлэтэр уонна тыа хаһаайыстыбатын үлэһитин суолтатын үрдэтэр туһуттан, 2018 сыл сэтинньи 6 күнүгэр таһаарбыт 150 №-дээх Ыйааҕынан хас сыл аайы, ыам ыйын 22 күнүгэр бэлиэтэр Сайылык күнүн олохтообута.

Дьэ итинтэн ыла Сайылык күнэ тыа хаһаайыстыбатын үлэһиттэригэр эрэ буолбакка, тыа сирин бары олохтоохторугар биир саамай кэрэхсэнэр-биһирэнэр, күүтүүлээх уонна Үлэ дьонун чиэстиир-бочуоттуур бырааһынньыкка кубулуйда.

Сайын — элбэх үүт ыанар, сүөһү төлөһүйэр уйгу-быйаҥ кэмэ. Бу көрдөрүү барыта сүөһүлэрбит киэҥҥэ-куоҥҥа, сайылыктарыгар, алаастарыгар, сыһыыларыгар, күөх мэччирэҥҥэ сырыттахтарына эрэ ситиһиллэр.

Күндү Саха сирин олохтоохторо, күндү дьоммут, үрүҥ аһы үрүлүтээччилэр, хороҕор муостааҕы дэлэтээччилэр, тыа сирин оҥкулун тутан олорооччулар! Үлэҕит-хамнаскыт ситиһиилээх буоллун, самаан сайыммыт үрдүк үүнүүнү, үтүө түмүктэри аҕаллын, өбүгэ үтүө үгэстэрэ сөргүтүллэ, сайылыктааһын сайда-тэнийэ турдун!

***
Александр Атласов, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ