Сунтаарга «Кыайыыга дылы 100 күн» бырайыак саҕаланна

Тохсунньу 29 күнүгэр, И.Г. Спиридонов аатын сүгэр Кириэстээх орто уопсай үөрэхтээһин оскуолатыгар Кыайыы 75 сылын көрсө «Кыайыыга дылы 100 күн» бырайыак саҕаланна.

Бу сыл биһиги улууска Үйэтитии уонна сүгүрүйүү сылыгар ыччаты дойдуга бэриниилээх буолууга иитии чэрчитинэн, Кириэстээх орто оскуолатын үөрэнээччилэрэ кыайыыны уһансыбыт эһээлэрин суолларынан Москва, Ленинград Герой куораттарынан, ону тэҥэ Ильмен күөлгэ тийэн сүгүрүйүү күнүн анаабыттара. Ону таһынан историческай музейдарга сылдьан араас архыып матырыйаалларын хомуйбуттара. Бу бырайыак эдэр учууталлар Мария Михайлова уонна Аэлита Спиридонова көҕүлээһиннэринэн саҕаламмыт, Улуу Кыайыы күнүн көрсө билигин бырайыакка улуус 32 оскуолата кыттыһар.

Наахара нэһилиэгиттэн сэриигэ барааччылары атаарсыбыт, Улуу Кыайыы күнүн улахан дьону кытта тэҥҥэ колхоз үлэтигэр үлэлии сыдьан көрсүбүт, оонньооботох оҕо саастаах, ол саҕанааҕы сэрии ыар сылларын тыыннаах туоһулара – Кириэстээх нэһилиэгин ытык-мааны тыыл бэтэрээннэрин оскуола үөрэнэччилэрин кытары долгутуулаах көрсүһүү күнэ буолла. Ытык кырдьаҕастар оҕолорго анаан оччотооҕу холкуостар суут-кураан дьылларга олорон ааспыт олохторун ахтан-санаан аастылар. Нэһилиэк ытык кырдьаҕаһа СӨ тыатын хаһаайыстыбатын үтүөлээх үлэһитэ, айылҕа харыстабылын туйгуна, «Хотугу Сулус» уордьан кавалера, тыыл бэтэрээнэ Михаил Коколов биһиги кэнчээри кэскиллэрбит ханна да сырыттаргыт төрөөбүт дойдугут, үөрэммит оскуолаҕыт аатын үрдүктүк тутан дойдугут туһугар бэриниилээх дьон буола улаатыҥ диэн алгыс тылларын анаата. Оҕолор ытыктабыл бэлиэтин тыыннаах сибэкки дьөрбөтүн хас биирдии бэтэрээҥҥэ туттардылар уонна хоһоон ааҕан, үҥкүүлээн көрдөрдүлэр.

Биир дойдулаахпыт, Климент Николаев төрөппүт аҕата сэриигэ сылдьан дьиэ-кэргэнигэр ыыппыт суруктарыгар олоҕуран «Буорах сыттаах суруктар» – диэн короткометражнай киинэ уһулла сылдьар. Киинэни устарга кинооператор быһыытынан эдэр психолог-учуутал Анатолий Афанасьев көҕүлээһининэн саҕаламмыт. Ыал аҕата сэриигэ барбыт күнүттэн саҕалаан, дьиҥ олоххо буолбуту оскуола үөрэнээччилэринээн, колхоз олоҕун-үлэтин, тыыл бэтэрээннэрин кыттыһыннаран саҕаламмыт. Киинэ бастакы көрдүрүүтүн нэһилиэк күнүгэр көрдөрөр былааннаахтар.

Үөрүүлээх тэрээһиҥҥэ улуус Аҕа баһылыгын экономическай сайдыыга уонна стратегическай былааннааһыҥҥа солбуйааччы Борис Васильев, улуус бэтэрээннэрин Сэбиэтин бэрэссэдээтэлэ Афанасий Васильев, үөрэх управлениятын салайааччыта Альберт Иванов, ыччат бэлиитикэтин салаатын салайааччыта Евгений Данилов,  улуустааҕы военкомат комиссара Игорь Данилов уонна бырайыагы өйөөбүт оскуолалар учууталлара кыттыыны ыллылар.