— Юлия, хаһыат ааҕааччыларыгар кимтэн кииннээххин, хантан хааннааххын билиhиннэриэҥ дуо?
— Ырыа эйгэтигэр ким сирдээн киллэрбитэй?
— Кыра эрдэхпиттэн музыканы наhаа таптыырым, сөбүлүүрүм. Дьиэбэр күн аайы, күнү быhа наар ыллаан тахсар этим. Ону ийэм таба өйдөөн көрөн “Ийэ баар буолан” ырыаны үөрэппитэ. Ол ырыаны баяҥҥа Петр Петрович Колодезниковка доҕуhуоллатан күрэххэ кытыннарбыта. Биирдэ саас олохтоох кулуупка ийэҕэ аналлаах ырыа күрэҕэр кыттыбытым. Онно музыкальнай оскуола учуутала Мария Николаевна Комиссарова таба көрөн, миигин ыҥыран ырыаҕа үөрэппитэ. Музыкальнай оскуолаҕа өссө эбии Вера Романовна Гоголева салайбыт фольклор кылааhыгар үөрэммитим.
— Инники идэҕин хайдах талбыккыный?
— Мэҥэ Алдан орто оскуолатын ситиhиилээхтик бүтэрэн, Саха государственнай университетын саха филологиятын уонна култууратын факультетын культурология салаатыгар туттарсан киирбитим. Саха сирин уонна Арассыыйа народнай артыыhа Юрий Платонов салайар республикатааҕы эстрада искусствотын айар мастерскойугар дьарыктаммытым. Специализациям “эстраднай вокал”. Музыкальнай грамотаҕа, ырыаҕа, сценическэй култу ураҕа олус талааннаах, бэриниилээх преподавателлэргэ уhуйуллубуппут. Студенныы сылдьан Эстрада театрыгар солиhынан үлэлии киирбитим.
— “Туймаада” государственнай ансаамбылыгар хаhыс сылгын үлэлиигиний?
— Биир күн дьүөгэбин “Туймаада” ансаамбыл кастиныгар ыҥырбыттарыгар, миигин барыс диэн хаайда. Боруобаланан көр диэбитигэр ырыаҕа тургутууну ааспытым. Тиhэҕэр дьүөгэбин ылбатахтара, миигин үлэҕэ ыллылар. Ансаамбылга бэhис сылбын үлэлиибин. “Второй альт” диэн куоласка ыллыыбын. Ансаамбыл олус киэҥ репертуардаах. Хас биирдии бэлиэ күннэргэ, улахан тэрээhиннэргэ, бырааhынньыктарга аналлаах нууччалыы, сахалыы, араас омуктуу толорор ырыалардаахпыт. Салайааччыбыт Светлана Павловна Иванова олох чараас дууhалаах музыкант. Бастакы сылбар ыарахаттардааҕа, сүүсчэкэ ырыа партиятын үөрэппитим.
— Былырыын Казахстаҥҥа стажировканы хайдах барбытыҥ туhунан кэпсиэҥ дуо?
— Былырыын атырдьах ыйыгар Казахстаҥҥа биир идэлээхпин, тенор куоластаах Антон Абрамовы кытта Марат Айтимовка стажировканы ааспыппыт. Кини Казахстан култууратын үтүөлээх деятелэ, аан дойдуга биллэр элбэх опернай артыыстары уонна Димаш курдук ырыаhыттары таhаарбыт учуутал буолар. Марат Олжабаевич А. К. Жубанов аатынан Актюбинскайдааҕы музыкальнай колледжка үөрэтэр. Ону таhынан уобаластааҕы филармонияҕа солиhынан үлэлиир. Биhигини академическай вокалга дьарыктаабыта. Казахтар олус ырыаhыт норуот буолалларын илэ харахпынан көрөн cөҕөн кэлбитим. Сахалары олус сөбүлүүллэр. Тылбыт да маарыннаhарыттан бырааттарбыт, балтыларбыт дииллэр. Биhигини музыкальнай норуот диэн ааттыыллар. Уолбун Мишаны Казахстаҥҥа илдьэ барбытым. Стажировкаланан бүтэн баран музыкальнай колледжка кэнсиэр көрдөрбүппүт. Аны үөрэнэн кэлэн бараммыт, “Туймаада” концертнай саалатыгар сольнай бырайыак оҥорон кэнсиэрдээбиппит. Залга дьон толору кэлэн баппатахтара. Олус соhуйбуппут. Көрөөччүлэрбит истиҥник көрсүбүттэрэ, кэнсиэрбит ситиhиилээхтик ааспыта. Ити программабытынан дьоммутугар Чурапчынан, Томпонон гастрольга барар былааннаахпыт.
— Ханнык ырыалары толороргун сөбүлүүгүнүй?
— Мин эмоцияны күүскэ биэрэр таптал, ахтылҕан, олох туhунан ырыалары толорорбун ордоробун. Ол курдук, Валерий Ноев, Аркадий Алексеев, онтон атын Саха сирин мелодистара суруйбут ырыалара чугастар. Учууталбыт Светлана Павловна толорор ырыабытын киэргэтэн, тупсаран биэрэр. Ону таhынан ыллыыргар хайдах толороргун, туттаргын-хаптаргын, ырыаҕа хайдах сыhыаннаhаргын ыйан-кэрдэн сүбэлиир. Кини миигин ырыаҕа элбэххэ үөрэппитигэр махтанабын.
— Ырыаhыт буоларга киhиттэн ханнык хаачыстыба ирдэнэрий?
— Мин санаабар, харизмалаах, аhаҕас, элэккэй, эмоциональнай, коммуникабельнай дьон үчүгэй артыыс буолаллар. Ырыаны дьон-сэргэ тиэрдэргэ өйгүн-санааҕын, дууhаҕын ууран туран үлэлиир ирдэнэр. Онон хас биирдии идэҕэ үлэтигэр бэриниилээх киhи элбэҕи ситиhэр.
— Юлия, айар үлэҕэр үрдүк ситиhиилэри, көрөөччүлэргин кэрэ куоласкынан үөрдэ-көтүтэ сылдьаргар баҕарабыт!
***
Лена Слепцова, Томпонский Вестник
Оставить комментарий