Биэдэмистибэ официальнай дааннайдарынан, дойду үрдүнэн саамай үрдүк биэнсийэ үгэс курдук Хотугу уонна Уһук Илин эрэгийиэннэргэ бэлиэтэнэр. Бастыҥ көрдөрүүлээхтэр испииһэктэрин Чукотка баһылыыр, онно орто биэнсийэ — 42 270 солкуобайга тиийбит. Онтон салгыы Ненецкэй автономнай уокурук (38 831 солк.), Камчатка кыраайа (37 662 солк.) уонна Магадан уобалаһа (37 582 солк.) иһэллэр.
Маны таһынан, 30 тыһыынчалаах кирбиини Ханты-Мансийскай, Ямал-Ненецкэй автономнай уокуруктар, Мурманскай уонна Сахалин уобаластара аастылар. Саха сирэ бу рейтиҥҥэ Коми Өрөспүүбүлүкэтин, Архангельскай уобалаһы уонна Карелияны кэннигэр хаалларан, инники күөҥҥэ сылдьар.
Арассыыйа үрдүнэн ылан көрдөххө, бэс ыйыгар үлэлиир уонна үлэлээбэт биэнсийэлээхтэргэ төлөбүр орто кээмэйэ 25 402 солкуобай буолбут. Статистика көрдөрөрүнэн, аҕам саастаахтар дохуоттара сыыйа үрдээн иһэр. Ол курдук, биир сыл иһигэр Арассыыйаҕа биэнсийэ орто кээмэйэ 2 тыһыынча солкуобайынан улааппыт (тэҥнээн көрөр буоллахха, 2025 сыл бэс ыйыгар ити көрдөрүү 23 454 солкуобайга тэҥнэһэрэ).
Оставить комментарий