Кыайыылаахха бирииһэ туттарылынна

Тоҕо бу маҕаһыыҥҥа диэтэххэ, «Дьулурҕан» хаһыат футболга аан дойду чемпионатыгар аналлаах республикатааҕы конкурсун кыайыылаахха бирииһин бу маҕаһыын (салайааччылар Макар Зырянов, Василий Ноговицын) туруорбуттара.

Маҕаһыыҥҥа арыый эрдэ тиийээт, үлэһит Анжела Петрованы көрүстүм. Кыайыылаахха хампаанньа аатыттан саҥа спортивнай көстүүм бэриллэрин туһунан Туоһу суругу бэлэмнээбит. Итиэннэ элбэх спортивнай таҥастан-саптан, көстүүмнэртэн – чуо ханнык көстүүм бэриллэрин көрдөрдө. Ол курдук, Анжела, биир моделлаах, үүт-үкчү суруктаах гынан баран, араас өҥнөөх көстүүмнэри ыйар. Олортон биирдэстэрэ фиолетовайдыҥы-бордовай өҥнөөх эбит.

Ону көрөн мин: «Андрей Афанасьевич бэйэтин спортивнай оскуолатын маннык өҥнөөх маастарыскайын өрүү сөбүлээн кэтээччи», — диэтим. Инньэ диэппин кэннэ, кыайыылаахпыт оруобуна, мин эппит маастарыскайбын кэппитинэн, мичээрдээбитинэн киирэн кэллэ.

Маҕаһыын биир көстүүлээх сиригэр конкурс кыайыылааҕар хампаанньа «Дьулус. Тулус. Кыай» диэн суруктаах спортивнай көстүүмэ туттарыллар Туоһу суругу Макар Зырянов эҕэрдэлээн баран, үөрүүлээх быһыыга-майгыга туттарда.

Оттон Андрей Афанасьевич, махтанан туран, конкурска хайдах кыттыбытын, өссө эрдэттэн чемпионат сеткатын үөрэтэн, ырытан баран, финалга Испания – Аргентинаны эбии бириэмэҕэ 1:0 ахсаанынан кыайыа диэн суруйбутун, ол эрэн, бэйэтин билгэлээһинин ыытыан аҕай иннинэ, арааһа аһаҕас оонньуу буолсу диэн, 3:2 диэҥҥэ уларыппытын туһунан сиһилии үөрэ-көтө кэпсээтэ.

Үөрүүлээх бэлиэ түгэҥҥэ буоларын курдук, хаартыскаҕа түһүү кэнниттэн биһиги Андрей Афанасьевичтан саҥа спортивнай көстүүмүн кэтэн көрдөрөрүгэр көрдөстүбүт. Үөрүөхпүт иннигэр, сөрү-сөп түбэстэ. Хайдах эрэ киниэхэ анаан оҥоһуллубут курдук буолла.

Онон, конкурс кыайыылааҕа IRON COLLECTION хампаанньа саҥа спортивнай көстүүмүн үөрэ-көтө кэппитинэн дьиэлээтэ.

Санатан эттэххэ, Андрей Афанасьевич Филиппов 64 саастаах, бэйэтэ Өлүөхүмэттэн төрүттээх, аатырбыт Чурапчытааҕы спортивнай интернат-оскуолаҕа улуу тренер Д.П. Коркин салалтатынан эрчиллибит көҥүл тустууга ССРС спордун маастара. Билигин Дьокуускай куорат 5 №-дээх спортивнай оскуолатын дириэктэрин солбуйааччыта. Кинини уонна Макар Зыряновы кытта сэһэргэһиини dzulurgan.ru сайтка туспа матырыйаалга ааҕаарыҥ.

Оттон биһиги, IRON COLLECTION хампаанньа салалтатыгар уонна үлэһиттэригэр махтанабыт! Саха спордун сайдыытыгар киллэрэр кылааттарын билэн-көрөн, сүрдээҕин астынабыт уонна киэн туттабыт. Хампаанньа үлэтэ салгыы сайда турарыгар баҕарабыт.  

***
Петр ПАВЛОВ, «Дьулурҕан» хаһыат редактора

Ааптар уонна Анжела ПЕТРОВА хаартыскалара