Дыгын оонньууларын чемпиона Артем ДЬЯКОНОВ: Кыайыыбын сахам дьонугар аныыбын!

Эрийсиилээх-буруйсуулаах, саамай күүтүүлээх «Дыгын оонньуулара» Туймаада ыһыаҕын-2026 түмүктээтилэр.

Сахабыт сирин 16 эр бэрдэ икки күнү быһа тура тэбинэн күөн көрүстүлэр,  күүстэрин-уохтарын көрдөрдүлэр.

Бастакы күн түмүгүнэн Николай Матаннанов бастаан иһэр эбит буоллаҕына, иккис күн күөн көрсүү икки  уолаттар – Яков Дмитриев уонна Артем Дьяконов икки ардыгар барда. Уолаттар иккиэн төрдүс сылын «Дыгын оонньуутугар кытталлар эбит, иккиэн Кэбээйи улууһуттан төрүттээхтэр. Артем бастаан бириистээх миэстэттэн: бастаан үһүс буолбут, былырыын – иккис, быйыл чемпион үрдүк аатын ылла. 22 саастаах.

Бу сырыыга ким бастыырын 132 киилэлээх таас көтөҕүүтэ быһаарда. Яков 34 см-нан Артемтан бэрт кыранан хаалан иккис миэстэҕэ тигистэ.

Яков ДМИТРИЕВ

Үһүс миэстэни Павел Дурзьянов ылла, төрдүскэ Николай Матаннанов таҕыста.

Быйылгы «Дыгын оонньуулара» бирииһин уопсай суумата 19 мөл. солкуобайтан лаппа таҕыста диэн эттилэр. Дьокуускай куорат баһылыга Евгений Григорьев «аны мантан антах «Дыгын оонньууларын» таһыма түспэтин, өссө да үрдүү турдун» диэн баҕа санаатын эттэ. Ону сэргэ 16 бөҕөстөргө «спорка эрэ буолбакка күннээҕи олоххо эмиэ үтүө холобур буолуҥ» диэн үрдүк сыанаттан ыҥырда. 

Артем Дьяконов кыайбыта биллибитин кэннэ тута «Саха» НКИК ханаалыгар интервью биэрдэ, онно: «Кыайыыбын сахам дьонугар аныыбын, маннык курдук өрүү түмсүүлээх буолуоҕуҥ!» – диэн эппитэ көрөөччү сүрэҕин ортотунан киирдэ.

Уопсайынан бу кыттыбыт 16 спортсменнарга уонна кинилэр тренердэригэр барыларыгар улаханнык махтаныах кэриҥнээхпит. Икки күн устата дьоҥҥо-сэргэҕэ туох да омуна суох элбэх араас эмоцияны бэлэхтээтилэр.

Саамай эдэр кыттааччы – 19 саастаах Руслан Слепцов

Спорт диэн улахан үлэ. Сыралаах-сылбалаах, уустук, ыарахан  үлэ. Эти-сиини эрэ эрчийии буолбатах, куту-сүрү бөҕөргөтүү, күүстээх санааны ииттинии, туруоруммут соругу ситии, итэҕэли билинии. Онон спортсменнар физическэйи ааһан өрүү духуобунай тургутууга сылдьаллар. Бу сырыыга саха урбаанньыт саха эр дьоно элбэх бирииһи туруорбуттара хайҕаллаах. Спорт түмэр күүһүн туоһута эмиэ буолар.

***

Aartyk.Ru