Идэҕэ бэлэмниир үөрэх кыһаларын сайыннарар институт дириэктэрэ Лилия Иванова бүгүҥҥү пресс-кэмпириэнсийэҕэ иһитиннэрбитинэн, үөрэххэ туттарсааччыларга аналлаах быйылгы ыйынньык тахсыбыт. Ааспыт сыллардааҕар уратыта диэн, үрдүк үөрэх кыһаларын эмиэ киллэрбиттэр. Онон туһанарга өссө табыгастаах буолбут.
Быйыл өрөспүүбүлүкэ үрдүнэн 54 орто үөрэх кыһатыгар устудьуоннары үөрэтиэхтэрэ, итинтэн түөрдэ үрдүк үөрэх буолар. Барыта 19 саҥа исписээлинэс аһыллыаҕа.
“Кэллиэс, тиэхиньикум суох улуустарыгар үгүстэригэр сүрүннээн мэдиссиинэ, педагогика кэллиэстэрэ бэйэлэрин салааларын аһан эрэллэр. Быйылгы, урукку даҕаны сылларга бүтэрбит дьон сайабылыанньа биэрэн күнүскү үөрэххэ киириэхтэрин сөп”, – диэн салайааччы эттэ итиэннэ сылтан-сыл аайы 9-с, 11-с кылаас кэнниттэн дойду үрдүнэн, ол иһигэр Саха сиригэр эмиэ, орто үөрэххэ киирээччи ахсаана эбиллэн иһэр диэн бэлиэтээтэ.
“Ыччат уонна оҕо” национальнай бырайыак иитинэн “Профессионалитет” бырагыраамаҕа орто үөрэхтэри сүүмэрдииллэр. “Бу, үөрэх саҥа бырагырааматыгар киирбит устудьуоннар аныгы тэрилинэн хааччыллыбыт мастарыскыайдарга үөрэнэллэр. “Профессионалитет” саамай сүрүн уратытынан кэллиэһи салайар систиэмэҕэ уонна үөрэх бырагырааматын оҥорууга үлэ биэрэр тэрилтэлэр быһаччы кытталлар. Устудьуон үөрэххэ киирэригэр, үөрэнэ да сылдьан хаһыс баҕарар куурустан үлэ биэрэччини кытта сөбүлэҥ түһэрсэр уонна номнуо үрдүкү куурустарга үөрэнэ сылдьан үлэҕэ киирэр кыахтаах”, – диэн быһаарда.
“Профессионалитет” бырагыраамаҕа Тырааныспар тиэхиньикума (Аллараа Бэстээх) эмиэ хапсыбыта. Дириэктэр Иннокентий Оконешников иһитиннэрбитинэн, быйыл тустаах тиэхиньикумҥа бүддьүөттэн барыта 127 миэстэ көрүллүбүт. 9-с уонна 11-с кылаас кэнниттэн үөрэххэ ылаллар. “Биһиги “Профессионалитет” бырагыраамаҕа хапсыбыппыт олус үчүгэй. Бу устудуоннарбытын өссө хаачыстыбалаахтык бэлэмнииргэ кыаҕы биэрэр. 9-с кылаас кэнниттэн түөрт идэҕэ ылабыт: тимир суолу тутуу; вагону көрүү, өрөмүөннээһин; сыбаарсык, автомеханик. Сыбаарсыктар 9-с кылаас кэнниттэн икки эрэ сыл үөрэнэллэр. Уратыта диэн, үөрэҕи бүтэрээччилэр демонстрационнай эксээмэни таһынан, квалификация тутулуга суох сыанабылын туттараллар. Бу саамай үрдүк категорияны биэрэр. Ол эрээри, сылга үс-түөрт киһи эрэ туттарар. Автомеханик идэтигэр үөрэнээччилэргэ эһиилгиттэн В категорияҕа босхо үөрэтэн сибидиэтэлистибэ туттарыахпыт. Онтон 11-с кылаас кэнниттэн үс идэҕэ ылабыт”, — диэн дириэктэр эттэ.
Орто үөрэх кыһалара сыллата өрөспүүбүлүкэҕэ ирдэнэр саҥа идэлэри аһаллар. Быйыл Арктикатааҕы кэллиэскэ (Черскэй) “сүөһүнү иитии маастара”, Нерюнгрига “стоматология дьыалата”, Дьокуускайга “оҥоһуу өй технологиятын туһанан быһаарыыны түмүү”, Үөһээ Бүлүүгэ “акваторийга куттал суох буолуута” о.д.а. идэлэр аһыллыахтара.
Үөрэххэ туттарсааччылартан сайабылыанньаны атырдьах ыйын 15 күнүгэр диэри ылаллар, эбии тургутуулаах идэлэргэ (мэдиссиинэ, айар үлэ, успуорт…) – атырдьах ыйын 10 күнүгэр диэри. Орто үөрэхтэргэ докумуону үөрэх кыһатыгар бэйэтигэр, Судаарыстыбаннай өҥө порталынан, Арассыыйа буостатынан биэриэххэ, ыытыахха сөп.
***
Ааптар: Людмила Попова
Хаартыска: Людмила Попова
Оставить комментарий