Айыы кыһата оскуола үрдүнэн “Туллуктар” көттүлэр

Айыы кыһата оскуола киэркэйэн-тупсан иһэр. Ол курдук оскуола үрдүнэн  «Туллуктар» көттүлэр. Арт-объект сүүс туллуктан турар, ахсаана мээнэҕэ буолбатах – Саха судаарыстыбаннаһа төрүттэммитэ 100 сыллаах үбүлүөйүгэр ананар.

Сахаҕа туллук чыычаах сандал саас бэлиэтэ, ылааҥы кэрэһитэ, айылҕа уһуктара чугаһаабытын илдьитэ.

Бу туллуктары технология учуутала Виталий Архипович Слепцов үөрэнээччилэрэ оҥордулар. Аһыллар күнэ-дьыла эмиэ суолталаах – 1925 сыл алтынньы 8 күнүгэр cаха сирин үрдүнэн бастакы көтөр аал халлааҥҥа дабайбыт күнэ. Көтөр аал пассажирадарын ортотугар Былатыан Ойуунускай баара.

Айыы кыһатыгар уолаттар технология уруогар бэйэлэрэ  тутан-хабан, эрбээн, устуруустаан, кыһан уһаналлара олус хайҕаллаах. Сорох куорат оскуолалара, хомойуох иһин, бу уруогу таах халтай барыыллар.

***

Aartyk.Ru