Борис КЭМ күһүнэ

КҮҺҮН

Мин сайын хайдах

     күрэнэрин 

                     көрбүтүм,

Кини дьиэттэн

     үүрүллүбүт киһи

        курдук уку- сакы тахсан

                барбыта,

Ол онтон 

     хомойбута, 

              хоргуппута

Сыыйа күһүҥҥэ

       кубулуйбута…

Туох баар 

    сылааһын, 

        кырааскаларын,

Эргэ чымадааныгар

       бытааннык хомуммута,

Уонна сүөм түһэн,

      саарбахтаан,

Үрэх үрдүгэр өр

     толкуйдуу 

                    турбута.

Олоххо сайын элбэх,

Туох буолуой 

                диэччилэр,

Билгэһиттэр, 

    интернеттэр, 

       көрбүөччүлэр,

Биири

 өйдөөбөтөхтөр, 

               көрбөтөхтөр,

Ханнык да дьыл 

                           күһүнүгэр

Сүрэххэ эрэл 

     кыымнара 

           өспөтөхтөр…

 ***

     ТҮҮН

Киэһэ буолла…

Ааһан эрэр

           сылайбыт күн

Инчэйбит сон курдук

             ыараханнык    

      аллараа

                       баттыыр.

Ыйтан түһэр 

      хараҥа күлүк

        бэҕэһээни

               сабардыыр.

Хараҥа хараҕын

                      сабар,

Куорат көстүүтэ

        миигиттэн

                     саһар.

Ыытабын бу түүнү

    сылайбыт

          кыламаннаргар

  Санаата-оноото

                            суох       

           сынньалаҥнык

      утуйаргар!

Түүнү курдат көрөр уоттаах

      түннүктэр,

Дууһаны сырдатар

    эмискэ умайбыт

        чүмэчилэр.

Хараҥаны курдат

    көрөр харахтар…

Борук-сорукка кэккэлээбит 

              талахтар

Харбаан ылыахтыы адаарыйбыт

      тарбахтар

Сир халлаан этин сааһа аһыллыбыта

Баҕар буолуо кэлэр 

     кэм илдьитэ  

          иһиллибитэ…

              ***

Борис ПАВЛОВ-Кэм