Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Василий Егоров Уһук Илин рингэтигэр тахсыаҕа

31.05.2022 20:08 0
Василий Егоров Уһук Илин рингэтигэр тахсыаҕа

Бэс ыйын 13-17 күннэригэр Дьокуускайга «Кыайыы 50 сыла» Дыбарыаска боксаҕа эр дьоҥҥо Уһук Илиҥҥи федеральнай уокурук чемпионата ыытыллыаҕа. Маннык күрэхтэһии киин куораппытыгар 30 сыл анараа өттүгэр Нуучча театрыгар ыытыллан турардаах. 2007 уонна 2018 сс. биһиэхэ Россия чемпионаттара ситиһиилээхтик тэриллибиттэрэ. Бу сырыыга Дальнай Восток бастыҥ боксердара дойду сүрүн рингэтигэр барар путевкалары былдьаһыахтара.

Саха сирин спортсменнара бу эппиэтинэстээх түһүлгэҕэ хайдах бэлэмнэнэ сылдьалларын туһунан хамаанда сүрүн тренериттэн, Саха Республикатын үтүөлээх тренерэ, ССРС спордун маастара В.И. Павловтан ыйыттым.

– Билигин 40 киһини ыҥыраммыт бэлэмнэниибит тиһэх, быһаарыылаах түһүмэҕин тэрийдибит, – диэн кэпсиир Владимир Иванович. – Республикабыт Спортивнай бэлэмнэниитин киинин салалтата өйөөн, сөптөөх усулуобуйаны тэрийэн, күүстээхтэри барыларын түмтүбүт. Урукку өттүгэр хаһан даҕаны бачча элбэх боксеру мунньа иликпит. Эрчиллиилэри миигин кытта тренердэр А.М. Максимов, А.А. Ушканов, Д.Н. Федоров, Н.М. Егоров, В.Ю. Шестаков, Н.А. Дмитриев салайсан ыыта сылдьаллар.

– Спорт үтүөлээх маастара Василий Егоров кыттар дуо?

– Василий икки-үс күнүнэн Сочиттан көтөн кэлэн биһиэхэ холбоһуохтаах. Кини төрөөбүт Сахатын сиригэр боксаласпатаҕа үс аҥаар сыл буолла. 2018 с. Россия чемпионатыгар манна «Триумфка» 48 киилэҕэ бастаабыта. Ол кэнниттэн 51 кг көһөн, Россияҕа биир кыһыл көмүс, икки үрүҥ көмүс мэтээллэри ылбыта. Кини иннигэр билигин бэйэтин ыйааһыныгар бастакы нүөмэр аатын төннөрөр сорук турар. Спорду таптааччылар бастыҥ спортсмеммыт киирсиилэрин кэлэн илэ харахтарынан көрүөхтэрэ, уолларыгар ыалдьыахтара, күүс-көмө буолуохтара диэн эрэнэбит.

– Соторутааҕыта Серпухов куоракка «Знамя Победы» диэн улахан турнирга саха уолаттара ситиһиилээхтик кыттыбыттара. Бу күрэхтэһиини дойду сүүмэрдэммит хамаандатыгар резервэни талыы буолар диэн ааттаабыттара. Түмүгүнэн сборнайга ким киирбитин биллэрдилэр дуо?

– Күрэхтэһии түмүгүнэн маннык дьон сүрүн хамаандаҕа киирэллэр диэн тугу даҕаны биллэрбэтэхтэрэ. Талбан Егоров састаапка эрдэ киирбитэ. Төһөтүн да иһин, Назар Андреев чаҕылхай кыайыытынан сборнай кылаабынай тренерин В.Н. Фархутдинов хараҕар хатанна. Николай Григорьев даҕаны кыахтааҕын көрдөрдө.

– Бу уолаттарбыт «Кыайыы 50 сыла» Дыбарыас рингэтигэр тахсыахтара дуо?

– Назар бэс ыйын ортотугар саҕаланар «Кыайыы Кубога» диэн улахан күрэхтэһиигэ Московскай уобалас аатыттан кыттыахтаах, онон Дьокуускайга боксаласпат. Кини билигин армияҕа сулууспата бүтэн, Одинцово куоракка көстө. Талбан Егоров армияҕа ыҥырылынна, манна кэлэрэ присягатын хаһан ыларыттан тутулуктаах. Николай Григорьев бэлэмнэнэ сылдьар, кыттыахтаах.

– Биир эрэнэр, элбэҕи кэтэһэр уолбут Евгений Мартынов эмиэ армияҕа ыҥырыллыбыт этэ. Кини инникитин туһунан туох биллэр?

– Оннук, Женя армия кэккэтигэр барбыта. Россия сүүмэрдэммит хамаандатын чилиэнин быһыытынан спортивнай ротаҕа тиийбитэ. Салгыы дьарыга, күрэхтэһиилэргэ кыттыыта присягатын ылбытын кэннэ чуолкайданыахтаах.

Бу түһүлгэ түмүгүнэн бастаабыттар балаҕан ыйыгар Чита куоракка буолуохтаах Россия чемпионатыгар кыттар быраабы ылыахтара. Бэйэбит сирбитигэр-уоппутугар буолуохтаах күөн күрэскэ боксердарбытыгар ситиһиилээх киирсиилэри, элбэх кыайыыны-хотууну баҕарабыт! Охсуулартан охтумаҥ, саайыылартан самнымаҥ!

***

Гаврил Стручков,

Дьулурҕан.

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»