Сайсары үрдүнэн Аал Луук мас сандаарда

Дьокууускай куорат архитектуратын сахалыы тыынныыр, дьиҥ национальнай республика киин куората буоларын ситиһиэххэ диэн этии, туруорсуу барбыта быданнаата.

Кэлиҥҥи кэмҥэ сахалыы оһуордар одоҥ-додоҥ онно-манна, ыскаамыйаларга эҥин, көстүтэлиир буоллулар. Бэл, аһара баран көҕүөр оһуору бөх тоҕор баахтарга кытары кыбытан дьону кыынньааһын кытары баар.

“Стройкон” фирма олус бэркэ ылсан куорат сирэйин “сахатытан” эрэр. “Модун” национальнай спорт көрүҥүн дьиэтин бу тэрилтэ туппута. Оһуора-мандара, сиэдэрэйэ киһи хараҕын үөрдэр.

Соторутааҕыта “Стройкон” Сайсары күөл үрдүнэн икки халлааҥҥа харбаһар дьиэни тутта. Бу икки дьиэ уратыта диэн киирэр ааныттан саҕалаан, истиэнэни тилэри сахалыы уот оһуорунан киэргэммитэ буолар.

Бастаан, бу түөлбэ олохтоохторо дьиэ атылыы оһуорунан киэргэтиллэрэ буолуо диэн кэтэспиттэрэ. Онтулара иккис дьиэҕэ баараҕай Аал Луук мас “үүнэн” таҕыста. Бу киэһэ оһуор уоту холбоон ыас хараҥа күһүнү ыраахха диэри  дьиэлэр сырдаттылар. Бэйэтэ да улахан уотунан-күөһүнэн мааныламматах Гимеин түөлбэтэ биирдэ сандаара түстэ.

Дьокуускайга саха дьоно салайар тутар тэрилтэлэрэ син бааллар. Кинилэр эмиэ тутар объектарын, бу Иван Полушкин салайар “Стройкон” фирматын курдук, сахалыы тыыннаан, национальнай колориты киллэрэн үлэлэрин-хамнастарын дьаһаналлара буоллар киһи сүргэтэ көтөҕүллүөх этэ.

***

Aartyk.Ru