Мишустин Саха сирин тумнар

РФ правительствотын тойоно  Михаил Мишустин Уһук Илини кэрийэ кэлэр.

Мишустин айанын былаана: от ыйын 26 – Южно-Сахалинскай, от ыйын 27 –  Итуруп арыыта (Сахалин уобалаһа), от ыйын 28 – Комсомольск-на-Амуре, от ыйын  29 – Иркутскай. Улахан тойон суолугар Саха сирэ ханан да суох. Онон Мишустины көрө маттыбыт.

Михаил Мишустины Путин  Курил арыыларыгар болҕомтоҕун хатаар эрэ диэн сорудахтаабыт. Ол туһунан  Октагон суруйар. Путин Курилга  Японияны кытары улахан экономическай үлэни тэрийээри былаанныыр эбит. Дьоппуоннар ол туһунан билбэттэр эрээри, Путин этиититтэн олох аккаастаныахтара суоҕа диэн биһиги дьоммут бүк эрэллээхтэр.

Оттон сахалар Мишустин дуоһунаһын сүтэримээри Дьокуускайы таарыйбата дии саныыллар: “Тоҕо диэтэххэ, Дьокуускайга кэлбит премьер булгуччу дуоһунаһыттан уһуллар”.

Сорохтор Дьокуускай пуорда кылгас, онон Мишустин сөмөлүөтэ түһэр кыаҕа суох диэн этэллэр.

Пуорт да, Ленин да проспега оҥоһуллара ыраах быһыылаах. Онон биир да улахан сололоох тойону өтөрүнэн көрбөппүт буолуо. Cатахха буруобут, итиибит, оҥоойубут… кэлии тойон кэлиэхтээҕэр, олохтоох тойон куотуох курдук.

***

Aartyk.Ru