Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Иннокентий ВАСИЛЬЕВ: Киһилии сыһыан – үйэлэр сыаннастара

08.07.2018 09:10 6
Иннокентий ВАСИЛЬЕВ: Киһилии сыһыан – үйэлэр сыаннастара

Саха Республикатын Государственнай Мунньаҕын – Ил Түмэн бэһис ыҥырыылаах мунньаҕын депутата Иннокентий ВАСИЛЬЕВ 2013 сыллаахха Ньурба быыбардыыр уокуругуттан КПРФ испииһэгинэн талыллыбыта.

Иннокентий Давыдович Саха сирин 70 депутаттаах бэрэстэбиитэллээх үрдүкү уорганын биир чаҕылхай, үтүө түмүктээх, дьүккүөрдээх үлэлээх, дьон-сэргэ интэриэһин кырдьык туруулаһар депутаттартан биирдэстэрэ.

Бүгүн кини биһиги хаһыаппыты ыалдьытынан буолла.

– Иннокентий Давыдович, төрдүҥ-ууһуҥ туһунан дьоҥҥо-сэргэҕэ билиһиннэр эрэ.

– Ийэлээх аҕам иккиэн учууталлар этэ. Аҕам Давид Дмитриевич Васильев кылгас эрээри чаҕылхай олоҕу олорон ааспыт киһи. Кини история учуутала этэ, Ньурба Аканатыттан төрүттээх. Институт кэнниттэн Акана оскуолатыгар улэлээбитэ, онтон Чаппанда оскуолатын директорынан үлэлии сылдьыбыта. Кэлин Сунтаар 2-с №-дээх оскуолатын көҕүлээн туттарбыт уонна салайбыт киһи буолар. Онтон 1967 сылтан Сунтаарга партия райкомун инструкторынан үлэлээбитэ.

Ийэм – Лилия Иннокентьевна Колесникова нуучча тылын уонна литературатын учууталынан 50-тан тахса үлэлээн баран билигин Дьокуускайга олорор, үлэ бэтэрээнэ, Сунтаар нэһилигиэн Бочуотттаах олохтооҕо, 85 хаарын уулларан эрэр.

– Бэйэҥ ханна төрөөбүккүнүй?

– Чаппандаҕа. Оҕо сааһым Чаппандаҕа, Аканаҕа ааспыта. Эбэбэр (аҕам өттүнэн) Анна Петровнаҕа олорон 6-с кылааска диэри Акана оскуолатыгар үөрэммитим, онтон биир сыл Дьокуускайга музыка оскуолатыгар кэлэн үөрэнэ сылдьыбытым. Аҕам улаханнык ыалдьыбытыгар Сунтаарга барбытым, онно оскуоланы бүтэрбитим.

– Оскуолаҕа үөрэммит доҕотторуҥ кэпсииллэринэн, олус көхтөөх тэрийээччи үһүгүн дии?

– Элбэх сиргэ олорбут, үөрэммит буолан сытыы-хотуу быһыылаах этим. Олох үөрэттэҕэ дии.

– Наар ыстаараста этэ диэн өйдүүллэр эбит.

– Оччотооҕу ыччат бары да көхтөөх баҕайы этэ. Ол сахха ВИАлары тэрийии баара. Биһиги эмиэ доҕотторбутун кытары ВИА тэрийэн айар үлэҕэ умсугуйан туран дьарыктанан барбыппыт. Улууспут дьонун-сэргэтин улахан сэҥээриитин ылбыппыт.

– Музыка сокуолатыгар үөрэммитим диэн эттиҥ, ханнык специальноска?

– Флейтаҕа. Уопсайынан оҕону бары өттүнэн дьарыктыы сатыахха наада дии саныыбын. Спорт да буоллун, музыка да буоллун, үөрэх да буоллун – бу олоххо, дьону-сэргэни да кытары алтыһарга олус көмөлөһөр, билиигин-көрүүгүн хаҥатар.

– Бастакы идэҥ?

– Сунтаарааҕы профтехучилищены бүтэрбитим. Армияҕа барыам иннинэн Сунтаар райкомун бастакы сэкиритээригэр Александр Акимовка суоппардаабытым. Онтон армия кэнниттэн 90-с сылларга диэри “Суһал көмө” суоппарынан балыыһаҕа үлэлээбитим.

– Тоҕо урбаанньыт буолан турбуккунуй?

– Ыһыллыы-тоҕуллуу кэмэ кэлбитигэр ким тугу сатыырынан үлэ-хамнас булан, тобулан барбыта. Хамнас диэн суох, дьоҥҥун иитиэххин наада. Онон тугу үлэлээн- хамсанан дьиэ кэргэммин иитиэх буоллахпыный диэн толкуйга түспүтүм. Киһи бэйэтэ быһаарсар салаатыгар бэйэ дьыалатын тэрийиэхтээх буоллаҕа. Мин буоллаҕына суоппардыы сылдьан эбии сварщик үөрэҕэр үөрэммитим. Уолаттары кытары сварка үлэтигэр өҥө көрөр биригээдэ тэриммиппит. Үлэ болдьоҕор уонна хаачыстыбатыгар сүрүн болҕомтону уурбуппут, онтубутун дьон астынан, сакаас элбээн барбыта. Онтон Ульяновскайтан массыына аҕалан атыылыы сылдьыбытым. Кэлин 1996 сыллаахтан массыына сапчааһын, араас атын хаһаайыстыбаннай табаар аҕалан атыылаан барбытым. Сапчааһынан – Сунтаар улууһун хааччыйан барбытым.

– Урбаан үлэтэ элбэх уустукаах.

– Оннук. Суолгун бэйэҥ солонор буоллаҕыҥ, бэлэмҥэ мэҥийии суох: таптыҥ – барыстанныҥ, сыыстыҥ – умайдыҥ. Аны ол таһынан государственнай систиэмэ административнай моһолун туоруоххун наада. Ол баар – саамай эрэйэ. Онно сокуону билэр буоллаххына арыый көмүскэллээх буолара. Ол иһин юрист идэтигэр Аныгы Гуманитарнай Академияҕа киирэн үөрэммитим – бэйэм, дьонум быраабын туруорсаары.

– Урбааны, биир өттүнэн, өйүөххэ диэн этэллэр, биир өттүнэн эмиэ да бобуу-хаайыы, хааччахтааһн элбэх.

– Урбаанньыттары өйөөн, орто кылааһы үөскэтиэххэ диэн дойду таһымыгар луоһун бөҕө баар. Ол гынан баран дьыалатыгар атын. Тоҕото биллэр – бэйэтэ бэйэтин ииттинэр кыахтаах дьон бу билиҥҥи государствоҕа наадалара суохтар. Бэйэтэ бэйэтин ииттинэр киһи, государство хараҕар – кутталлаах. Тутулуга суох буолан хаалар. Ол кэриэтин быыкаай хамнаска, пособияҕа олордон, эбэтэр кредиккэ баайан дьону тутулукка киллэрэн, үүрбэ сүөһүгэ кубулутуу – бары өттүнэн барыстаах буоллаҕа. Капитализм сүрүн идиэйэтэ онно сытар. Дьон бэйэтин быраабын туруорсубат буолар – үлэтиттэн үүрүллүө, оттон үлэтэ суох кредитин хайдах төлүөҕэй? Ол иһин дьон олоҕун тупсарыы кимиэхэ да наадата суох курдук. Кыра, дьоҕус урбааны сайыннаран орто кылааһы үөскэтиигэ ким да интэриэһэ суох. Тутулуга суох дьону тоҕо элбэтиэхтэрэй?

– Үрдүк үөрэххэ талаһыах оннугар орто үөрэххэ туттарсыы элбиэхтээх диэн политика барда. Итиннэ эн санааҥ?

– Туох барыта кэмигэр уонна сиэр иһинэн оҥоһуллуохтаах. Биһиэнэ барыта муҥ кыраайтан биир кыраайга диэри түһэр. Үлэ миэстэтин таһаарбакка сылдьан ол үөрэххэ ыччаты үөрэт да, үөрэт буолаллар, онтон кэлэн үөрэх куһаҕан аатырар. Үөрэхтээх дьон элбэх – үлэ миэстэтэ суох. Урут хас биирдии иккис саха үрдүк үөрэхтээх буолуохтаах диэн ыҥыраллара, аны билигин үрдүк үөрэх отой наадата суох курдук этэн таһаардылар. Ыччаты, бастатан туран, үлэлии үөрэтиэххэ, иитиэххэ наада. Сэбиэскэй былаас сууллубутун кэннэ, туох баар пропаганда – чэпчэки, кыраһыабай олоҕу телевизорынан, киинэннэн, хаһыатынан, сурунаалынан, араадьыйанан, билигин –интернетинэн ыһан кэбиспитэ ыччат өйүн бүтүннүү сүүйдэ. Ол түмүгэр, биһиги ыччаппытын ааһан, орто саастаах да дьон тиритэ-хорута үлэлиэхтэрин баҕарбат буоллулар. Түргэнник уонна чэпчэкитик биирдэ баһан ылыы – “американская мечта” саха алааһыгар кытары тиийэн иҥэн олорор. Бу барыта – пропаганда содула. Бу айылаах тыйыс усулуобуйаҕа олорор саха барахсан, былыр-былыргыттан, сүүс көлөһүнүн тоҕон, чэҥ кыаһаа дойдуга олох тутан кэлбитэ. Чэпчэки олох ханна да суоҕа. Киһи буоларга сүрэх-бэлэс наада этэ. Билигин даҕаны оннук, үлэлиир киһи тугу эмэ ситиһэр. Халлаантан туох да быстан түспэт. Үөрэх өттүгэр этэр эбит буоллахха, былыр-былыргыттан саха үөрэҕи өрө тутар этэ, үһүс харахтаммыт курдук сананара. Сахаларга үөрэҕи сэбиэскэй былаас аҕалбыта. Кыра-хара норуокка сэбиэскэй былаас үтүөнү оҥорбута сүүс төгүл элбэх. Хас да бүк баттыгастаах, хаалынньаҥ олоҕу үрэйэн биһиги тыыммытын уһаппыт, киһи-хара оҥорбут былаас  Сэбиэскэй былаас буолар.

– Хаһааҥҥыттан депутат буоларга санаммыккыный?

– Киһи олоҕун тухары туохха эмэ үөрэнэр, киһи сүрэҕэ тэбэрин тухары толкуйдуур, саныыр. Ханнык эмэ түһүмэххэ кэлэн, киһи өйө-санаата бэйэтин, чугас дьонун кыһалҕатын быһаарар таһымыттан тахсан – олоххо, обществоҕа, дьоҥҥо-сэргэҕэ тугу эмэ көдьүүстээбит киһи, аатын хаалларбыт киһи диэн санааҕа тиийэр. Предприниматель буолуохпуттан саҕалаан детсадтарга, оскуолаларга кыах баарынан көмөлөһөбүн. 2009 сылтан саҕалаан аҕам тэрийбит уонна салайбыт оскуолатыгар кини аатынан стипендия олохтообутум. Үчүгэй үөрэхтээх, общественнай олоххо көхтөөх выпускниктар сылын аайы Давид Дмитриевич Васильев аатынан стипендия ылаллар. Депутат быһыытынан үлэбин 2004 сыллаахха Сунтаар нэһилиэгин сэбиэтиттэн саҕалаабытым. Бюджет хамыыһыйатыгар, оҥорон таһаарыы уонна промышленность хамыыһыйатыгар үлэлээбитим, салайбытым.

– Оччолорго олохтоох бэйэни салайыныы систиэмэтэ киирбитэ, саамай уларыйыы-тэлэрийии кэмэ этэ.

– Сөпкө бэлиэтээтиҥ. Саҥа систиэмэ олоххо киирэрэ хаһан баҕарар докумуонтан саҕаланар. Докумуону, сокуон аахтарын оҥоруу, сана устаабы ылыныы биһиги ыҥырыылаах мунньахпыт кэмигэр барбыта. Үлүннэриитэ суох элбэх юридическай үлэни оҥорбуппут. Муниципалитет кэнэҕэс үлэлиир, олорор, быраабын аахсар, боломуочуйатын тыырсар докумуонун оҥоруу улахан эппиэтинэстээх кэмэ этэ.

– Онно сылдьан Сунтаар нэһилиэгин күнүн олохтообуккут этэ быһыыта.

– Ол эмиэ баара. Архыып докумуоннарын хаһан, үөрэтэн нэһилиэк тэриллибит күнүн-дьылын чуолкайдаан, ахсыньы 24 күнүгэр Сунтаар нэһилиэгэ төрөөбүт күнүн бэлиэтиир үгэс олохтоммута.

– 2013 сыллаахха Ил Түмэн депутатынан талыллыбытыҥ. Тоҕо коммунист партияҕа киирбиккиний?

– Хос эһэбиттэн саҕалаан Сэбиэскэй былаас туһугар сэриилэспит, үлэлээбит дьон сыдьааннара буоллаҕым (күлэр). Үөһэ ахтыбытым курдук, киһиэхэ киһилии сыһыаны өрө туппут, киһи-аймах кырдьыктаах олох туһунан ыра санаатын барытын түмпүт политическай идеология – коммунистическай идеология. Киһи киһини баттыа, атаҕастыа суохтаах, киһи, норуот барыта тэҥ бырааптаах буолуохтаах диэни, ама, ким утарыах этэй? Мин олох өйдүүн-санаалыын, эттиин-сиинниин, көрүүлүүн-истиилиин ити идеологияны кытары бүүс-түннүү сөпсөһөбүн. Ол иһин КПРФ кэккэтигэр киирбитим.

– Оттон эргиэмсик, атыыһыт хайдах коммунист буолла диэбэттэр дуо?

– Былыр атыыһыттар, Боһуут атыыһыты да ылыҥ, улахан меценат дьон этилэр. Аҕабыыттар, хаһаах сулууспалаахтара буолбатах, саха оҕолорун үөрэттэрэр оскуолалары саха атыыһыттара туттараллара, пансионнары үбүлүүллэрэ, балыыһалары астараллара, суол-иис оҥоттороллоро. Боһуут Түүкээҥҥэ диэри суолу үбүлээн туттарбыта хойукка диэри “Боһуут суола” диэн ааттанара эбээт. Дьыала аатыгар буолбатах – дьыала ис хоһоонугар. Дойдугар, бар дьоҥҥор туһаны аҕалыы, үбүнэн-харчынан көмөттөн саҕалаан дьон туһугар сокуоннары оҥорсуу, быраабын туруорсуу – бу барыта норуотуҥ иннигэр эппиэтинэһи үөскэтэр. Сахаларга кыахтаах, баай дьон элбииллэрэ – биһиги көмүскэлбит.

– Уонна коммунистар быстар дьадаҥы дьон буолуохтаахтар диэн ким эппитэй диэххэ…

– Бастааҥҥы колхуостар, араас араадьыйа, холодильник онорор тэрилтэлэр артыаллар – билиҥҥи предпринимательство диэн ааттыыр схеманан тэриллибиттэрэ. Бары ким туохтааҕынан кыттыһан тэрилтэ тэрийэн барыыска үлэлээтэхтэрэ эбээт. Өссө Ленин этэр этэ: “Учитесь торговать, товарищи, учитесь”, – диэн. Сталин кэмигэр оннооҕор оборонка продукциятын 40%-нын предпринимателлэр оҥороллор этэ.

– Идеология өттүгэр тохтоотоххо, Сталиҥҥа сыһыаныҥ хайдаҕый?

– Сталин – улуу генийдар кэриэтэ, историяҕа суолтата, Сэбиэскэй государство атаҕар туруутугар, сайдыытыгар сүдү кылаата уонна оруола өссө да үөрэтиллэ, чинчийиллэ илик. Ол кэминээҕи сайдыылаах государстволартан 100 сыл хаалан испит хаалынньаҥ, үөрэҕэ суох нэһилиэнньэлээх дойдуну 20 сыл иһигэр аан дойду тутаах государствотыгар кубулутуу – кини туох да улахан улуу, гениальнай салайааччы буоларын өссө биирдэ туоһулуур. Сталин үйэтин тухары туох да ынырыктаахай киирсиини, таҥнарыыны көрсүбүт, кэтэх оонньууну, этэргэ дылы, этинэн, бэйэтин буулаҕа санаатынанан, мындыр өйүнэн тэлбит киһи буолар. Холобур, кини 30-40-с сыллардаахха партия дойдуну салайыа суохтаах, кини идеологияны эрэ оҥоруохтаах диэн санааны олоххо киллэрэ сатаабыт уонна киллэрбит киһи буолар. Государствоны салайыыны министирдэр сэбиэттэригэр биэрэри олохтообута. Онтон хомойуох иһин, кини өлбүтүн кэннэ Хрущевтаах дойду былааһын барытын партия илиитигэр түмпүттэрэ. Политика аата политика, биирдиилээн дьон интэриэстэригэр, кинилэр былааска тахсар инструменнарыгар кубулутуу тиһэх уһугар, бу айылаах улуу государствоны ыһыыга тиэрдибитэ. Бу кинилэр сүүстэн тахса нэһилиэнньэлээх дойду олоҕун аймаабыттара, ыспыттара-тохпуттара улахан аньыылара-харалара буолар.

– Сталин тас дойдулары кытары атыыга-тутууга көмүһүнэн аахсары олохтообута саамай сөп этэ диэн билигин сыаналыыллар.

– Оннук бөҕө буоллаҕа. Валюта – кумааҕы, станок уйарынан бэчээттиир омук харчыта ханнык баҕарар дойду экономикатын тутулукка киллэрэрин оччолортон кини өйдүүр этэ. Ол иһин туох баар тас дойдуну кытары сыһыаны көмүскэ көһөрбүтэ. Сэбиэскэй сойууһуҥ – көмүс саппааһынан бастакы миэстэҕэ турара, ол да инниттэн дойду экономиката атаҕар турарыгар көмүһүнэн сыананы быһыы көмөлөспүтэ саарбахтаммат. Итиннэ биһиги Ньурбабыт чулуу уола Степан Васильев кылаата эмиэ баар. Кинини Алдаҥҥа, көмүс хостуур промышленнаһы төрүттээбит киһинэн билинэн, баччааҥҥа диэри олус ытыктыыллар. Биһиги буоллаҕына, бу соторутааҕыта эрэ үтүө аатын кэриэстээн Дьокуускайга памятник туруордубут, Москваҕа олорбут, үлэлээбит сиригэр чиэстээн мемориальнай дуоска ыйаатыбыт. Дойдубут дьылҕатыгар быһаччы дьайар сүҥкэн үлэни уһансыбыт саха чулуу дьонун ааттара норуоттарыгар төннүөхтээх.

– Иннокентий Давыдович, дьиэ кэргэниҥ туһунан билиһиннэрдэххинэ?

– Кэргэним Лена Яковлевна Васильева Сунтаартан төрүттээх, экономист үөрэхтээх, Сунтаарга Госбааҥҥа, Сбербааҥҥа, кэлин Нолуок сулууспатыгар пенсияҕа тахсыар диэри онно үлэлээбитэ. Үс оҕолоохпут. Улахан уол Яков аҕыс сылы быһа Кытайга кытай тылыгар үөрэммитэ, Шанхай, Харбин университеттарыгар. Дьокуускайга кэлэн Максим Аммосов аатынан университекка преподаватель идэтигэр үөрэммитэ. Онтон билигин чааһынай медицинскэй косметология хампаанньатыгар үлэлиир. Иккис уолум – Александр милииссийэ оскуолатыгар үөрэммитэ, милииссийэҕэ үлэлии сылдьыбыта. Билигин кэргэннэнэн, оҕолонон Сунтаарга олохсуйан олорор, суоппар идэлээх. Кыыһым Светлана ХИФУну бүтэрбитэ, экономист, кэргэннээх. Нолуок сулууспатыгар үлэлиир, билигин оҕолонон дьиэтигэр оҕо көрөн олорор.

– Бэйэҥ, биир уолуҥ тыа сиригэр олорор эбит. Тыа сирин олоҕун билэр дьон буоллаххыт, сайдар кэскилэ туохха сытар дии саныыгын?

– Киһини ханна баҕарар олохсутар, тутар биир эрэ төрүөт баар – олох таһыма. Киһи дьиэ кэргэнин иитэр кыахтаах буоллаҕына эрэ тыа сиригэр олохсуйар кыахтаах. Саха – аграрнай омук. Ол иһин даҕаны бу президент быыбарыгар совхоз председателигэр – Павел Грудиниҥҥа нэһилиэктэр куоластаахтахтара. “Тыа сирэ – норуот биһигэ” диибит даҕаны, бюджеттан 10 млрд эрэ тыа хаһаайстыбатыгар көрүллэр. Онтон 3 млрд тыа дьонугар үүт харчыта, субсидия буолан тиксэр. Ол быычыкаай. Оттон одуга – 7 млрд ол-бу араас граннарынан, программанан, хамнастарынан, “Туймаада нефть”, ” Туймаада лизинг”, “Якутэнерго” диэн хампанньаларынан тарҕанан сүтэн-симэлийэн хаалар. Өссө ити 3 милларды Ил Түмэҥҥэ коммунистар фракциялара хас да сылы быһа охсуһан-этиһэн улаатыннарбыппыт быһыыта. Санааҥ көрүҥ – үүт субсидията уонтан тахса сыл, ол аата барыллааг Ил Түмэн  үс мунньаҕын устата – 17 солк. 50 харчынан быһыллан турбута. Сыана үрдүүр, инфляция бөҕө буолар, атын салааларга индексация оҥоһуллар, оттон тыа дьонун сыралаах үлэтэ кэппиэйкэ да үрдээбэккэ турбута. Үс сылы быһа киирсэн-киирсэн, дакаастаан-дакаастаан үүт тутуллар сыанатын 30 солкуобайга диэри тиэртибит. Дьиҥинэн, биһиги, коммунистар 50 солк. оҥоруохха диэн туруорсубуппут. Сокуон барылын оҥорбуппутун “единэйдэр” үгүстэрэ – утары куоластыы олорбуттара. Онтон кыһыйаммын, ким хайдах куоластыырын аһаҕастык бэчээттиэххэ диэн фракциябар этии киллэрбитим. “Тыа дьоно талбыт депутаттаргыт үүт сыанатын быһааарары хайдах утарса олороллорун көрүҥ” диэн баран боротокуолу Туймаада хаһыакка бэчээттэтэн ыытан кэбиспиппит. Куоластааһын аһаҕас – дьонтон тугу да кистээбэппит диэн. Дьэ, ол эрэ кэнниттэн айдаан тахсыбытагр 30 солк. диэри өрө таһаарарга куоластаабыттара.

– Салгыы 50 солк. диэри таһааралларыгар киирсэҕит дуу?

– Киирсэн буоллаҕа. Ол эрэ туһугар буолбатах. Мин саныахпар, тыа сирин оскуолалара бары агрооскуолалар буолуохтаахтар. Эбии бюджеттэн үбүлэнэн, үчүгэй база тэрийэн, тыа сирин хаһаайыстыбатын специалистарын бэлэмнииллэрин көҕүлээһин, өйөөһүн барыахтаах. Оҕону кыратыттан үлэҥэ үөрэтэргэ төһүү күүс буолуохтаах.
Тыа сирин предпринимателлэригэр ОДьКХ өҥөтө олус үрдүк. Чуолаан Ньурбаҕа. Дьокуускай тарыыбыттан 4 төгүл үрдүк. Биһиэхэ гаас да суох, үрдүк күүрүүлээх уоппут да суох, уонна атыттардааҕар биһиги коммунальнай өҥөбүт 4 төгүл үрдүк!

– Экономика министиэристибэтэ тарыыбы оройонунан араарыыны хаттаан көрүүһү, сүрдээх эбит дии.

– Михаил Осиповка (вице-премьер-экономика миниистирэ этэ) ити боппуруоһунан тахса сылдьыбыппыт киһибит быһаарсыбакка уурайда. Билигин саҥа миниистир итиннэ үлэлэһиэ диэн эрэнэбит.

– Итини сэргэ, коммунистар фракциялара Ил Түмэҥҥэ сэрии оҕолорун туһунан сокуон барыла киллэрэ сатыыгыт быһыылаах дии?

– Сэрии оҕолорун өйүүр сокуоммутун эмиэ төттөрү быраҕа туран баран, аны ааспыт Ил Түмэн мунньаҕар, Ил Дархан Егор Борисов көҕүлээһинэ буолан киирбитэ. Дьиҥинэн, ким аатынан сокуон киирэрэ суолтата суох, дьоҥҥо көмөлөстүн эрэ. Бюджет социальнай хайысхалаах диэн ааттанар буоллаҕына, социальнай программаларга харчы булгуччу көрүллүөхтээх.

– Оттон харчы суох буоллаҕына?

– Харчы хаһан элбэх диэбиттэрэй? Ханнык баҕарар государство оҕолорго уонна кырдьаҕастарга сыһыанынан сайдыыта быһаарыллар. Сайдыылаах, демократическай обществоны тутабыт диир буоллахпытына, ити икки хайысхаҕа, хара бастааҥҥыттан улахан болҕомто, үп көрүллүөхтээх. Араас шоуга, тэрээһиҥҥэ харчы бөҕө кутуллар дии, ама, аҕыйах ахсааннаах сэрии кэмигэр оҕо саастарын былдьаппыт кырдьаҕастарга көмө оҥоһуллуо суохтаах дуо? Биһиги туруорсар суумабыт оччо элбэх да буолбатах эбээт. Кып-кыра пенсияларыгар эбии төлөбүрү кинилэр тоҕо ылыа суохтаахтарый? Эбэтэр киһилии, дьоһун пенсия олохтоон баран, чэпчэтиилэри соттуннар, баһаалыста.

Аны пенсияҕа тахсар сааһы уларыта сатаан эрэллэр. Россияҕа орто олорор саас эр дьоҥҥо – 68, бу киһи пенсияҕа 65-гэр тахсар, үс сыл быыкаай пенсия ылар уонна? Бу бэйэ норуотун геноцидтааһын буолбатах дуо? Оччотугар госкорпорациялар топ-менеджердэрэ күҥҥэ (!!!) мөлүйүөнүнэн хамнастаналларын тоҕо тохтоппотторуй, 12-15 тыһыынча пенсиялаах боростуой дьон харчытын быһан “экономиялааһын” диэн тугуй?! Президент быыбарын иннинэ орто хамнаһы олох алын кээмэйигэр тэҥниибит диэн минньитэн баран, аны пенсияҕа тахсар сааһы 8 сылга сыҕарытаары гыннылар. Ити – норуот олоҕунан онньооһун буолар.

***

Прокопий ФЕДОРОВ,

“Туймаада” хаһыат,

1918с., от ыйын 5 күнэ.

Обсуждение • 6

Добавить комментарий
  1. Уолан

    Давыдовича поддержу, депутат от народа.

  2. Сунтар уола

    Арыгы атыылаан байбыт кпрф депутата.

  3. 101

    Кпрф дело уходящее! Как бизнесмен может быть коммунистом! Кпрф и бизнес имеют разные понятия разные платформы! Поэтому он не чистой воды коммунист!

  4. Мужик

    Онон-манан холуннарыман Давыдовиьы, Булуу болохторго биир дьоьуннаах уол кини!

  5. Большевик

    Видимо зависть человеческая затихла глаза, запомните, ничто человеческое нам не чуждо. И когда говорят что коммунист враг рынка, это показывает что человечек не разбирается в марксизме ибо марксизм не дома его надо развивать, учить общество котором живем а не видать в облаках и руководствоваться домами. Иннокентий Давыдович настоящий Марксист так как он КОММУНИСТ. А приспешники уйдете ВоН!

  6. Декабрист

    Интересное интервью. Во многом он прав(во всяком случае, нa словах). В то же время, видно что у человека кaша в голове, или он попросту хитрит.
    Скорее всего, второе.
    Что касается Сталина. Ясно что он oбеспечил модернизационный скачок в СССР, но жесточайшими методами. Ибо других в то время попросту не было. Но во что обошлось это стране, все должны понимать, в том числе и коммунисты. Ведь “Архипелаг Гулаг”,- это не одни выдумки Солженицына(хотя тот и сильно завышал число репрессированных), как хотят представить это сейчас многие коммунисты, особенно из руководства партии. Правда, и только правда, какой бы горькой oна ни была, способна вернуть доверие к коммунистам. Также не нравится населению заигрывания КПРФ с властью, закулисные различные договоренности. Хотя понять их тоже можно, партия нынче не так сильна, а нынешняя власть способна пойти “во все тяжкие”. Но как бы инстинкт самосохранения не “выдул” из партии коммунистов последние остатки оппозиционности, остатки уставных и программных целей и задач, а именно,- защита интересов трудящихся. А они,- эти цели и задачи, и так в значительной степени партией КПРФ утеряны.

Оставить комментарий