Курс валют
$
92.59
0.02
100.27
Курс валют
Курс валют
$
92.59
0.02
100.27
Меню
Поиск по сайту

«Өрөспүүбүлүкэ сайдыытыгар личность оруола” тиэмэҕэ лиэксийэ

24.07.2022 00:15 0
«Өрөспүүбүлүкэ сайдыытыгар личность оруола” тиэмэҕэ  лиэксийэ

Сыл устата Саха АССР тэриллибитэ 100 сылыгар анаммыт араас хабааннаах тэрээһиннэр ыытылла тураллар.

От ыйын 22 к., «Саха сирин Конгресс-киинэ” судаарыстыбаннай автономнай тэрилтэ үлэһитэ Анджелика Павлова уонна история билимин хандьыдаата, М.К.Аммосов аатынан ХИФУ историческай факультетын доцена, РНА Сибиирдээҕи салаатын Гуманитарнай чийчийии уонна хотугу аҕыйах ахсааннаах омуктар кыһалҕаларын институтун үлэһитэ, Геокултуурунай сайдыы институтун методиһа, СӨ Уопсастыбаннай палаататын чилиэнэ Айтал Яковлев Ньурбаҕа кэлэн үлэлээтилэр.

Ньурбаҕа А.Н.Чусовской аатынан техническэй лицей аактабай саалатыгар «Өрөспүүбүлүкэ сайдыытыгар личность оруола” тиэмэҕэ  лиэксийэ ыытылынна.  Тэрээһин улуус баһылыгын 1-кы солбуйааччыта Артур Яковлев истиҥ  эҕэрдэ тылынан аһылынна. Анжелика Павлова Саха сирин Конгресс-киинин аатыттан өйдөбүнньүк бэлэхтэри туттарда. 

Айтал Яковлев Саха сирин судаарыстыбаннаһа атаҕар туруутун, өрөспүүбүлүкэ сайдыытын сүрүн түһүмэхтэрин уонна инники кэскиллэрин туһунан, үөрэх уонна култуура сайдыытын, дьон күннээҕи олоҕун-дьаһаҕын кытта ыпсаран кыра  кылаас оҕолоругар кытта өйдөнүмтүө тылларынан лиэксийэтин дьон сэҥээрэ иһиттилэр, араас ыйытыылары биэрэн толору хоруйдары ыллылар. Лиэксийэ кыттыылаахтара «Конгресс-центр Якутия” сайтыгар Саха сиригэр тутулла турар эбийиэктэр, үйэ устатыгар Саха сирин салайан үлэлээбит 52 судаарыстыбаннай лиидэр тустарынан  иһитиннэриилэр баалларын истэн сэргээтилэр.  «Конгресс-центр Якутия” ГАУ сувенирнай оҥоһуктара көрдөрүүгэ турдулар.

СӨ Уопсастыбаннай палаататын чилиэнэ, учуонай Айтал Яковлевтан Ньурбаҕа бу сырыытын туһунан санаатын этэригэр көрдөстүбүт.

«Саха сирин Конгресс-киинэ” тэрилтэ тэрийиитинэн өрөспүүбүлүкэ улуустарын кэрийэн аһаҕас кэпсэтиилэри таһаара сылдьабыт, – диир Айтал Игоревич. – Оннук үлэлээн Чурапчыга, Тааттаҕа, Сунтаарга сырыттыбыт, онтон бу эһиэхэ кэллибит. Салгыы Үөһээ Бүлүүгэ барабыт. Сыалбыт-сорукпут – нэһилиэнньэни кытта көрсүһэн саха судаарыстыбаннаһын тула, саха судаарыстыбаннаһа диэн тугуй, саха норуота туох кэскиллээҕий диэн кэпсэтии таһаарыы. Бу эһиэхэ кэлэн саамай астыммытым – дьон сайыҥҥы былдьаһыктаах, элбэх түбүктээх кэм диэбэккэ, кэлэн лиэксийэбин сэҥээрэн иһиттэ, ыйыталаста. Чуолаан оскуола үөрэнээччилэрэ элбэхтэриттэн, чобуоларыттан үөрдүм. 2 кылааска үөрэнэр уолаттар улахан киһилии кэриэтэ толкуйдууллар, ыйытыктарга  хоруйдаһаллар. Улахан махтал Ньурба улууһун дьонугар. Итиэннэ бачча түбүктээх сайыҥҥы кэмҥэ бириэмэ булан дьону кытта көрсүһүүнү тэрийбит улуус салалтатыгар  истиҥ махталбын тиэрдэбин».

***

Геннадий АНТОНОВ

 

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»