Хачыгыр үйэтэ аастаҕа эбээт

Икки хонуктааҕыта Ньурба Күндээдэтигэр киһи үөрбэт быһылаана тахсыбытын туһунан социальнай ситимҥэ суруйаллар. Олохтоох фермер К. хотонугар үлэһит көрдүү сатаан баран, хантан эрэ ускул-тэскил сылдьар икки киһини аҕалан күүһүнэн үлэлэтэ сатаабыта биллэн улахан айдаан таҕыста.

Олохтоох дьахтар аудионан кэпсиир:

-Дьэ, табаарыстар ити кырдьык. Ити уол миэхэ киирбитэ, мин быыһаатым. Полицияҕа мин субуоннаабытым. Аны бүтүн Күндээдэҕэ 5 саҕана уоттаах мин эрэ үһү. Ол иһин эдэр уол хотоҥҥо тахсыбыта буолан баран куотан кэлбит, миэхэ киирбитэ. Ол сыапка сытааччыта кырдьаҕас киһи диэбиттэрэ. Ити уол буоллаҕына саҥардыы кэлбит, икки нэдиэлэ буолбут. Биир нэдиэлэ үчүгэйдик сылдьыбытым диир, иккис нэдиэлэттэн кырбаан киирэн бардылар диир. Ол иһин куоттум диэбитэ.

Полициялар 5.30 ыҥырбытым кэлэн быстыбаттар. Йоолка, дэлби ньиэрбинэйдээбитим. Ыксаан Биикэҕэ эҥин бары эрийэ сылдьыбытым, эн уолуҥ учаскобай дуо диэн. Ону уолум үөрэххэ диэбитэ. Били отдел чүөчэтэ төлөппүөммүн сыыһа суруйбут, аадырыспынан кэлэ туруохтарын. Ол сарсыарда 9.30 бииргэ кэлбиттэрэ. Мин 9.30 Ньурбалаабытым. Миигиттэн быһаарыы киэһэ ылбыттара.

Ити дьахтар тылыттан сылыктаатахха, ол киниэхэ күрээн кэлбит уол Ньургун диэн ааттаах, 21 саастаах, бэйэтэ Бэрдьигэстээхтэн сылдьар эбит. 21 сааһыгар, соцситимҥэ суруйалларын курдук,  “ускул-тэскил” сылдьар буоллаҕына иэдээн, букатын эдэр киһи буоллаҕа.

Фермердэр үлэһит илии тиийбэт диэн элбэхтик суланаллар. Ким да үлэлиэн баҕарбат диэн. Били Чурапчыга хотон көрө сылдьан 10 мөлүйүөнү сүүйбут киһи бэйэтэ эмиэ туспа нус-хас олоҕо суох, фермергэ наймыланан үлэлиир киһи этэ.

Ускул-тэскил сылдьааччылары урут хомуйан ылан ыраах үрэхтэргэ, арыыга быраҕан оттотоллоро. Биллэн турар, күүстэринэн. Сэбиэскэй саҕана ЛТП (лечебно-трудовой профилакторий) диэҥҥэ арыгыһыттары, наркоманнары хомуйан суут уурааҕынан күһэлэҥ үлэҕэ ыыталлара.

Аныгы кэмҥэ, уопсайынан, киһи киһини туохха баҕарар күүс өттүнэн күһэйэрэ бобуллар. Төһө да бомж буоллун, кини эмиэ, бастатан туран киһи буоллаҕа. Үлэһит тиийбэт дии-дии күһэйэн үлэлэтии сиэр-майгы да өттүнэн сүөргү. Ким да, кими да бас билэр бырааба суох. Арыгыһыт буоллун, хаамаайы буоллун. Хачыгырдар үйэлэрэ аастаҕа.

***

Aartyk.Ru

Лия Маркова уруһуйа