Курс валют
$
92.59
0.02
100.27
Курс валют
Курс валют
$
92.59
0.02
100.27
Меню
Поиск по сайту

Силиэстийэ тоҕо уһаата?

03.08.2022 19:25 4
Силиэстийэ тоҕо уһаата?

Былырыын күһүн, балаҕан ыйын 15 күнүгэр, икки кырачаан кыыс ийэтэ Татьяна Васильева (Симакова) 41 сааһыгар суол саахалыгар соһуччу олоҕо быстыбыта. Татьяна бэлэсипиэти тэбэринэн үлүһүйбүтэ хаһыс да сыла этэ. Кини тимир көлөтугэр олорон куорат суолларынан сылдьара,  кэрэ сирдэринэн наар күүлэйдиирэ. Ол күн бэлэсипиэтинэн күүлэйдээн баран Чочур Мыраантан дьиэлээн испитэ.

Жорницкай уонна Семен Данилов уулуссалар быһа охсуһууларыгар светофор күөх уотугар  пешеходнай переходунан бэлэсипиэтин үтэн туораан истэҕинэ, кинини суолу туораары ыксаан испит «Исузу» манипулятор суоппара тохтообокко тэпсэн ааспыта. Таня үрүҥ тыына тута быстыбыта. Ааһан иһэр дьон хас да туонналаах массыына тэпсибитин кэннэ, кыыһы, төлөпүөннэригэр  устан, тута социальнай ситиминэн тарҕаппыттара. Оттон бу күн Таня оҕолоругар, ийэтигэр, бииргэ төрөөбүттэригэр, аймахтарыгар, доҕотторугар ыар кэминэн, харах уутунан эргийбитэ.

Суруналыыстыка эйгэтэ эмиэ ыар сүтүктэммитэ. СИА өрөспүүбүлүкэ бырабыыталыстыбатын сайтыгар, Саха өрөспүүбүлүкэтин парламенын сайтыгар, «Ил Түмэн хаһыакка» араас сылларга таһаарыылаахтык үлэлээбит уопуттаах суруналыыс инникитин айымньылаах үлэтинэн олоҕу төһөлөөх киэргэтиэ эбитэ буолуой?! Татьяна СӨ суруналыыстарын сойууһун чилиэнэ этэ. Үрдүкү салалта кини айар үлэтин сыаналаан, Татьяна 2020 сыллаахха СӨ бэчээтин туйгуна буолбута.

Сыл буолан эрэр Татьяна соһуччу суорума суолламмыт күнүттэн. Ол эрээри холуобунай дьыала суукка тиийэ илик, силиэстийэ биллибэт биричиинэлэринэн  түмүктэммэт. Бу дьыаланы көрөр хас да следователь уларыйда. Татьяна чугас дьоно оннук быһыы-майгы баарыттан, биллэн турар, олус курутуйаллар.

«Танята суох сылбыт олус ыараханнык ааста. Холуобунай дьыаланы силиэстийэлээһин наһаа өр барда. Тоҕо эрэ дьыаланы көрөр следователь хаста да уларыйда. Аны, билигин кэлэн иккистээн автотехническэй экспертиза ыытар туһунан биллэрдилэр. Төһө да бастакы техническэй экспертизаҕа Таня суолу туораан истэҕинэ массыына инники бамперынан саайбыта быһаарыллыбытын үрдүнэн, иккистээн бэрэбиэркэни анаатылар. Ол түмүгэ хаһан оноһуллан кэлэрэ биллибэт. Суут буолуоҕар олус эрэнэр этибит, ол эрээри дьыаланы көрүүнү олус уһаталлар, эбэтэр уһата сатыыллар. Саамай киһи сөҕөрө диэн, ол саахалы уһулан хаалбыт ханна да видео суоҕа. Биһиги Танябытын бүтэһик суолугар атааран, күндү киһибитин сүтэрэн олус айманан, өмүттэн хаалан, уликалары хомуйуу туһунан санаабатахпыт», – диэн Таня бииргэ төрөөбүт балта Анна хом санаатын этэр.

Оттон саамай улахан охсууну Татьяна төрөппүт оҕолоро Лера уонна Кира ыллахтара эбээт. Кинилэр ол иэдээн тахсыбыт күнүгэр ийэлэрин киэһэни быһа кэтэһээхтээбиттэр.

«Эдьиийим кыргыттара төгүрүк тулаайах хааллылар. Мин иитиигэ ылбытым. Кыргыттар ийэлэрин күнүн ахсын ахталлар, санаабатах күннэрэ диэн суох. Кинилэр 13 саастарын туоллулар. Билигин төрөөбүт сирбитигэр-уоппутугар – Ньурба улууһун Дьаарханыгар баарбыт. Таня көмүс уҥуоҕун манна кистээбиппит. Барыахпыт иннинэ памятнигын туруоруохпут», –диэтэ Анна.

Биир аймах үүт тураан олоҕор эмискэ маннык ыарахан иэдээн тахсыбытын кэннэ, буруйдаах өттө –  «Исузу» массыына суоппара кинилэргэ тахса сылдьыбыта буолуо дуо?

«Суох, биирдэ да эрийбэтэҕэ да, кэлэ да сылдьыбатаҕа», – диэн балта элбэҕи быһаарбакка эттэ.

Татьяна чугас дьүөгэлэрэ, университекка бииргэ үөрэммит кыргыттара силиэстийэ бытааннык барарын кытары эмиэ олох сөбүлэспэттэрин биллэрэллэр.

«Танюбут былырыын соһуччу олохтон туораабыта. Бары истиҥ дьүөгэбитин олус суохтуубут. Дьулаан быһылаан тахсыбыта сыл буолан эрэр, ол эрээри силиэстибэ хаамыыта бытаан, дьыала өссө да суукка бара илик.

Туох да диэбит иһин, киһи өлүүлээх быһылаан иннэ-кэннэ быһаарыллыбакка, силиэстийэ уһаан-тэнийэн иһэрэ барыбытын ыгылытар.  Быһылааҥҥа быһаччы кыттыгастаах улахан массыына суоппара, туох да диэбит иһин, киһи тыыныгар турдаҕа уонна, ама, туох да буолбатаҕын курдук олорор, аһыыр, утуйар, күлэр-үөрэр дуо? Биирдэ да алҕас тулаайах хаалбыт оҕолор, Таню дьоно хайдах олороллор диэн сураһан да көрбөтүлэр. Чахчы суут-сокуон диэн баар. Онно сөбүлэһэбит. Буруйдаах диэн кытаанахтык бигэргэтэр кыахпыт суох. Ол эрэн, сокуон эрэ хараҕа буолбакка, киһиэхэ суобас диэн баар буолуохтаах. Бу сырыыга биһиги ону көрбөппүт… Өссө силиэстийэ хаамыытын буккуйан, уһатан,  айдаан намыраата диэн күлүктэригэр имнэнэн, ууттан кураанах тахса сатыыр буоллахтарына биһиги онно олох сөпсөспөппүт!!!  Дьүөгэбит барахсан орто дойду олоҕуттан инник соһумардык туораабытын, эмискэччи суох буолбутун күн бүгүҥҥэ диэри итэҕэйиэхпитин баҕарбаппыт. Олох чиэһинэй силиэстийэ, суут буоларыгар туруорсабыт!”– диэн санааларын эттилэр.

***

Сардаана КУЗЬМИНА.

 

Обсуждение • 4

Добавить комментарий
  1. Сардана

    Киһи олоҕо кэбирэҕин да иһин, буруйдаах эппиэккэ тардыллыахтаах!

  2. Маргарита

    Буруйдаах эппиэккэ тардыллыбатах!

  3. Маргарита

    Буруйдаах эппиэккэ тардыллыахтаах!

  4. Наталья

    Суут септеех миэрэни керуегэ диэн эрэнэбит!

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»