Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Саха сирин олохтоохторугар  “inDriver: От Якутска до Кремниевой долины” кинигэ PDF-версиятын бэлэх уунар

24.06.2020 17:14 1
Саха сирин олохтоохторугар  “inDriver: От Якутска до Кремниевой долины” кинигэ PDF-версиятын бэлэх уунар

Бэс ыйын 23 күнүгэр inDriver хампаанньа тэриллибитэ сэттис сылын бэлиэтиир. Билигин inDriver Саха сиригэр эрэ буолбакка, аан дойдуга киэҥник биллэр, дойдубутун аар-саарга ааттаттар. inDriver бу сыллар усталарыгар “ВКонтакте” социальнай ситимҥэ баар бөлөхтөн 31 дойдуга 300-тэн тахса куоракка үлэлиир бүтүн аан дойдутааҕы хампаанньаҕа кубулуйда.

Маунтин-Вью — Дьокуускай. Бүгүҥҥү туругунан inDriver сервиһинэн уопсайа 550 мөл. тахса сырыы оҥоһулунна, 49 мөл. киһи күннэтэ туһанар. inDriver үлэтин уратыта — айан усулуобуйатын суоппар уонна айаннааччы бэйэлэрэ хардарыта быһаарсаллар.

Хампаанньа олоххо көрүүтүнэн, өрө тутар сыаннастара аан дойду үрдүнэн үгүс киһини угуйда. Ол курдук билигин түөрт континенынан тоҕус офистаах, алта сүүс киһилээх хамаанда, ким буоларгыттан тутулуга суох, аҥаардас өйгүнэн, талааҥҥынан уонна дьаныардаах үлэҕинэн аан дойдуну тупсарыаххын сөп диэн дакаастыыр.

 Быйыл кулун тутар ыйга аан дойду үрдүнэн айаҥҥа сыһыаннаах саамай хачайданар сыһыарыылар икки ардыларыгар inDriver иккис миэстэҕэ таҕыста. Биир сыл анараа өттүгэр, 2019 сыл муус устар ыйыгар, inDriver бу испииһэккэ маҥнайгытын ахсыс миэстэҕэ тахсыбыта. Онтон от ыйыгар бэһис миэстэ буолбута, сэтинньигэ — төрдүс. Маннык улахан ситиһиини Саха сирин хампаанньаларыттан бастакынан ситистэ.

Былырыын Арсен Томскай “inDriver: От Якутска до Кремниевой долины. История создания глобальной технологической компании” диэн кинигэтигэр Ykt.Ru уонна inDriver хайдах тэриллибиттэрин сиһилии кэпсээбитэ, бүгүҥҥү үлэлэрин-хамнастарын сырдаппыта.

Кинигэ туһунан  Саха Өрөспүүбүлүкэтин маҥнайгы бэрэсидьиэнэ Михаил Николаев санаатын үллэстэр: “Хас биирдии көлүөнэ бэйэтэ туспа геройдаах, өрө тутар, ытыктыыр, үтүктэр дьонноох. Биир үксүгэр оннук дьон биитэр ханна эрэ ыраах олорор, биитэр урут олоро сылдьыбыт буолар. Кинилэр тустарынан биһи кинигэҕэ ааҕан, киинэҕэ көрөн эбэтэр дьон кэпсээниттэн билэбит, үөрэтэбит. Онтон Арсен Томскай биһиги кэммит киһитэ. Ону ааһан аныгы үйэ технологиятын туһанан эн кинини кытта кэпсэтиэххин, көрсүөххүн сөп”.

Саха сирин маҥнайгы бэрэсидьиэнэ бэйэтин алгыс тылын тиэрдэр бастатан туран эдэр туһаайар:

 “Хас биирдии киһи бэйэтин кыаҕар “мин маны кыайыам, сатыам суоҕа” диэн саарбаҕалыан сөп. “Атын, сайдыылаах дойдуга олорорум буоллар, атын буолуо этэ” диэн санаа баар буолааччы. Онтон бу маннык толкуйдаах киһи кинигэни ааҕан, санаата уларыйан, “үөрэннэхпинэ, саҥаны билэ сатаатахпына, кыһалыннахпына, мин даҕаны ситиһиилэниэхпин, ыра санаабын толоруохпун сөп эбит” диэн толкуйга кэлиэ диэн бүк эрэнэбин”.

Хампаанньа, төрүттэмитэ 7 сылын бэлиэтээн, Саха сирин олохтоохторугар  “inDriver: От Якутска до Кремниевой долины” кинигэ PDF-версиятын бэлэх уунар.

Манна даҕатан эттэххэ, ааптар Арсен Томскай “Альпина Паблишер” кинигэ кыһатын кытары дьон кинигэни интернеттэн босхо хачайдыырын туһунан эбии дуогабар түһэрсибитэ. Онон кинигэни indriverbook.ykt.ru/ сайтка буолуохха сөп.

Оттон өскөтүн билигин Саха сирин таһыгар баар буоллаххына, хачайдыыр кыаҕыҥ суох буоллаҕына, [email protected] почтаҕа суруйан кинигэ PDF-версиятын тутуоххун сөп.

Хампаанньа төрөөбүт күнүнэн эҕэрдэлиибит, inDriver-ы кытта бииргэ буоларгытын иһин  барҕа махталбытын тиэрдэбит!

Болҕойуҥ: кинигэ PDF-версиятын интернекка таһаарымаҥ, тарҕатымаҥ диэн көрдөһөбүт. Файлы Саха сиригэр баар дьон эрэ хачайдыан сөп диэн хампаанньа пресс-сулууспата иһитиннэрэр.

***

Күндү доҕоттор! Кырдьык саха норутугар, чуолаан ыччатыгар, дьоһуннаахай бэлэҕи оҥорбут киһибитигэр Арсен Томскайга махтаныаҕыҥ уонна кинигэни хайаан даа ааҕаргытыгар ыҥырабыт. Бэриллибит дьолуону мүлчү тутумаҥ, ааҕыҥ, санааҕытыҥ сааһылааҥ, элбэҕи билиҥ-көрүҥ, туһанын диэн ыҥырабыт.

Аан дойду таһымыгар тахсан ситиһиилээхтик үлэлии-хамсыы сылдьар, норуотун аатын ааттатар Арсен Томскайы – сахалар бастыҥ, киэн туттар киһибит  санаатын, уопутун, көрүүтүн, анаарыытын судургу, тиийимтиэ, тэтимнээх тылынан суруйбут.

***

Aartyk.Ru

Обсуждение • 1

Добавить комментарий
  1. Рио

    Томский молодец!

Оставить комментарий