Сааскы ыһыы үлэтэ саҕаланна

“Туймаада” Агрохолдинг хаһаайыстыбалара быйылгы ыһыы хампаанньатыгар тэрээһиннээхтик бэлэмнэн сылдьаллар. Ол курдук агрохолдинг  3392.1 га сиргэ ыһыы ыытыахтаах. Ити ааспыт сылы кытта тэҥнээтэххэ 386 гектарынан элбэх.

Биирдиилээн хаһаайыстыбаларынан ыллахха:

«Кладовая Олекмы» ХЭТ быйылгы сылга 755 га сиргэ ыһыылаах. Былаан быһыытынан 850 тн от бэлэмниэхтээх. Итини таһынан 2000 тн сиилэс уонна 1450 тн сенаж бэлэмнэниэхтээх.  Билиҥҥитэ 250 гектар бааһынаҕа хаар типтэрбиттэр. Былаан 335 гектарга хаар типтэриллиэхтээх.

Агрохолдинг биир улахан хаһаайыстыбата“Туймаада Экоферма” ХЭТ икки отделениенан турар. Ол курдук тэрилтэ Нөмүгүтээҕи отделениетыгар 830 гектарга , онтон Дьокуускайдааҕы салаатыгар 292,5 гектарга ыһыы ыытыллыахтаах.  Ол былырыыҥҥытааҕар  352 гектарынан элбэх. Бу хаһаайыстыба быйыл 2340 тн оту, 4400 тн сиилэһи уонна 420 тн сенаһы бэлэмниир санаалаах. Билиҥҥитэ 892 га бааһынаҕа хаар типтэрэр былааннааҕыттан 710 гектарга хаар типтэрбиттэр.

Онтон «Бөртө сылгы собуота» хааччахтаммыт эппиэтинэстээх тэрилтэҕэ 750 га сиргэ ыһыахтаах. Бу хаһаайыстыбаҕа сылын аайы элбэх от оттонор. Быйыл да от былаана элбэх. Ол курдук хаһаайыстыба 3000 тн от оттуур былааннаах. Итини таһынан 1900 тн сиилэс, 1175 тн сенаж бэлэмниэхтээх.

«Новай сопхуос» акционернай уопсастыба быйылгы сылга бааһынатын иэнин кэҥэтэн 414 гектарга тириэрдиэхтээх. Бу сылга тэрилтэ 300 тн от, 1750 тн сиилэс уонна 460 тн сенаж бэлэмниир соруктаах. Билиҥҥи туругунан былааннаммыт 200 гектарга хаар типтэрэн олорор.

Таатта улууһугар баар «Победа» ХЭТ ыһар бааһынатын кэҥэтэр соруктаах. Ол курдук быйыл 350 гектар иэннээх сиргэ ыһыы ыытыллыахтаах. Быйыл 1000 тн от, 400 тн сиилэс, 375 тн сенаж бэлэмниир сорук турар.

Бу сааскы хампаанньаны толорорго 412.8 тн сиэмэ, 247 тн минеральнай уоҕурдуу наада. Онтон хаһаайыстыбалар сүрүннээн эбиэс, подсолнечник, судан ото, кукуруза ыһар былааннаахтар. Ону тэҥэ элбэх сыллаах кострец диэн оту, олохтоох селекциянан таһаарыллыбыт травосмесь эмиэ ыһыллыаҕа.

Бааһыналары күрүөлээһин быйыл эмиэ барар. Ол курдук агрохолдинг хаһаайыстыбаларыгар уопсайа 29 км күрүө тутуллуохтаах.

Техниканы саҥардыы салҕанан барар. Быйыл кыалыннаҕына 18 техника араас көрүҥэ атыылаһыллыахтаах. Күүстээх К-742 тыраахтыр, Беларусь тыраахтырдар, сеялкалар, минеральнай удобрениены ыһар уонна соһуллар техника ылыллыахтаах.

Агрохолдинг бааһыналары чөлүгэр түһэрэр үлэтин сылын аайы ыытар. Быйыл уопсайа  436 га бааһына чөлүгэр түһэриллиэ уонна 244 га оттуур сир тупсарыллара былааннанар.

Онон агрохолдинг хаһаайыстыбаларыгар туруоруллубут сорук кырата суох. Билиҥҥитэ хаһаайыстыбалар бэлэмнэнии үлэтин кыра кыралаан саҕалаан эрэллэр. Сиэмэ, уоҕурдуу атыылаһарга кэпсэтии барар. Техниканы өрөмүөннүүр үлэ халлаан сылыйда да саҕаланыаҕа. Үлэһиттэр бу соругу толорорго бэлэмнэр.

***

Прокопий ХАБАРОВ