Оҕо сүрэҕэ – тааска

Клим Федоров бобуулаах ситимҥэ быһа эфир ыытар үгэстээх. Туристарын атааран баран саҥа туристарын кэтэһэ таарыйа, соҕотоҕун хаалан баран олоххо тахсыбыт түбэлтэлэри кэпсии-кэпсии сүбэ-ама биэрэр эбит. 

-Тыаҕа оҕонньордоох эмээхсин олорбуттар. Соҕотох уоллара куоракка кэргэннэнэн олорор, оҕолордоох. Биир дьыл оҕонньор эмээхсинэ ыалдьан өлөн хаалар. Оҕонньор кураанах дьиэтигэр аралдьыйара эрэ телевизор буолан соҕотоҕун олорон хаалар.

Кийиит дьахтар дьиэтин улаатыннарыах баҕаттан эрин сулуйан барар:

-Аҕаҥ дьиэтин, тэлгэһэтин атыылаатын ол харчытынан квартирабытын улаатыннарыахха, – диэн.

Уол “эс, хайдах?”  диэн бастаан аккаастанан көрбүтүн, оччоҕо тал: “Аҕаҥ дуу, мин дуу?!” – диэн ыгара-түүрэрэ элбиир. 

Уол икки уот икки ардыгар кыбыллар. Өрөбүллэргэ аҕатыгар тахсан этэр:

-Аҕаа соҕотох олороруҥ ыарахан, мин куорат икки дэриэбинэ икки ардыгар тиэстэрим эмиэ ыарахан, бу дьиэҕин атыылаан баран биһиэхэ киир, бииргэ олоруохха, – диэн. 

Оҕонньор бастаан буолуммат. Уол сотору-сотору аҕатыгар тиэстэн син биир тылыгар киллэрэр. 

Дьэ, оҕонньор дьиэтин атыылаан баран куоракка көһөрөн киллэрэллэр. Бастаан оҕонньору эһээ да, эһээ, аҕаа да, аҕаа диэн ханна олордуохтарын билбэттэр. Сыл ааһар, иһит-хомуос тыаһаан барар. Оҕонньор ону көрөр, истэр, хоһуттан да тахсара аҕыйыыр. Киниэхэ ким да наадыйбат буолар, аһылыкка да ыҥыраллара ахсааннаах буолар. Оҕонньор санаата эрэ: таах дьиэбин атыылаан, син олоруом эбитэ буолуо… 

Кийиит эригэр:

-Кини дуу, мин дуу, тал! Аҕаҕын кырдьаҕастар дьиэлэригэр биэр, кини кирин-хоҕун, иигин-сааҕын сууйартан сылайдым!

Уол эмиэ икки уот икки ардыгар түһэр. Онтон аҕатын хоһугар киирэн:

-Аҕаа, дьиэбитин ремоннаан эрэбит, эн икки нэдиэлэ интернакка киирэн эриэҥ дуо?

Аҕата:

-Ээ, хата ремоҥҥа мин илии-атах буолуом этэ!- диэхтиир. 

-Суох, аҕаа ремонт тыаһа-ууһа, быыла, кирэ-хоҕо бөҕө буолуо, биһиги эмиэ мантан атын сиргэ барабыт. Биригээдэ эрэ хаалар. 

Инньэ гынан аҕатын кырдьаҕастар дьиэлэригэр илдьэр. 

Оҕонньор онно хаалаары туран:

-Хаһан кэлиэххиний, тоойуом?

-Икки нэдиэлэнэн, – уонна уола ааны букатыннаахтык сабан тахсан барар. 

Интернат үлэһиттэрэ кэлин киирбит кырдьаҕастара аан аттыгар түннүгү манаан олорорун өйдөөн көрөллөр:

-Бу аан үрэрэ, үрдэриэҥ, хоскор киирэн сыт. 

-Ээ, оҕобун күүтэбин, кэлиэх буолбута. 

Сол курдук хас да сыл тухары оҕонньор уолун кэтэһэн түннүгү одуулаан олороохтуур…

***

Источник – Блог Туйаары Нутчиной