Ийэҕэ уонна Аҕаҕа – иэгэйэр икки атахтаах сүгүрүйдүн үйэ тухары

Хас биирдии киһиэхэ саамай күндү дьонунан ийэлээх аҕаҥ буолар. Күн сирин көрдөрбүт, олох олорорго үөрэппит, кыра ыллыктан улахан айан аартыгар сиэтэн таһаарбыт дьон кинилэр. Олоҕуҥ устатын тухары сылаас тыыннарынан, саҥата суох эрэллэринэн аһына-харыһыйа сылдьар кинилэр эрэ буолаллар. Хас да саастан ийэҥ иһэҕин суохтуугун, аҕаҥ тапталын ахтаҕын. Аттыгар баалларына атаахтаан ылыаххын баҕараҕын, оттон бардахтарына  сүрэҕиҥ нүөлүйэн саҥата суох кинилэрдиин кэпсэтэҕин.

Ийэлээх аҕа тапталыгар улаатыы киһиэхэ эрэ бэриллибэт улуу дьол. Бука ханнык эрэ өбүгэҥ үтүөнү оҥорбута дьайан, эбэтэр ааспыт олоххор тугу эрэ туһалааҕы оҥорбутуҥ аахсыллан итинник дьолго түбэһэриҥ буолуо.  Онон дьылҕабытыгар ээр-сэмээр махтаныах тустаахпыт – маанылаабытыгар, күндү бэлэҕи оҥорбутугар, Орто дойдуга бигэтик үктэнэрбитигэр чиҥ тирэх биэрбитигэр, сайдарбытыгар, үүнэрбитигэр сирдьит сулус тыктарбытыгар. Ону сыаналыаҕыҥ, күндүтүк ылыныаҕыҥ. Ийэҕэ уонна Аҕаҕа сүгүрүйүөҕүн, өрүү кинилэри өрө тутуоҕуҥ, махталлаах уонна тапталлаах буолуоҕуҥ.

***

Aartyk.Ru