Үөһээ Бүлүүгэ – “Дойду кэһиитэ” акция

Бу күннэргэ Үөһээ Бүлүү үрдүнэн үгэскэ кубулуйбут “Дойду кэһиитэ” акция ыытылла турар. Аҕа дойдуну көмүскээччилэр күннэрин көрсө төрдүс сылын Арассыыйа армиятын кэккэтигэр сулууспалыы сылдьар биир дойдулаах эдэр армеецтарга эҕэрдэ сурук, кэһии, баһыылка барар. Акцияны улуустааҕы дьиэ кэргэн отдела иилээн-саҕалаан, тэрийэн ыытар.

Улуус үрдүнэн барыта 73 уол Армия кэккэтигэр сулууспалыы сылдьар. Хас биирдии нэһилиэк “Дойду кэһиитэ” акцияны сүрэхтэрин сылааһын ууран туран тэрийэр. Ол курдук, Үөдүгэй нэһилиэгиттэн Араассыыйа араас муннугар сулууспалыы сылдьар 10 армеецка, инники кэскиллэрбитигэр, нэһилиэк баһылыга Валерий Васильев-Муттуххай Бороҥ “Үүт тураан” диэн саҥа бэчээттэнэн тахсыбыт бэйэтин кинигэтин хас биирдиилэригэр ааттаан-суоллаан, анаан алгыс суруйан, баҕа санаа бастыҥын тиэрдэн бэлэхтээтэ.

Ону тэҥэ дойдуларын устуоруйатын сырдатар – Үөдүгэй нэһилиэгэ Ыраахтааҕыттан бэчээт ылбыта 250 сылыгар аналлаах блокноту, Үөдүгэй нэһилиэгин өрөгөйүн ырыатын, уруучуканы, оҕо саастарын санатар минньигэс арааһын уган ыыттылар.

Дойдуларыттан сабыс-саҥа тэлэһийэн, Армия кэккэтигэр сулууспалыы сылдьар уолаттарбытыгар ахтылҕаннаах дойдуларыттан, дьонноруттан анаан-минээн кэһии, сурук кэлэрэ туохтааҕар да күндү ! Эркин курдук эрэнэр ыччаппытыгар, араҥаччылыыр дьоммутугар эрэлбит улахан!

***

Валентина ФИЛИППОВА