Үөһээ Бүлүү улууһугар быйыл 34,5 км усталаах уот ситимэ өрөмүөннэниэҕэ

Бу күннэргэ Үөһээ Бүлүүтээҕи электростанцияҕа уот ситимин капитальнай өрөмүөнүгэр анаммыт остуолба мастара кэллилэр. Ленскэй куораттан «Юпитер» хааччахтаммыт эппиэтинэстээх тэрилтэтэ 376 маһы тиэйэн аҕалла. Өссө биир бачча мас эбии кэлэрэ күүтүллэр.

2021 сылга уот ситимин капитальнай өрөмүөнүгэр анаан 493 куб энерголес Ленскэй куораттан кэлиэхтээх. Уопсайа, былаан быһыытынан, 34,5 км уһуннаах уот ситимэ өрөмүөннэниэхтээх.

Бу туһунан улуустааҕы электростанция кылаабынай инженерэ Анатолий Чуруков маннык кэпсээтэ:

– Уопсайа 353 баҕана уларыйыахтаах. Итиэннэ 20 км уһуннаах уот ситимэ СИП проводка уларытыллыахтаах. Ону таһынан күүскэ туруорсаммыт, үп-харчы көрүллэн, подряднай ньыманан 110 киловольтаах ситим Ньурба – Үөһээ Бүлүү, 35 киловольтаах Оҥхой – Далыр, Үөһээ Бүлүү – Өргүөт ситимнэригэр өрөмүөн барыахтаах. Бу кэмнэргэ уоту араары, мэлдьи буоларын курдук, буолуоҕа. Уот ситимэ өрөмүөннэннэҕинэ эрэ харгыс тахсыбатын нэһилиэнньэ өйдүөх тустаах.

Кулун тутар уонна муус устар ыйдарга 110-наах уонна 35 кВ кыамталаах уот ситимэ өрөмүөннэнэрэ былааҥҥа киирэн турар. Оттон 10-наах уонна 0.4 Кв кыамталаах ситим сыл устата кыра-кыралаан өрөмүөннэнэ туруохтаах.

***

Кристина Яковлева