Виталий Очиров Дьокуускай куоракка уонна Бүлүүгэ «КҮММЭР» дьоро түһүлгэтин тэрийдэ

Кулун тутар 7 күнүгэр Суорун Омоллоон аатынан Опера уонна балет театрыгар, өтөрүнэн буолбатах, «КҮММЭР» диэн  Виталий Очиров дьоро түһүлгэтэ, 17ч., 19 ч. буолан ааста. Ол тухары дьон лыык курдук толору тоҕуоруһан, туох эрэ дьиктилээх түгэни күүтэн олордулар. 

Кэнсиэр атыттартан уратытык, таҥыллыбыт буолан биэрдэ. Таатта Харбалааҕыттан төрүттээх, сахалыы куттаах-тыыннаах ырыаһыт, Виталий Очиров дьоро түһүлгэтин олоҥхоттон саҕалаабыта, онтон тойук, оһуохай сыыйа дэгэрэҥ ырыалар, онтон эрчим ылан аныгылыы тэтиминэн: «Күн киһим», «Айыыларым арчылааҥ», «Ыллыктар», «Мичилий мичилий» уостан түспэт, норуот кутун туппут ырыаларынан көрөөччүлэрин олус дуоһутта, долгутта. Бу кэрэ иэйиилээх ырыаларга уйдаран, Виталий кэргэнэ кырачаан уолларын көтөҕөн сыанаҕа тахсыбытын көрөөччүлэр иһирэх, сырдык мичээринэн, ытыс таһыныытынан көрүстүлэр. Эдэр дьиэ кэргэн оҕолорун көтөҕөн, үс буолан аҕаларын ырыатыгар уйдаран, алгыстаах киэһэлэрин үүнээри турар кэрэ аҥардар бырааһынньыктарын көрсө бэлэх ууммуттара олус кэрэхсэбиллээх. Элбэх киһи ытыстарын таһыналларын быыһыгар тэҥҥэ ыллаһа олордулар. Аны бииргэ төрөөбүт быраата Кеша Васильев тахсан эмиэ тыыппалаах куоластааҕын иһитиннэрэн, ыллаата-туойда. Ырыаһыт уолаттар Күн күбэй ийэлэрэ, СР культуратын туйгуна Светлана Очирова тахсан уолаттарын эҕэрдэлээн, сахалыы үнүстүрүмүөннэр тыыннаах дорҕооннорунан доҕуһуоллатан ыллаан дьиэрэппитэ истиэххэ олус кэрэ этэ. Кэнсиэр баһыттан атаҕар диэри дохсун ытыс тыаһынан ньиргийэн олордо.  Дьон-сэргэ кутун туппут ырыалар, атыннык эттэхэ «хит» буолбут ырыалар бу дьоро киэһэҕэ алгыстаах, арчылаах, долгуннара көрөөччү сүрэҕэр өргө диэри дириҥник иҥэн, бу уустук олоххо араас тургутуулары туоруурга кынат анньан, сахалыы сүр көтөхпүттэригэр толору эрэнэбин. 

Бу дьоро түһүлгэни иилээн-саҕалаан Дьокуускай куорат культуура коллеһын дириэктэрэ, эрчимнээх, саҥалыы айар көрүүлэрдээх, кэскиллээх киһи Захар Николаевич Никитин дьоһун режиссуратын, үрдүк таһымнаахтык туруорбутун бэлиэтиир тоҕоостоох. Киниэхэ кынат буолан Алена Гаврильевна Павлова колледж үҥкүү бөлөҕүн салайааччылаах «Күн өркөн»  80-ча үҥкүүһүт  оҕолор биир тэҥҥэ үҥкүүлээн тэйдилэр. Дьоро киэһэ саҕаланыаҕыттан бүтүөр диэри кэнсиэр тэтиминэн дьүөрэлии туттан, таҥнан киэһэни олус киэргэттилэр. Маны сэргэ эмиэ колледж уһуйааччыта, (Виталийы үөрэппит, такайбыт)  Мария Гаврильевна Боппойонова дьарыктыыр «Эйгэ» сиэр-туом, алгыс  бөлөҕө Сэргэ туруоруутун, көрөөччүлэргэ саала былаһын тухары ситиигэ салама баайтарыытын, сүктэр кыыс, араас сиэри-туому киллэрбиттэрэ сонун буолла. Хас биирдии көрөөччү алгыс санаан баайбыт өҥнөөх кырадаһыннардаах саламата сыанаҕа төннөн, хас биирдии киһи алгыһынан илгийдэ. 

Ити курдук олус иһирэх, эмиэ да соргулаах, сүрү көтөҕөр ырыаларынан сахатын дьонугар алгыстаах олоҕу арчылыыр Виталий Очиров бэйэтин барҕа махталын көрөөччүлэригэр, үөрэммит кыһатын дириэктэригэр Захар Никитиҥҥэ уонна колледж преподавателларыгар эттэ. Кини бу орто дойдуга күндүттэн күндү Күнэ кэргэнэ, өр сыл кэтэһэн кэтэһэн күн сирин көрдөрбүт уоллара уонна биллэн турар Күн күбэй  ийэтэ буолар. Онон  «Күммэр», -диэн ааттаах дьоро түһүлгэ олус астыктык, сэргэхтик буолан ааста.  Ол курдук айылҕаттан айдарыылаах, сахалыы куттаах киһибит Виталий Очиров алгыстаах айан аартыгын тутан, Бүлүү бөлөх улуустарыгар гостроллуу аттаммыта. 

Бэрдьигэстээххэ ситиһиилээхтик кэнсиэрдээн баран, сарсыҥҥытыгар кырдьаҕас Бүлүү куоратыгар, толору залга кэнсиэрин ортотугар тиийиитэ, таһырдьа кубулҕаттаах кулун тутар обургу добун буурҕаны түһэрбит. Кэнсиэртии турар саалатын иһигэр кытары аргыйан ааһыталаабыт. Ону кытары уоттара баран хаалбыт. Көрөөччүлэр телефоннарын фанаарын холбообуттар. Виталий ороһуйбакка эт куолаһынан олоҥхолоон, тойуктаан доллоһуппут, хоһоон аахпыт, айар үлэтин туһунан кэпсээн кэккэлэппит. Ол кэмҥэ кулууп үлэһиттэрэ Уйбаан Уйбаанабыс Тулааһынабы, байааннаах булан аҕалбыттар. Дьэ доҕоор байаан алыптаах, тыыннаах дорҕооно саала иһин кэрэтик тыаһаан толорон кэбиспит. Өрүү улахан тыас-уус, уот-күөс, ньиргиэр курдук буолуо дуо, байаан тыаһа барахсан. Оттон Виталий микрофона суох эт куолаһынан ырыаларын биир биир көрөөччүлэр дохсун ытыстарын тыаһынан доҕуһуоллатан ыллаан, кылыһаҕа истээччилэр куттарын туппут. Бу манна даҕатан эттэххэ Уйбаан Тулааһынап байаан профессора буоларын дьиҥ-чахчы Бүлүүтүн дьонугар бигэргэтэн, улахан биһирэбили, хайҕабылы ылыан ылбыт. Кырдьаҕас Бүлүү куората аны дирбиэнтэн сылайбыттыы, истиҥ тыыннаах музыкаҕа доҕуһуолламмыт ырыалары истэн, тыала намыраан, уолларыгар алгыстаах үтүө дьоро киэһэни анаабыта мээнэҕэ буолбатах. Ол Виталий Үрдүк Айыылартан ситимнээҕин туоһулуур. Кини ырыалара олоххо тапталы, дьулууру арчылыыллар, алгыыллар.

Соргу дугуй, сайдам Саха! Олоххо суолуҥ алгыстаах буоллун! Сахаҥ туһугар туруулас, инники хардыыҥ чиҥээн, олугуҥ улаатан истин!

***

Василий Гоголев –Уйулҕан.