Бүгүн кини үйэ аҥардаах үбүлүөйүгэр сөп түбэһиннэрэн С.А. Зверев – Кыыл Уолун аатынан норуот айымньытын түмэлигэр “Олоҕум кустугун өҥүн тиһэммин” айар быыстапката олус истиҥ, сылаас эйгэҕэ тэрилиннэ. Быыстапканы Людмила Пустолякова – Дьэрэлийэ Күндээр иилээн-саҕалаан ыытта. Ону тэҥэ, Сунтаардааҕы оҕо ускуустубатын оскуолатын уһуйуллааччылара эҕэрдэ нүөмэрдэринэн киэргэттилэр.
Маргарита Маратовна күүстээх санаатынан олоххо тардыһыыта оҕо сааһыттан көстөр. Ол курдук 8 сааһыгар хаампыт кыысчаан билигин дьонтон туох да итэҕэһэ суох кэрэни, сырдыгы саҕа сылдьар, тапталлаах кэргэн, икки оҕо амарах ийэтэ буолар. Ону ааһан СӨ уус-уран оҥоһуктарын маастара уонна Сунтаар улууһун норуотун маастара үрдүк бэлиэ хаһаайката. Онон, быыстапка аата да этэринии Маргарита Маратовна олоҕо кустук араас өҥүнэн киэркэйэр диэтэхпитинэ сыыспаппыт буолуо. Кининэн киэн туттар, холобур оҥостор дьон үгүс.
Оттон айар үлэ умсулҕаныгар суол тэлбит киһинэн – таайа Илья Васильевич Спиров буолар. Ол курдук кини Маргарита кыра сырыттаҕына, уруһуйдуурун таба көрөн, харандаас ылан биэрэн кыыс дьоҕура өссө сайдан, кэҥээн испит эбит. Күн бүгүн Маргарита Маратовна таайыгар муҥура суох махталлаах.
Бүгүҥҥү Маргарита Спирова – Уран Куо айар быыстапката тэриллибит тэрээһинигэр олус элбэх ыалдьыт тоҕуоруһа мустан, үөрэн-долгуйан туран эҕэрдэ тыл маанытын эттилэр. Кини сөҕүмэр элбэх айан-тутан таһаарбыт оҥоһуктарын, быысапка хартыыналарын, араас таастан оҥоһуллубут киэргэллэрин уо.д.а. сэргии-сэҥээрэ көрдүлэр.
Елизавета ТИТОВА
Оставить комментарий