Тыа хаһаайыстыбатын уонна астыыр-таҥастыыр салаа 2024 сыллааҕы түмүгүн таһаардылар
Саха Өрөспүүбүлүкэтин тыатын хаһаайыстыбатын уонна астыыр-таҥастыыр салаатын ааһан эрэр сылга үлэ түмүктэрин таһаарар мунньаҕа буолла. Дьоро көрсүһүү бырабыыталыстыба бэрэссэдээтэлин солбуйааччы Сергей Местников иһитиннэриититтэн саҕаланна. Кини тыа хаһаайыстыбатын салаата өрөспүүбүлүкэҕэ эрэ буолбакка Россия судаарыстыбаннай бэлиитикэтин систиэмэтигэр болҕомто киинигэр сылдьарын эттэ. Сергей Васильевич олохтоох оҥорон таһаарар тэрилтэлэр бородууксуйалара үксүүрэ – үлэ сүрүн соруга буоларын бэлиэтээн туран, Саха Өрөспүүбүлүкэтин судаарыстыбаннай наҕараадаларын бу салаа бастыҥ үлэһиттэригэр үөрүүлээх быһыыга туттарда.
«Саха Өрөспүүбүлүкэтин тыатын хаһаайыстыбатын үтүөлээх үлэһитэ» Бочуоттаах ааты Амма улууһун «Болугур» кэпэрэтиип сылгыһыта Николай Кожуров, Саха Өрөспүүбүлүкэтигэр сири оҥоруу сулууспатын административнай-хаһаайыстыбаннай чааһын инженерэ Иван Стручков ыллылар.
«Гражданскай килбиэн» туйгун бэлиэ Саха Өрөспүүбүлүкэтин тыатын хаһаайыстыбатын туйгуна Саргылана Петроваҕа, Саха Өрөспүүбүлүкэтигэр сири оҥоруу сулууспатын салайааччыта Афанасий Семеновкаананна.
Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов ааһан эрэр сылга өрөспүүбүлүкэ парламена тыа хаһаайыстыбатыгар сыһыаннаах сокуоннары ылыныыга, бэрээдэктииргэ ыыппыт үлэтин сүрүн түгэннэрин кэпсээтэ:
«Бырабыыталыстыбаны, министиэристибэлэри кытары бииргэ үлэлэһии түмүгэр 2024 сылга тыа хаһаайыстыбатын сайдыытын судаарыстыбаннай программата 15 740 000 солкуобай үбүлэммитэ. 2025 сыллааҕы бүддьүөтү ылыныыга бастакы ааҕыыга 8 023 467 солкуобай үп көрүллүбүтэ. Иккис ааҕыыга Саха Өрөспүүбүлүкэтин Бырабыыталыстыбатын уонна бастатан туран, Ил Дархан А.С. Николаев, Ил Түмэн бэрэссэдээтэлэ А.И. Еремеев өйөбүллэринэн үбүлээһин биллэ улаатан 15 315 000 солкуобай буолла. Бары билэҕит, Ил Түмэн онус уочараттаах пленарнай мунньаҕар олохтоох бэйэни салайыныы уорганнарыгар тыа хаһаайыстыбатыгар сыһыаннаах туспа боломуочуйаны биэрии биир сүрүн боппуруоһунан буолбута. Бу сокуоҥҥа олоҕуран, олохтоох салайыныы уорганнара тыа хаһаайыстыбатын оҥорон таһаарыытын сайыннарыы тумус тутуллар хайысхаларын уонна өйөбүл кээмэйин учуоттаан бэйэлэрэ быһаарар бырааптара уонна эбээһинэстэрэ кэҥээтэ. Бу ньыма тыа хаһаайыстыбатын сайдыытыгар сонун сүүрээни, саҥа саҕахтары арыйыа диэн эрэнэбит”.
Александр Павлович дьоро көрсүһүүгэ өрөспүүбүлүкэ социальнай-экономическай сайдыытыгар өҥөлөрүн иһин Ил Түмэн Судаарыстыбаннай Мунньах Бочуоттаах грамотатынан Дьокуускай куорат сүрүн агрономун Егор Андреевы, Саха Өрөспүүбүлүкэтин бэтэринээрийэҕэ салалтатын аҕа инспиэктэрин Оксана Харитонованынаҕараадалаата. Ону сэргэ Парламент тыа сиригэр уонна аграрнай бэлиитикэҕэ сис кэмитиэтин Бочуоттаах грамотатын Горнай улууһун “Горнай-Ас” кэпэрэтиип үүтү тутааччытыгар Валентина Колесоваҕа туттарда. Итиэннэ норуот депутата тыа сиригэр уонна аграрнай бэлиитикэҕэ сис кэмитиэт махтал суругун Уус Алдан улууһун “Бороҕон нэһилиэгэ” бааһынай хаһаайыстыба баһылыгар Виталий Васильевка, Мэҥэ Хаҥалас улууһун Мэлдьэхси нэһилиэгин “Томтор” ХЭТ дириэктэригэр Денис Жирковка, Мэҥэ Хаҥаластааҕы бааһынай (фермерскэй) хаһаайыстыба баһылыгар Власий Петровка биэрдэ.
Ааһан эрэр сыл түмүктэрин таһаарар мунньахха Саха Өрөспүүбүлүкэтин тыатын хаһаайыстыбатын уонна ас-үөл бэлиитикэтин миниистирэ Артем Александров 2024 сыл бэлиэ түгэннэрин билиһиннэрдэ итиэннэ бу салааҕа сыралаахтык, таһаарыылаахтык үлэлиир, өрөспүүбүлүкэ сайдыытыгар сүдү кылааттарын киллэрэр туруу үлэһит дьоҥҥо Россия, Саха сирин наҕараадаларын туттарда.
***
Ил Түмэн пресс-сулууспата
Оставить комментарий