Төҥүлүгэ дьарыктаах буолуу сулууспатын кэбиниэтэ аһылынна

Мэҥэ Хаҥалас улууһун нэһилиэнньэ дьарыктаах буолуутун киинэ быйыл Майаҕа төттөрү көһөн кэлиэҕиттэн, өссө биир дьоһун дьаһалы ылынна. Сэтинньи 28 күнүттэн Төҥүлү нэһилиэгэр киин туспа кэбиниэтэ үлэтин саҕалаата. Ол иннинээҕи күн кэбиниэти аһыы сэмэй тэрээһинэ буолан, Төҥүлү уонна Доллу нэһилиэктэрин баһылыктара киин дириэктэрэ Прокопий Марковтыын кыттыыны ылбыттара. Дойду нэһилиэгин хабан туран, улуус хоту эҥэригэр алта нэһилиэк олохтоохторугар дьарыктаах буолуу киинин өҥөтүн оҥорор кэбиниэккэ II категориялаах иниспиэктэр Дьулустаан Анатольевич Шеломов үлэлиир буолар.

Мэҥэ Хаҥалас улууһун Дьарыктаах буолуу киинэ үлэтигэр саҥа сүүрээни киллэриниитэ салайааччыта Прокопий Васильевич дьулууруттан уонна үлэтигэр айымньылаах сыһыаныттан, дьон-сэргэ, салайааччылар баҕа санааларыгар, этиилэригэр утары кэлэргэ бэлэмиттэн улахан тутулуктааҕа өйдөнөр.

Улуус кииннэриттэн ‒ муниципальнай киинтэн Аллараа Бэстээхтэн уонна устуоруйа, култуура, экономика өттүнэн кииниттэн ‒ Майаттан ыраах сытар нэһилиэктэр баһылыктара ‒ Гаврил Данилов (Төҥүлү), Николай Сивцев (Доллу), Дмитрий Никитин (Араҥас), Александр Куприянов (Мэҥэ), Иннокентий Андросов (Мөҥүрүөн), Сергей Сергучев (Дьабыыл) уонна Федор Федоров (Дойду) тус бэйэлэрэ өрөспүүбүлүкэ уонна улуус салалталарын иннилэригэр туруорсууларынан, улуус баһылыга Николай Старостин өйөбүлүнэн улахан социальнай суолталаах кэбиниэт олох чахчытынан буолла. Кэбиниэккэ анаан хоһу Төҥүлү нэһилиэгин дьаһалтата туран биэрдэ уонна миэбэлинэн хааччыйда. Мантан инньэ дьарыктаах буолуу киинин үлэтэ хоту эҥэр оперативнай таһымҥа киирдэ диэн сыаналыахха сөп.

Мэҥэ Хаҥалас улууһун нэһилиэнньэ дьарыктаах буолуутугар киинэ үлэтинэн-хамнаһынан өрөспүүбүлүкэ 35 киинин ортотугар биир инники күөҥҥэ сылдьар тэрилтэ быһыытынан биллэр. Билигин барыта 10 киһиттэн турар кэлэктиип айымньылаахтык уонна кыһамньылаахтык үлэлиир-хамсыыр. Киин үлэтин өрөспүүбүлүкэ нэһилиэнньэ дьарыктаах буолуутугар судаарыстыбаннай кэмитиэтэ, салалтата ‒ бэрэссэдээтэл Степан Москвитин уонна солбуйааччыта Гаврил Харлампьев өйүүллэр уонна судаарыстыба өҥөлөрө нэһилиэнньэҕэ чугас уонна түргэнник тиийимтиэ буолалларыгар туһуланар кыһаллыыларын үтүө холобур быһыытынан бэлиэтииллэр.

***

Ааптар: Аркадий ИННОКЕНТЬЕВ.