ТАБАҺЫТ ВЯЧЕСЛАВ КОЛЕСОВ

Эбээн Бытантай улууһа биир туһунан айылҕалаах,  адаар таас хайалар быыстарыгар хоту дойду талыы-мааны кыыла таба таптаан үөскүүр киэҥ нэлэмэн алыылардаах кэрэ көстүүлээх дойду. Манна олохтоох дьон табаны таҥара оҥостон, төрүт үгэстэрин таба иитиитин кытары ыкса тутан баччааҥҥа диэри тутан кэллилэр.

Вячеслав Колесов эдэр киһи. Манна баар “Кочевник ” таба иитиитинэн дьарыктанар родовой общинаҕа кэлэн үлэлээбитэ биэс сыл буолла. Биэс сыл кыра курдук эрээрикини олох оҕо эрдэҕиттэн ыстаадаҕа улаатан таба курдук ураты билиини-көрүүнү ирдиир салааҕа сыстан үлэлээбитэ ырааппыт: “Мин аҕам, эһэм бары табаһыт дьон. Ол иһин оҕо эрдэхпиттэн кинилэри батыһа сылдьан улааппыт буолан, табаны көрүүттэн ураты атын дьарыгы көрбөппүн. Биһиги дьиҥинэн Булунтан көһөн кэлэн бу улууска олохсуйбуппут. Аҕам билигин настаабынньык, табаныкөрүү хаһан да бүппэт кистэлэҥнэрдээх, ол иһин биһиэхэ кырдьаҕас, саастаах табаһыттар бааллара үлэбитигэр олус наадалаах. Общинаҕа билигин табабыт элбээн 4000-ҕа тиийдэ. Биһиги ыстаадабытыгар 2000 табаны көрөбүт,” – диэн Вячеслав кэпсиир.

Ыстаада үлэһиттэрэ үксүлэрэ сырыыны-айаны кыайар эдэр уонна орто саастаах дьон. Община бастаан тэриллэригэр 800 кэриҥэ табалаах буоллаҕына билигин 4000 төбөҕө тириэртилэр. Итини ситиһии элбэх үлэттэн, сыраттан тахсарын этэ да барыллыбат. Үчүгэй көрдөрүү. Ол да иһин бүтүн өрөспүүбүлүкэ табаһыттара родовой община салайааччытын Альберт Колесовы бу күннэргэ ыытыллыбыт табаһыттар 4-с съезтэрин сүрүн мунньаҕар  Өрөспүүбүлүкэ табаһыттарын союһун бэрэссэдээтэлинэнталлылар. Вячеслав эдэр дьону табаҕа сыһыаран үлэлэтии туһунан төһө да эдэрин иһин муударай көрүүлээх:  “Оҕо эрдэҕиттэн табаҕа сыстан, кинини батыһа сылдьан улааппыт киһи табаһыт буолар кыахтаах. Биһиэхэ үлэлии кэлбэттэр диир кыахпыт суох, кэлэллэр. Ол гынан баран үксүлэрэ киэҥ сиргэ төннөллөр. Онон оҕону кыра эрдэҕиттэн табаҕа сыһыаран илдьэ сылдьыахха наада, оччототугар хайдах буолуо эбитэй”- диэн ырааҕы, дириҥи көрөрдүү одууласта.

Табаһыттар өрөспүүбүлүкэтээҕи съезтэрин биир кэрэхсэбиллээх тэрээһинигэр күрэхтэһии уопсай түмүгүнэн Эбээн Бытантайдар бастакы миэстэни ылан өрөгөйдөрө улаатта. Онон саамай улахан бириискэ Урал массыына хаһаайыннарынан буоллулар. Итини тэҥэ күрэхтэһии араас көрүҥнэригэр бириистээх миэстэлэргэ тиксэн икки Бураны ылан бастыҥнарын көрдөрөн үөрүүлэрэ улаатта. Бу икки Бурантан биирдэстэрин Вячеслав комбинированнай күрэххэ бастаан ылары ситистэ.  Буран күлүүһүн  «Туймаада» Агрохолдинг АУо туруоран кыайыылаахха генеральнай дириэктэри бастакы солбуйааччы Гуляев А.А. үөрүүлээх быһыыга-майгыга туттарда. Манна эбэн эттэххэ агрохолдинг тыа хаһаайыстыбатын салаатыгар ыытыллар элбэх тэрээһиннэргэ кыттан сити курдук тыа сирин үлэһит дьонун өйүүрүн биллэрэ турар.

Вячеслав урукку сылларга слеттарга кыттан Буран курдук наҕараадаҕа хаста да тиксэн турардаах. Ол да иһин ити курдук кыайыылары хайдах ситиһэрин ыйыттахха: «табаны биһиги анаан дьарыктыыбыт, Элбэх көлүүр табалаахпыт. Төрүккү үгэспитин тутуһан табаны иитэ сатыыбыт. Бу да сырыыга төһө да атын хамаандалар кыайыыга дьулуурдаах, бэлэмнээх кэлбиттэрин иһин элбэх көрүҥҥэ миэстэлэһэн  бириистэри ылары ситистибит. Онтон «Туймаада» Агрохолдиннарга махталбын тиэрдэбин, Куруутун тыа сирин үлэһит дьонун өрө тутан өйүү-убуу сылдьаргыт биһиэхэ күүспүтүгэр күүс эбэр. Үлэҕит таһаарыылаах буоллун, » -диэн Вячеслав Колесов кэпсэтиитин түмүктүүр.