Сунтаарга Сибиэрэп ытык ыһыаҕа ыһылынна

Ыһыах аһыллыытын сиэрэ-туома саҥардыллыбыт Добун түһүлгэҕэ буолла. Саҥа тутуллубут 2000 киһи батан олорор киэҥ трибунатыгар баппакка, дьон туран эмиэ көрдө. Онон көрөөччү ахсаана хаһааҥҥытааҕар да элбэх. Улуус аҕа баһылыга Анатолий Григорьев нэһилиэктэр баһылыктарынан арыаллатан киирэн ытык дуоҕатын аанньаатын кытта саламалар сүүрэн түстүлэр уйгулаах ыһыах аһыллыбытын бэлиэтээтилэр. Ыһыах алгыһын Михаил Евсеев-Кураһаай Мэхээлэ толордо.

С.А. Зверев-Кыыл Уола туруорбут  «Алгыс», «Оһуор», «Хотой», «Сайылык» үҥкүүлэрүн түһүлгэҕэ биир тэҥник 20 ансаамбыл толордо. Аһыллыы үҥкүүлэригэр 600-тэн тахса үҥкүүһүт, уопсайа сиэргэ-туомҥа 1000-кэриҥэ киһи кытынна. Ону тэҥэ, аһыллыыга улуу киһи окко түһэн киһи-хара буолбутуттан саҕалаан кини 9 айар дьоҕурун, талаанын көрдөрөр дьүһүйүү турда. Сибиэрэп туһунан кэлбит көрөөччүлэр элбэҕи биллилэр. Бу аҕыйах хонуктааҕыта анал байыаннай дьайыыттан кэлбит «Айыллаан» КК салайааччыта, «Хорсунун иһин» мэтээллээх Василий Спиридонов үрүҥ атынан киирэн бар дьонун үөртэ.

Ыһыах аһыллыытын сценарийын суруйбут Саха норуодунай суруйааччыта  Наталья Михалева-Сайа: «Сунтаар ыһыахтыыр түһүлгэтэ айылҕа бэйэтэ анаан айан оҥорбутун курдук кэрэ миэстэҕэ турар. Ол иһин, ырыата-тойуга саас сааһынан бэйэтэ сааһыланан кутуллан тахса турар»,- диэн оһуокайга түбэһэн санаатын үллэһиннэ.

СӨ Судаарыстыбаннай мунньаҕын Ил Түмэн бэрэссэдээтэлэ Алексей Еремеев Сунтаар улууһа саха төрүт култууратын, духуобунаһын өрө тутарын бэлиэтээтэ.

СӨ Бырабыыталыстыбатын бэрэссэдээтэлин солбуйааччы Сергей Местников Ил Дархан эҕэрдэ суругун үөрүүлээх быһыыга-майгыга биэрдэ. Ону тэҥэ, Түбэй нэһилиэгин култуура дьиэтин салайааччытыгар Светлана Зедгенидзеваҕа СӨ култууратын үтүөлээх үлэһитэ бэлиэни туттарда:»Эһиилгиттэн оҕолорго норуот тылынан уус-уран айымньытыгар күрэһин СӨ Бырабыыталыстыбатын быһаччы өйөбүлүнэн барыаҕа»,- диэн иһитиннэрбитин дьон ытыс тыаһынан айхаллыы иһиттэ.

Улуу киһи үбүлүөйдээх сылын бэлиэтиир бэлиэ өрөспүүбүлүкэни биир гына тилийэ айаннаан Сунтаарга кэлбитин улуус баһылыга Анатолий Григорьев тутта. Онон Сибиэрэп үбүлүөйдээх сылын Саха сирэ бүттүүн бэлиэтээтэ.

Ыһыахха кэлбит бар дьон күн эргииринэн, илии- илиилэриттэн ылсыһан, сарын-сарыннарыттан өйөнсөн оҕуруолуу тиһиллэн оһуордаах оһуокайга эргийдилэр. Уйгулаах ыһыаҕы уруйдаатылар.

***
Мира АФАНАСЬЕВА, Елизавета ТИТОВА