Сунтаарга өрүс нөҥүө турар нэһилиэктэрин сайылыктарыгар уонна бааһыналарыгар сырыттылар

Бэс ыйын 4 күнүгэр, Улуус Аҕа баһылыга Анатолий Григорьев, тыа хаһаайыстыбатын управлениетын салайааччыта Иван Тихонов уонна тыа хаһаайыстыбатын тутаах исписсэлиистэрэ өрүс нөҥүө Түбэй-Дьаархан, Элгээйи уонна Күндэйэ нэһилиэктэрин бааһыналарын көрдүлэр-иһиттилэр.

Түбэй-Дьаархан нэһилиэгэр «Арыылаах сыһыыта» диэн Хардыы учаастагын сиригэр 31 га-лаах бааһынаҕа ИП Михаил Комин эбиэһи кытта элбэх сыллаах «Косторез» оту бииргэ ыспыт. Тыа сиригэр ыал сүөһүлээх олоруохтаах диэн сыалтан, соторутааҕыта баҕалаах дьоҥҥо акция тэрийэн босхо тарбыйах түҥэппит.

Элгээйи нэһилиэгэр «Өрөгөй Өтөҕө» диэн сиргэ фермерскай хаһаайыстыбалаах Ким-нар дьиэ кэргэттэригэр ыалдьыттаатыбыт. Хаһаайыстыба тутаах үлэһитэ С.А. Зверев – Кыыл Уолун ансаамбылын кыттыылааҕа Маргарита Сидорова муус устар ый ортотуттан сайылыкка көһөн киирбиттэрин иһитиннэрдэ. Ыаллар сылын аайы оҕолоругар уонна сиэннэригэр сайыҥҥы үлэ лааҕыра тэрийэн оҕуруот аһын арааһын үүннэрэллэр. Уопсайа 4га-лаах сиргэ иккитигэр 56 куул хортуоска олордубуттар. Билигин 1-дии га-ҕа сүбүөкүлэ уонна хаппыыста олордуутугар түбүгүрэ сылдьаллар.

Салгыы ПК «Элгэйский» тэрилтэ салайааччыта Семен Попов бааһынаҕа 70га эбиэс уонна 15га хортуоска ыһыытыгар 10 буолан үлэлии сылдьалларын кэпсээтэ. Тэрилтэ билигин төрдүгэр астаах үүнээйилэри олордууннан дьарыктанан күһүҥҥү үүнүүтүгэр кыһын харайар шоковай заморозка сирин тутта сылдьар.

ИП Станислав Александров иллэрээ сыл элбэх ардах түһэн хортуоска өлгөмнүк үүнэн хаһаайыстыба тэрийэн аймахтарын уонна чугас доҕотторун кытта 2га хортуоска уонна га аҥаара хаппыыста олордо сылдьалларын сырдатта. Хаһаайын инникитин 10х12 иэннээх хотоҥҥо хороҕор муостааҕы таһынан түргэнник ситэр көрүҥнэри дьиэ көтөрдөрүн кууруссалары уонна кроликтары иитэр былааннаах.

Күндэйэ нэһилиэгэр Элгээн учаастагын «Аан Харыйа» диэн сиригэр сылдьыы буолла. Манна ИП Николай Иванов 84 сылларга сопхуос саҕаттан тыа хаһаайыстыбатыгар сыстан 93 сыллаахтан хаһаайыстыба тэринэн үлэлиир. Үлэлииргэ үчүгэй күннэр турбуттарынан билигин буолаҕа 5 улахан тиэхиникэҕэ 4 олохтоох уолаттар үлэлии сылдьаллар. Инникитин олохтоох эдэр ыччаты үлэҕэ угуйан практика ыытар былааннаах.

«Сырдык Аартык» тэрилтэ «Ньэккэй» сайылыгар бостууктар уонна ыанньыксыттар дьиэлэригэр сылдьааһын буолла. Салайааччы Розалия Иванова тэрилтэ алта сайылыктааҕын сырдатта. Билигин 96 ыанар ынах уонна оччо ньирэй сайылыы тахсыбыт. Былырыын сайылыктааһын бырагыраамматын граныгар кыайан саҥа титиик, үүт уурар ампаар, икки квартиралаах дьиэ тутуллубут, ону таһынан түөрт үлэһиттэр дьиэлэрин саҥардан өрөмүөннээбиттэр. Сайылыкка инникитин үүт ыытар станоктаах тэрил кэлэрэ күүтүллэр, бу ый ортотугар миэстэтигэр хомуллан бэлэм буолуохтаах. Салгыы «Ферма-2. Дьол тааhа» реалитишоу уһуллубут «Таас» сайылык үлэһиттэрин көрүстүбүт. Үлэһиттэр сайылыкка бу соторутааҕыта 15 хаһаайыстыба 34 үлэһит буолан этэҥҥэ тэринэн көһөн киирбиттэрин кэпсээтилэр. Билигин 71 ыанар ынах баар, үүт хаачыстыбата үчүгэйин үөрэ хайҕаатылар.

***

“Сунтаар улууhа (оройуона)” муниципальнай оройуон дьаһалтатын пресс – сулууспата