Майаҕа ыллыыр ыскамыайкалар туруорулуннулар

Майаҕа Таптал көлүччэтигэр, Дьоруой Степанов аатын сүгэр уонна Ытарҕалаах үрэҕи туоруур муоста искибиэрдэригэр барыта аҕыс муусукалаах ыскамыайка туруорулунна диэн Майа сэлиэнньэтин баһылыгын солбуйааччыта Гаврил Толстяков иһитиннэрдэ.

Ураты ыскамыайкалары Майа сэлиэнньэтин олохтоох уус уолаттара Алексей Лукин, Федор Петров уонна Станислав Необутов ылсаннар олоххо киллэрбиттэр. Ыскамыайкаҕа баар муусуканы иннигэр-кэннигэр сыҕарытан талан холбуохха уонна тохтотуохха сөп. Маны таһынан түлүпүөнү ииттэриэххэ сөп. Аан дойду классическай муусукатыттан саҕалаан, Саха сирин уонна улууспут биллиилээх ырыаһыттарын ырыалара ыскамыайкаҕа тыаһыыллар. Ырыалары тематическэй тэрээһиннэргэ уларытан холбуохха эмиэ сөп. Сынньалаҥ искибиэрдэргэ туруоруллубут ыллыыр ыскамыайкалар сарсыарда аҕыс чаастан киэһэ 23 чааска диэри үлэлиир анал таймерга холбоммуттар. Майаҕа уопсастыбаннай сирдэргэ, искибиэрдэргэ Ростелеком хампаанньа нөҥүө видеокамералар туруоруллан хонтуруолланаллар. Бу барыта нэһилиэнньэ олоҕун тупсарар туһуттан толкуйдаммыт аныгылыы көрүүлээх бырайыактар сыллата олоххо киирэннэр Майабытын тупсараллар, киэргэтэллэр.

Бэлиэтээн эттэххэ, кыһыҥҥыттан Майа сэлиэнньэтин искибиэрдэрэ, болуоссаттара арт-эбийиэктэринэн киэргэтиллэн олохтоохтор сэҥээриилэрин ылбыта.

Олохтоох көҕүлээһин бырагыраамаларыгар киирсэн Майа олохтоох дьаһалтата уопсастыбаннай миэстэлэри, дьон сынньанар усулуобуйатын тэрийэр сыалтан сэлиэнньэни саҥардыыга, тупсарыыга хаһыс да сылын үлэлэһэр. Бу сайыҥҥы үлэлэринэн Комсомольскай болуоссакка кэрэ көстүүлээх сибэкки ааркаларын туруораннар тупсаҕай көстүүнү олохтоотулар.

Майа сэлиэнньэтин кырдьаҕас олохтооҕо Александр Захаров санаатын бу курдук үллэстэр:

«Биһиги тапталлаах Майабытыгар тупсарыы үлэтэ баран, киэркэйэр-тупсар. Комсомольскай болуоссаппыт хайдах курдук үчүгэй буолан турарый, бэртээхэй оһуордаах-бичиктээх муосталар, сынньанар сирдэр оҥоһулуннулар көрүөххэ олус кэрэ. Фонтааннаахпыт, кустар уста сылдьаллар, бары кэлэн көрөн харахпыт сымнаан, сүрэхпит үөрэн барабыт.

Биһиги Майабыт хайдах эрэ киин куораттары санатар. Ол эрэн күн бүгүн Майабыт экологията олохтоохтору долгутар. Быйыл олус кураан сайын буолан быыл-буор боппуруоһа сытыытык турар. Сүрүн киин уулуссаларбыт аспаллааһын үлэлэрэ бараннар үчүгэй эрээри, бу Төҥүлүлүүр сыыры тахсыыга үөһэ биэрэстэ аҥара сир кыайан оҥоһуллубакка хаалан, билигин улахан уйуктаах таһаҕас массыыналара аастахтарын ахсын буора-быыла турар. Итиннэ олорор ыаллар сайын үтүөтүн билбэккэ хаалабыт, бүтүннүү быылга олоробут. Бу 500 миэтэрэ кэриҥнээх суол Өрөспүүбүлүкэтээҕи суолталаах суол буолан, олохтоох дьаһалта кыайан ылсыбатынан Өрөспүүбүлүкэ салалтата быһаарыахтаах. Өрөспүүбүлүкэбит Ил Түмэн Судаарыстыбаннай Мунньаҕын дьокутааттарыттан биһиги олохтоохтор көрдөһүүлээхпит, кэлэр сылга үп-харчы булан бу хаалбыт 500 миэтэрэ кэрчиктээх суолу аспааллыыргыт буоллар биһиги Майабыт экологията тупсуо этэ».

***

Зоя ГЕРАСИМОВА