Кириэстээххэ «Бэрэ» учаастагар 100 төбөҕө анаммыт саҥа хотоно арылынна

---

«Кириэстээх» тыа хаһаайыстыбатын производственнай кэпэрэтиибэ, тыа хаһаайыстыбатын сайыннарыыга өр сылларга утумнаахтык үлэлээн улууска уостубат уйгуну-быйаҥы уһансан, дьон-норуот билиниитин ылбыт биир бастыҥ тэрилтэлэртэн биирдэстэрэ буолар. Улуус уонна Сунтаар нэһилиэгин саламтата биир санааннан улууспут олохтоохторун үүт аһылыгынан хааччыйар уонна «Үрдэл» соҕотуопкалыыр тэрилтэ оборудованиетын ис кыаҕын толору туһанар сыаллаах-соруктаах тэриллибит саҥа хотон уонна үлэһиттэр олорор дьиэлэрэ 35 күнүнэн тутуллан үлэҕэ киирдэ.

Үөрүүлээх тэрээһиҥҥэ Сунтаар улууһун Аҕа баһылыга Анатолий Григорьев СХПК «Крестях» бэрэссэдээтэлигэр Владимр Егоровка «Заслуженный работник народного хозяйства РС(Я)» диэн бочуоттаах наҕарааданы туттарда. Тыа хаһаайыстыбатын управлениетын салайааччыта Иван Тихонов, Сунтаар нэһилиэгин баһылыга Эдуард Филиппов кыттыыны ылан, саҥа дьэндэйбит хотон өр кэмҥэ кэхтибэккэ турарыгар, ынах – сүөһү төрөөн–ууһаан алаас муҥунан элбээн истиннэр диэн алгыс тыл бастыҥын анаатылар.

***