Хадаҥҥа Аҕа дойду сэриитин кытыылааҕар Тит Степановичка мемориал оҥорон үйэтиттилэр

Хадан нэһилиэгиттэн төрүттээх Аҕа дойду сэриитин кытыылааҕа, киэн туттар бэтэрээммит, ытыктыыр киһибит Тит Степанович Васильев «Албан аат» III истиэпэннээх уордьанынан наҕараадата 76 сыл буолан баран дойдутугар кэллэ.

Хасыгынаараптартан дьиэ-кэргэн биэс эр хоһуун уолаттара Дойдубут көҥүл уонна тутулуга суох буолуутун көмүскүү Аҕа дойду уоттаах сэриитигэр ыҥырыллан барбыттара. Үс уол кыайыы кынаттанан дойдуларыгар эргиллэн кэлэн эйэлээх олоҕу уһансыбыттара, олортон биирдэстэрэ Тит Степанович Васильев буолар. Дойдутугар кэлэн Хадан нэһилиэгин биригэдьииринэн үтүө суобастаахтык үлэлээбитэ, онтон Бордоҥ сопхуоска үлэлээн бэйэтин кылаатын киллэрсибитэ. Кини «Хорсунун иһин», «Германияны ылыы иһин» мэдээллэринэн уонна «Аҕа дойду сэриитин II истиэпэннээх» уордьанынан наҕараадаламмыта.

Прибалтиканы ылыы иһин Тит Степанович хорсун быһыытын бэлиэтээн «Албан аат» III истиэпэннээх уордьана түһэриллибитин, Кыайыы 70 сылыгар оҕолоро туруорсан, сүүрбүттэрэ-көппүттэрэ. Уордьан 76 сыл буолан баран быйыл Кыайыы 75 сылыгар СӨ Ил Дархана Айсен Николаев, Оборона министерствотын кытта үлэлэһэн, уордьан хаһаайынын булла.

Бүгүн, ахсынньы 23 күнүгэр Тит Степанович оҕолоро төрөөбүт нэһилиэктэригэр аҕаларын үтүө аатын үйэтитэн мемориал оҥорон үйэтиттилэр. Үөрүүлээх быһыыга-майгыгы улуус Аҕа баһылыга Анатолий Григорьев, баһылыгы социальнай уонна имиджевай политикаҕа солбуйааччы Гаврил Еремеев, улуус үөрэҕирии управлениетын салайааччыта Альберт Иванов, нэһилиэк баһылыга Андрей Оконешников бэтэрээн оҕолорун эҕэрдэлээтилэр.

***

“Сунтаар улууhа (оройуона)” муниципальнай оройуон дьаһалтатын пресс – сулууспата