Биир дойдулаахпыт, Дьоруойбут Дмитрий Николаевич аатын үйэтитэр сыаллаах тохсунньу 27 күнүттэн олунньу 5 күнүгэр диэри дэкээдэ биллэриллэрин туһунан улуус баһылыга Анатолий Григорьев дьаһал таһаарда.
Онон үүнэр көлүөнэни патриотическай өйгө-санааҕа иитэр сыаллаах тэрээһиннэр биһиги улууспутугар Дьоруой олорбут, үөрэммит дойдутуттан Уһун Күөлтэн күнүттэн саҕалаан ыытыллыахтара. Ол курдук, тохсунньу 27 күнүгэр Л.А.Попов аатынан Арыылаах орто оскуолатыгар Дмитрий Егоровка аналлаах мемориальнай дуоска аһыллыыта сарсыарда 10 чаастан буолуоҕа. Ол кэннэ оскуолаҕа Дьоруой олоҕун, үлэтин, кини бойобуой, хорсун быһыытын кэпсиир стендэ аһыллыаҕа. Оттон ыччаты патриотическай иитиигэ туһаайыллыбыт улуустааҕы байыаннай күрэхтэһиилэр эмиэ бу оскуола саалатыгар буолуоҕа. Манна кыттааччылар хас да түһүмэххэ куоталаһыахтара.
Улуустааҕы үөрэҕирии управлениета тэрийиитинэн улуус оскуолаларыгар эр санааланыы уруоктара, уруһуй күрэһэ дэкээдэ устата ыытыллыаҕа. Л.А.Попов аатынан кииннэммит бибилэтиэкэ тэрийэр кинигэ быыстапката дьону түмүөҕэ. Ыччат бэлтиитикэтин отдела эмиэ туспа тэрээһиннэри ыытыаҕа. Ыччаттар флеш-моб тэрийиэхтэрэ. Мантан да атын тэрээһиннэр Арассыыйа уонна ДНР Дьоруойдара Дмитрий Егоров сырдык аатын үйэтитиигэ ананан ыытыллыахтара.
Яина ВЛАСЬЕВА
Оставить комментарий