Аммаҕа Олоҥхо ыһыаҕар ат үрдүттэн оҕунан ытыыны көрдөрүөхтэрин сөп

Итинник этиини Ил Түмэн бастакы вице-спикерэ, Өрөспүүбүлүкэтээҕи Олоҥхо кэмитиэтин бэрэссэдээтэлэ Александр Жирков оҥордо.

Муус устар 7 күнүгэр Саха Өрөспүүбүлүкэтин Бырабыыталыстыбатын солбуйааччыта Сергей Местников салайааччылаах 2024 сылга Амма улууһугар Олоҥхо ыһыаҕын бэлэмниир, тэрийэр кэмитиэт мунньаҕа буолла. Мунньах түмүгэр Александр Жирков Аммаҕа быйыл ыытыллар Олоҥхо ыһыаҕар ат үрдүттэн ох саанан ытыы ньыматын көрдөрөр туһунан этии киллэрдэ.

«Үгүс омуктар бэйэлэрин национальнай оонньууларын тас дойдуларга таһаарар буоллулар. Холобур, 2012 сылтан Кыргызстаҥҥа саҕаламмыт “Көс омуктар оонньуулара” кылгас кэм иһигэр уонунан омук, судаарыстыба кыттар Аан дойду таһымнаах күрэххэ кубулуйда (Всемирные игры кочевников). Бу оонньуулар 2014 с. Кыргызстаҥҥа, кэлин Турцияҕа, оттон быйыл, 2024 с. – Казахстаҥҥа ыытыллаллар. Кэнники кэмҥэ Саха сирин спортсменнара бу Оонньууларга эмиэ кыттар буоллулар. Мас тардыһыыта, көс омуктар күрэстэрин көрүҥүн быһыытынан, бу Аан дойдутааҕы оонньуулар программаларыгар эмиэ киллэрилиннэ», – диэн эттэ Александр Николаевич.

Салгыы кини: «Көс омуктар Аан дойдутааҕы оонньуулара – түүр омук былыр-былыргыттан илдьэ кэлбит көрүҥнэригэр тэриллэр. Сүрүн оонньууларынан ат сүүрдүүтэ, тустуу көрүҥнэрэ, мас тардыһыыта уонна оҕунан ытыы буолаллар. Биһиги омук бу көрүҥнэргэ барыларыгар сыстаҕас. Ох сааҕа биһиги ытааччыларбыт улахан ситиһиилэрдээхтэр. Өбүгэлэрбит оҕунан ытыы бары көрүҥэр дэгиттэр этилэр. Оҕунан ытыы – олимпийскай көрүҥ. Бу көрүҥү тэнитии кэскиллээх буолуоҕа, улахан спортивнай ситиһиилэргэ тиэрдиэҕэ», – диэн этиитин мунньах кыттыылаахтара сэргии иһиттилэр.

Александр Жирков ат үрдүттэн оҕунан ытыыга күрэхтэһиини буолбакка, көннөрү ытан көрдөрүүнү Аммаҕа тэрийэн көрөр сөптөөҕүн туһунан эттэ. Олоҥхо ыһыаҕын тэрийэр кэмитиэт бэрэссэдээтэлэ Сергей Местников бу этиини үөрэтэн көрөргө Саха сирин спорт министиэристибэтигэр сорудахтаата.

***

Ил Түмэн пресс-сулууспата

Хаартыска Көс омуктар Аан дойдутааҕы оонньууларын саайдыттан ылылынна