Күндэйэ оскуолата 100 сыллаах үбүлүөйүн бэлиэтиир

Билиигэ сирдиир, сырдыгы-кэрэни кэрэһэлиир Б.Н. Егоров аатын сүгэр агро хайысхалаах, “Юнеско” Ассоцияциятын ситимигэр киирэн үлэлиир оскуола биир үйэ тухары олох уларыйыыларын кытта тэҥҥэ хардыылаан, тэҥҥэ сайдан иһэр. Оскуолаттан үтүө-мааны, эрчимнээх, ситиһиилээх ыччаттар олох киэҥ суолугар үктэммиттэрэ.

Үөрүүлээх тэрээһиҥҥэ «Сунтаар улууһа» муниципальнай оройуон саламтатын аатыттан баһылыгы социальнай уонна имиджевэй бэлиитикэҕэ солбуйааччы Гаврил Еремеев, Сунтаар улууһун депутаттарын Сэбиэтин бэрэссэдээтэлэ Ульяна Попова, үөрэх управлениятын салайааччыта Альберт Иванов, тыа хаһаайыстыбатын салайааччыта Иван Тихонов уонна ыраахтан чугастан кэлбит ыҥырыылаах ыалдьыттар, бэтэрээн учууталлар, выпускниктар кэлэр кэнчээри ыччаттарбытыгар, учууталларга, оскуола үлэһиттэригэр алгыстаах кэс тылларын, эйэҕэс эҕэрдэлэрин, сайаҕас санааларын анаатылар.

Өссө биир кэрэ түгэнинэн оскуола киэн туттар үөрэнээччитэ, Аан дойдуга олоҥхону хартыынаҕа хатаан үйэтиппит Тимофей Степанов дьоно “Алгыс” хартыынатын оскуолаҕа бэлэх анаатылар.

Бүгүҥҥү уйгулаах олохпут оҥкулун оҥорсубут, араас кэмнэргэ олорон, үлэлээн ааспыт, үөрэҕирии сайдыытыгар үрдүк сыраларын биэрбит аҕа көлүөнэ саастаах үлэ дьонугар аналлаах «Үлэ Албан аата» сквер, ону сэргэ оскуола тиэргэнигэр кыччатыллыбыт каркаснай макет-дьиэ арылынна.

Кэлэр кэнчээри ыччаты үөрэппит-такайбыт, сырдыкка сирдээбит үтүө-мааны дьон сквера ааспыты санатан ыччаты үтүөҕэ-кэрэҕэ угуйа, аҕа көлүөнэҕэ махталы иҥэрэ туруо диэн эрэлбит сүдү.

***

“Сунтаар улууhа (оройуона)” муниципальнай оройуон дьаһалтатын пресс – сулууспата