Тарбахтарыгар талааннаах эдэр ыал

Саха киһитэ айылҕатынан айар-тутар талааннаах, туппута эрэ тупсан иһэр, ылсыбыта эрэ ыпсан иһэр.

Тыа сиригэр дьиэ-уот тэринэн, үлэни-хамнаһы сөпкө бэринэн олорор эдэр ыалы сэмээр хайгыы, искэр үөрэ көрөҕүн. Ол курдук, Ньурба оройуонун уһук сиригэр — Хатыыга олорор, талба талааннаах Уйгулаана, Иван Тимофеевтар дьиэ кэргэни билиһиннэрэбит.

Уйгулааналаах Иван 2020 сылтан Мэҥэдьэк нэһилиэгэр олохсуйан олороллор. Иван көмүсчүт, уруһуйдьут, Уйгулаана керамист, уруһуйдьут идэтин баһылаабыттар. Уйгулаана педагогическай үнүстүүткэ эбии технология учууталын үөрэҕэр үөрэнэн, билигин Хатыы орто оскуолатыгар уруһуй уонна үлэ уруогун учууталынан үлэлиир. Оскуола оҕолорун кытары үгүс күрэхтэргэ, быыстапкаларга кыттан ситиһиилэнэллэр, дьон-сэргэ сэҥээриитин ылаллар.

Ыал аҕата Иван оскуолаҕа үөрэнэр кэмнэриттэн уһанан саҕалаабыт. Бу идэни баһылыырыгар маҥнайгынан уһуйбут уһуйааччытынан Иванов Николай Михайловиһы махталынан ааттыыр. Уһуйааччыта уһанар сатабылларын үүнэр көлүөнэҕэ эмиэ тириэрдэр сыалтан, сайын саха быһаҕын уһанан оҥорорго оскуола оҕолоругар лааҕыр тэрийэн Иваны кэрэхсэтэр. Бу ол саҕана интэриэстээх оҕоҕо тимир ууһун ураты эйгэтиттэн, күүстээх ньэҥириттэн бэрсэн, харахтарын уоттаабыта саарбаҕа суох.

Иван «Мой Бизнес» бырагыраамаҕа кыттан, 2021 сыллаахха көмө үп ылан, мастарыскыай арынан, сөбүлүүр дьарыгын үлэ оҥостон, үлэлиир-хамсыыр.

Сахалыы сайдам тыыннаах эдэр ыал Дьулусхан уонна Уруйдаана диэн утум салҕааччы оҕолордоохтор. Уоллаах кыыс уу сахалыы иитиилээхтэр, «ийээ, аҕаа» диэн төрөппүттэрин минньигэстик ыҥыраллар. Оҕолор ийэлээх аҕаларын утумнаан уруһуйга дьоҕурдаахтар, элбэх күрэхтэргэ ситиһиилээхтик кытталлар. Дьулусхан спордунан дьарыктанар: боксанан уонна тустуунан үлүһүйэр. Уруйдаана 3 сааһыттан оһуокай тылын этэр, билигин сааһа 5, бэйэтин саастыылаахтарыгар оһуокайга бастыҥ.

Эдэр ыал сайдар суолу тутуһан, инникитин элбэх күрэхтэргэ, көрүүлэргэ кыттар, араас оҥоһуктары оҥорор былааннара, айар-тутар сыаллара үгүс. Ону тэҥэ, оҕо иитиитигэр болҕомто ууран, оҕону таба тайанан, сөпкө сайыннарарга дьулуһаллар.

Уйгулааналаах Иваҥҥа ситиһиилэри баҕарабыт, саха мааны ыала буолуҥ, айар аартыккыт аһаҕас буоллун!

***

Ньурба култуурата