Бороҕон өссө биир тупсаҕай тутуунан киэркэйдэ

Ааспыт субуотаҕа Бороҕон илин өттүгэр Тоһоҕо күөл кытылыгар биир кэрэ тутуу аһыллыыта буолла. Бу биһиги улууспутугар улахан тутуулар барыыларыгар үгүс үтүөлээх Михаил Романович Готовцевка аналлах “Тутааччы скверэ” буолар. Кини тутааччы эрэ буолбакка, меценат быһыытынан эмиэ киэҥник биллибит киһи этэ. Ол сырата үрдүктүк сыаналанан РФ бочуоттаах тутааччыта, Иван Крафт аатынан бириэмийэ лауреата, Уус Алдан улууһун, Байаҕантай, Мүрү, Хоро нэһилиэктэрин бочуоттаах олохтооҕо буолбута.

Тэрээһиҥҥэ улуус баһылыгын солбуйааччы Анатолий Сторожев, Мүрү нэһилиэгин баһылыга Прокопий Румянцев кытыыны ыллылар, бэйэлэрин эҕэрдэлэрин тиэртилэр. Бэртээхэй тутууну Михаил Романович кэргэнэ Полина Ивановна көҕүлээһининэн, оҕолоро уонна аймахтара бэйэлэрин күүстэринэн оҥорбуттар.

Сквер ортотугар аҕа уолунаан олорор пааматынньыга турбут. Ол икки өттүнэн Михаил Романович олоҕун уонна ыыппыт тутууларын туһунан кэпсиир стендэлэрдээх. Киэһээҥҥи өттүгэр уотунан сырдатыллар. Оҥоһуллуута дьон көрөн аастыннар эрэ диэн буолбакка, сынньаналларыгар эмиэ табыгастаах гына тутуллубут. Онон чахчы кэрэ көстүүлээх, дьон-сэргэ биир сөбүлээн сылдьар сирэ буолсу.

***
Афанасий Сектяев