Виталий ЕГОРОВ саҥа кинигэтэ таҕыста

Сэргэх сюжеттаах, сонун кэпсээннээх, тэтимнээх тыллаах-өстөөх айымньылары суруйар Виталий Михайлович ЕГОРОВ саҥа кинигэтэ таҕыста. Кинигэ аата “Проклятие Огненной лошади”, “Бичик” кинигэ кыһатыгар бэчээттэнэн таҕыста.

Виталий ЕГОРОВ өр сыл ИДьМ структуратыгар уголовнай розыска үлэлээбит киһи. Боростуой опертан криминальнай милииссийэ начальнигын солбуйааччытыгар тиийэ үлэлээбитэ. Кини детектив сэһэннэрэ олоххо дьиҥнээхтик тахсыбыт түбэлтэлэргэ олоҕурар буолан уонна бу соторутааҥҥы кэми хабалларынан, хас сырыы ахсын киэҥ кэпсэтиини, ырытыыны, дьүүллэһиини күөртүүр диэтэххэ омуна суох. Биир оннук айдааннаах ырытыыны таһаарбыт кинигэтэ “Аптекарь Сатаны” буолар.

Бу сырыыга ааптар “Проклятие Огненной лошади” сэһэнигэр дьылҕа хаан – этиэхтэн кэрэ дьүһүн – тургутуга киһи олоҕор хайдах дьайарын, киһи олоҕун бэйэтэ хайдах уларытар, салайар кыахтааҕын туһунан суруллар.

Уот долгун намылыйар суһуохтаах,  талыы-талба таһаалаах, уу нуурал бэйэлээх, сырдык ньуурдаах, куйаас байҕал толбонун кэриэтэ күөх чүөмпэ харахтардаах, сыралҕаннаах имэҥнээх кыыс оҕо кылааннааҕын дьылҕата көстөр. Оҕотук кыыс атаҕастабыла, санаата, майгыта, сиппит дьахтар таптала, олоҕо ойууланар.

Ылан ааҕыҥ, сэҥээриҥ, сэргээҥ!

***

Aartyk.Ru