УЛУУ КУЙААР БИЛИИТЭ

Олох уларыйарын тэҥэ көлүөнэ эмиэ уларыйан иһэр. Атын өйдөөх-санаалаах, сиэрдээх-майгылаах көлүөнэ бэйэ-бэйэтин солбуйсан иһэр, ону тэҥэ олох өйдөбүллэрэ эмиэ уларыйаллар. 90-с сылларга төрөөбүт оҕолор, сэбиэскэйи баттаһа төрөөбүт көлүөнэттэн, чыҥха атыттар. Онтон 2000 сыл кэнниттэн төрөөбүт оҕолору букатын да, атын, саҥа куттар Сиргэ төрөөтүлэр дииллэр.

Билиҥҥи ыччат сүрэҕэ аһаҕас, үөрүнньэҥ, аһыныгас. Аныгы технологияҕа сыстаҕастар, уларыйыыны, билиини, саҥаны-сонуну дөбөҥнүк ылыналлар, бэйэлэрин аналларынан, сүрэхтэрин баҕатынан олорорго дьулуһаллар. Ис көҥүллэрэ, сырдыкка-кэрэҕэ талаһыылара, талааннара сөхтөрөр, үөрдэр, долгутар. Кэрэ кэм кэрэһиттэрэ буолуохтара диэн киһи кинилэртэн элбэҕи күүтэр, эрэнэр, итэҕэйэр.

«Ыччат төрөөбүт тылын умунна, култууратын тумунна», – диэн этэр дьону кытары сөбүлэһимээри гынабын. Кэмэ кэллэҕинэ, ис-истэриттэн сахалыыга син биир талаһаллар эбит. Хааны ханна гыныаххыный, тугунан суурайыаххыный? Ханнык баҕарар эйгэҕэ, ханна да бардаллар, олордоллор, сырытталлар син биир сахаларын тыына төлө көтөн тахса турар. Туох да мээнэҕэ буолбат. Сорохтор ыччаппыт аан дойдунан ыһылынна диэн суҥхараллар. Кэмэ кэллэҕинэ билии хомунан баран төннүөхтэрэ, сахаларын аатын аар-саарга дорҕоонноохтук ааттатыахтара.

Олоҥхону орто саастаах да дьон аахпыттара саарбах. Оттон бу сүүрбэччэлээх-отуччалаах ыччат-дьон түҥ былыргыны кытары ситимниир, икки атахтаах тылынан-омугунан арахса илигинэ кэпсэнэр айымньыны хантан билэрий? Сах саҕанааҕы Ийэ Сир, Аҕа Халлаан, Улуу Куйаар тутулун туһунан Кистэлэҥ Билии туһунан хантан аахта, ылла, биллэ?

Света, Светлана Иннокентьева, ийэтэ ааттыырынан, Сибэкки.
Кинини кытары чугастык алтыһыахпыттан ыла сөҕөрүм, махтайарым олус элбээтэ. Кини санаата, көрүүтэ, көрүүлэниитэ киһини элбэхтик толкуйдатар. «Олох диэн тугуй?» – диэн ыйытыыга хоруй буларга туох да сүҥкэн билии аанын сэгэттэр-сэгэтэн иһэр.

Света айылҕата уһуктар кэмин, эттэтиитин бэйэм илэ харахпынан көрбүт, билбит буолан маннык суолга үктэнэр айылҕалаах дьон элбэх өй-санаа, эт, турук ыарахан сыратын, тургутуутун ааһалларын олус өйдүүбүн. Ама да ааспытын иһин, ол кэмнэри санаатахпына билигин да хараҕым ууланар. Киһи барахсан инчэҕэй эттээх буоллаҕа, Улуу Куйаар биэрэр билиитин Сир киһитин этэ-хаана, кута-сүрэ уйара күчүмэҕэйдэрдээх буолар эбит.

Света дьону эмтиирин, ыраастыырын, арчылыырын, санаатын сааһылыырын таһынан айылҕата уһуктар дьону уһуйар, сүбэ-соргу биэрэн тургутууларын чэпчэкитик ааһалларыгар көмөлөһөр.

«Мин эттэтэр кэммэр үөрэтэр-уһуйар киһим суоҕа наһаа ыарахан этэ. Ол иһин мин кинилэргэ көмөлөһө сатыыбын», – диэн бастаан саҕалыырыгар эппиттээҕэ.

Светлана турукка киирэн дьикти хартыыналары уруһуйдуур.

«Олох туолан хаалабын, уруһуйдаатахпына сатанар диэн холустам иннибэр олоробун. Кырааскам өҥүн, уобарас айыытын илиим бэйэтэ талар курдук, – диир. – Уруһуйдуур кэммэр наһаа дьоллонобун, дуоһуйабын, чэпчиибин».

Света хартыыналарын дьон иһийэн, сыныйан туран көрөр. «Эмтиир, ыраастыыр күүстээх. Тыыннаахтар», – диэн көрбүт эрэ бары кэрэхсиир, дьиктиргиир. Сорохтор бэл ытыыллар, истэригэр тута сылдьалларын тоҕо тэбээн ыраастаналлар, чэпчииллэр.

Светаҕа дьон бэйэлэрэ да билбэттэринэн талаһаллар. «Турукка киирэн уруһуйдааһын» диэн дьарыгар хаһан да киистэни туппатах дьон кэлэн ис-истэриттэн арыллан уруһуйдаан киирэн бараллар.

«Дьиҥинэн сатаан уруһуйдаабат киһи диэн суох. Оҕо сылдьан киһи бары уруһуйдуур. Уруһуйдуу олорор оҕону көрөөрүҥ эрэ, тулатын умнан кэбиһэр. Иэйиигэ ылларар, айар дьоҕура уһуктар. Ол курдук турукка киллэрэн дьону уруһуйдатабын. Айар үлэ – иэйии. Дьарыкпар дьону иэйии туругар киллэрэн истэригэр баары барытын дьалкытан таһааран, сөптөрүн-cөтөгөйдөрүн көрөллөрүгэр көмөлөһөбүн. Ис кыахтара уһуктар, аналларын булан суолларын тэлинэллэр, – диир. – Турукка киирэн уруһуйдаан киһи дьылҕатын уларытыан сөп. Хаһан да уруһуйдаабатах дьон иэйиигэ киирдэхтэринэ букатын уларыйаллар, өйдөрө-санаалара уһуктар, Куйаары кытары ситимнэрэ арыллар».

САҤА КЭМ

– Саҥа кэм кэллэ. Дьон айылҕалара уһуктан, төрүт Итэҕэллэригэр төннөн, Айыылары кытары ситимнэрэ холбонон эрэр. Урут ойууттар-удаҕаттар эрэ Айыылары, Куйаары кытары ситимнэһэр кыахтаах эбит буоллахтарына, билигин хас биирдии иккис киһи үөһээҥҥини кытары холбонно. Бэйэҕит да көрө сылдьаргыт буолуо, аймахтаргыт, доҕотторгут уларыйдылар буолбат дуо? Ол аата хас биирдии киһи бэйэтин кыаҕынан уһуктар кэмэ кэлбит. Уһугуннаран эрэллэр. Саҥа кэм – урукку-былыргы религиялар, көрүүлэр, билиилэр, наука арыйыылара олохтообут хааччахтарыттан тахсар, босхолонор кэмэ. Урукку установкалар билигин үлэлээбэттэр, – диэн кини этэр.

– Билии икки араастаах – вертикальнай – Куйаартан быһа кэлбит информация, горизонтальнай – дьон нөҥүө кэлбит информация. Хас биирдии киһи араас-араастык информацияны тарҕатар, бэйэтин көрүүтүн эбэр-сабар, уларытар-тэлэритэр. Холобур, ити билигин баар религиялары, ойууннааһыны да көрүөххэ. Киһи, дьон толкуйдаатаҕа дии. Дьиҥнээх, Куйаартан кэлбит Билиини, религиялар уларытан-тэлэритэн, кэмигэр сөп түбэһиннэрэн, адаптациялаан илдьэ сылдьаллар. Ол иһин ким эрэ ылынар, ким эрэ ылыммат.

Оттон Дьиҥнээх Итэҕэли киһи барыта ылынар, сөпсөһөр. Тоҕо диэтэххэ, Куйаар Билиитэ – Кырдьык.
Билигин Сир иччитэ уһуктар, улаатар кэмэ. Биһиги эмиэ ону кытары тэҥҥэ улаатыахтаахпыт. Ол иһин 2020 сылтан саҕалаан Аан дойду үрдүнэн туох барыта дьалкыҥныы турар – хаос.

Дьиҥ Куйаар Билиитин сахалар эрэ уларыппакка-тэлэриппэккэ тутан хаалбыттар. Ол иһин этэллэр, кэнэҕэскитин кэнэҕэс Саха сирэ – духуобунай мекка, мэҥэ сир буолуоҕа диэн. Аан дойду дьоно Кырдьыгы көрдүү Саха сиригэр талаһыахтара. Ол кэм субу кэллэ. Биһиги онно бэлэмнэниэхтээхпит, Итэҕэлбитин сааһылыахтаахпыт, бэйэбит уһуктуохтаахпыт. Ыксаталлар, тиэтэтэллэр.

КИМТЭН КИИННЭЭХ, ХАНТАН ХААННААХ

Света бэйэтэ Хаҥаластан төрүттээх, Тыгын Дархантан хаан тардыылаах. Ийэтин өттүттэн төрүт хаҥаластар, аҕатынан – ньурбалар, бүлүүлэр. Кини Покровскай куоракка төрөөбүтэ, онно оскуолаҕа үөрэммитэ.

Оскуолаҕа үөрэнэ сылдьан Александр Харитонов директордаах Покровскайдааҕы оҕо художественнай оскуолатыгар үөрэммитэ. Оччолорго оҕолору аатырбыт художник Юрий Голиков Москваттан кэлэн кытары үөрэтэрэ, элбэх быыстапкаларга кытталлара, араас куораттарга баран музейдарга сылдьаллара, этюдтары оҥороллоро. Светаны учууталлара хайаан да художник буолаҕын диэн анаан-минээн бэлэмнээбиттэр эрээри, кыыстара 9-с кылааска арай уруһуйдаан бүтэн хаалар уонна Өктөмнөөҕү физмат лицейгэ үөрэнэ киирэр. Лицейи туйгуннук бүтэрэн баран салгыы Москватааҕы инженернэй-физическэй институт (МИФИ) Обнинскайдааҕы атомнай энергетика институтугар үөрэнэ барар. Онон физик-ядерщик буолан хаалар.

Туох да мээнэҕэ буолбат. Дьылҕа Хаан ыйааҕа Уһун Дьурантаайы таас остуолбатыгар суруллан турдаҕа. Света хартыыналарыгар билигин физика сокуоннара, формулалара уонна духуобунас билиилэрэ тэҥҥэ Куйаар информацията буолан ситимнэнэн кутулла тураллар. Информация ким төһө бэлэмнээҕинэн кэлэр дииллэрэ сөп эбит.

КУЙААР уонна ФИЗИКА

– Билигин миэхэ Куйаар атын билиитэ кэлэн эрэр: физика уонна космос. Түүл диэн дьикти турук. Киһи мэйиитэ, этэ-сиинэ күннээҕи түбүктэн налыйан, холкутуйан ыыттынар кэмигэр, нухарыйар икки утуйар икки ардыгар турукка киирдэҕинэ, дьэ барыта көстөн кэлэр. Квантовай физикаҕа улахан арыйыы тахсара олох чугаһаан турар. Дакаастанар кыахтаах. Ону этэ сылдьаллар. Өйбөр-санаабар, харахпар көстөр, ол гынан баран тылынан быһаарарбар уустук. Ол иһин түүҥҥү көрүүлэрбин уруһуйунан таһаарабын.

Планета аайы атын-атын цивилизациялар бааллар. Былырыын атын планета цивилизациялара кэлбиттэрэ. Кинилэр үөрэтэллэр. Куйаарга көтөн хаалаҕын, атыттан атын таһымнарга тахсан иһэҕин.
Холобур, өбүгэлэрбит 12 хаттыгастаах 9 халлаан баар дииллэрэ. Ол кинилэр Сир энергетическэй таһымнарын эппиттэр эбит. Ол кэннэ өссө салгыы Куйаар таһыма баар, ол бара турар, хаһан да бүппэт.
Сахалар былыр итини билэр эбиттэр.

Сир тоҕус халлааныгар, ол аата энергетическэй таһымыгар, анал Айыылар (Архитектордар) бааллар. Кинилэр быһаччы Сиргэ көмөлөһөр күүстэр. Кинилэри салайар, көмөлөһөр өссө атын Айыылар бааллар, соннук салгыы бара, бара турар.

Өскөтүн Сир энергетическэй таһыма 9 эбит буоллаҕына, биһиги үһүс таһымтан саҥардыы төрдүскэ тахса сатыыбыт. Билигин кэм уларыйда, киһи барыта өйө-санаата уһуктуон наада, таһыммытын улаатыннарыах тустаахпыт. Олох сайдар, билии эмиэ кэҥиир, улаатар, атын таһымҥа тахсар. Сол курдук Итэҕэлбит иитэ эмиэ кэҥиэхтээх. Өбүгэлэрбит хаалларбыт билиилэригэр тирэнэн өссө салгыы баран иһиэхтээхпит. Куйаар киэҥ, иитэ-саҕата биллибэт.

СИР уонна КИҺИ

-Сир цивилизацията эмиэ иччилээх. Саха Итэҕэлигэр Сир Иччитэ – Аан Алахчын Хотун. Саха тугу барытын тыыннааҕымсытан, иччилээн көрөрө. Энергияны – Иччи диэн эттэхтэрэ.

Миэхэ киһи хараҕынан энергия хайдах буоларын илэ көрдөрбүттэрэ. «Фрактал» диэн ааттанар. Энергия, тохтоло суох эргийэ турар, калейдоскоп ойуутун курдук.

Киһи – эмиэ энергия. Кристаллическай решеткаланан-решеткаланан кытаанах материяҕа кубулуйдахпыт дии. Сир – кытаанах, плотнай энергияттан турар, ол онно Буор Кута суох хайдах олоруохпутуй. Буор Кута суох буоллахпытына – үөр буолабыт.

Барыта энергия диэн өйдөөтөхпүтүнэ даҕаны киһи өйдүүр өйө (сознание) да уларыйар.
Өйдүүр өй (сознание) – Таҥараттан диибит дии. Куйаары эмиэ туох эрэ, ким эрэ айдаҕа, оҥордоҕо. Ол Айыы, Оҥоруу сорҕото хас биирдии киһиэхэ барытыгар баар.

Үс куттаахпыт: Салгын Кут (дух), Ийэ Кут (душа), Буор Кут (тело). Салгын Кут атын цивилизациялары кытары ситимниир кыахтаах, кинилэрдиин Салгын Куппут биир, биир кэлимсэ чараас материябыт.

Холобур, бу остуолу көрөҕүн? Бу муннук – эн, биир муннук – мин, ким эрэ – ортото, ким эрэ – атаҕа о.д.а. Онно эн дуу, мин дуу, кини дуу суох буоллаҕына – бу остуол хаһан да остуол буолбат. Хас биирдии киһи – Куйаарга тутаах суолталаах, кини биир сүрүн чааһа. Наадата суох киһи диэн суох. Бары бу Куйаар ситимигэр олус наадалаах элеменнэрбит. Биир киһи суох буоллаҕына, Куйаар тутула барыта уларыйар. Ол курдук киһи Куйаар таһымыгар суолталаах, кини дьайар күүһэ сүдү. Ол ону билиниэхпитин, билиэхпитин наада.

Таҥара (Творец, Бог) сорҕото буолан биһиги айабыт-тутабыт, суохтан баары оҥоробут. Куйаары кытары сибээстээх киһи айар. Суруйар, уһанар, уруһуйдуур, тутар, баайар, киинэ устар… Оҥороммут остуол баар, суруйаммыт кинигэ баар, тутаммыт дьиэ баар. Оттон кыыл айбат. Куттара ситэ илик, утуйа сытар. Кут эволюцията, сайдыыта куруук бара турар, тохтообот. Кут саҥаттан саҥа форманы, туругу ыла-ыла сайдан иһэр. Таас буолуо, үүнээйи буолуо, кыыл буолуо, киһи буолуо, Айыы буолуо… барыта кыраттан саҕаланан улаатан, сайдан иһэр.

Өлүү – саҥаттан-саҥа үктэли дабайыы, перезагрузка. Өлөбүт – төрүүбүт, өлөбүт-төрүүбүт… Сирдээҕи үөрэҕи барытын ааһыахпытыгар диэри хаттаан төрүү турабыт. Православиеҕа сибэтиэй таһымҥа тахсыбыт дьон баар дии, холобурун, Святой Лука, Святой Петр эҥин диэн. Бу дьон Сирдээҕи үөрэҕи ааспыт, атын таһымҥа тахсыбыт Куттаах дьон. Кинилэр Куттара Сир дьонугар көмөлөһөр атын таһымҥа тахсаллар, ону аастахтарына салгыы атын таһымҥа бараллар. Оннук тахса-тахса тураллар.

КУЙААР БИЛИИТЭ

Светлана турукка киирэн уруһуйдаабыт биир хартыынатыгар Саха итэҕэлин, Куйаар билиитин барытын сааһылаан киллэрбитэ сөхтөрөр.

Света хартыынатын кэпсиир:

-Үөһэттэн саҕалыахха. Бу уруһуйу барыта Фибоначчи сокуонунан уруһуйдаабыт эбиппин. Үс, алта, тоҕус…
Үс куттаахпыт: Салгын Кут, Ийэ Кут, Буор Кут.

Күн – Куйаар символа. Туох баар билии, иэйии, айар дьоҕур, талаан – Күнтэн кэлэр. Күҥҥэ алта муннуктаах – геометрическай фигура уруһуйдаабытым. Саха тыла биир кистэлэҥэ диэн – тылтан тыл тахсар, өйдөбүлтэн өйдөбүл. Алта – алтыс. Айыылары кытары алтыс диэн. Хас биирдии киһи баһын үрдүгэр шестигранник баар, ол онон Куйаар информацията түһэр. Атын религияларга 6 сыыппара өйдөбүлүн уларытан Дьаабал сыыппарата, эбэтэр күннээҕигэ “кулут” (шестерка) эҥин дииллэр. Биһиги, сахалар, 6 сыыппараны сөпкө тутта сылдьабыт: Айыылары кытары алтыс.

Күн – диэн, миэхэ көрдөрбүттэринэн, атын галактикаларга тахсар портал. Онно киирдэххэ атын галактикаҕа баар буолан хаалаҕын. Үөһэттэн көрдөххө Халлаан сиигэ (Млечный Путь), биһиги галактикабыт Күнэ, астероидтар, атын галактикалар сулустара бары биир точка буолан көстөллөр, онтон өссө атын галактика точка буолан көстөр, соннук элбэх баҕайы сырдык точкалар эриллэ-эриллэ, улаата-улаата, кэҥии-кэҥии бара тураллар. Ол барыта фрактал курдук, энергиятин долгуна чаҕылыҥныы-чаҕылыҥныы эргийэ, тыга турар. Бу барыта – Улуу Куйаар (Таҥара, Вселенная, Божественное). Биһиги Салгын куппутун таҥмыт Улуу Күүс.

Хартыына уҥа өттүгэр – Ый. Ый – бу биһиги эмоциябыт. Ый улаатар, туолар, эргэрэр, өлөр, онтон хаттаан ити түһүмэх хатыланар. Хараҥа – сырдык оонньуута. Сорох дьон ый туоллаҕына санаалара оонньуур, утуйбаттар, араас санааҕа-онооҕо ыллараллар. Ол аата кинилэр ханнык эрэ эмоцияларын – хараларын ылымматтар, билиммэттэр. Ол иһин Буор Кутунан киирэн дьалкытан ыраастыы сатыыллар.

Киһи сырдык уонна хараҥа эмоциятын тэҥинэн ылыннаҕына туолбут ый курдук толору буолар, гармония кэлэр. Биһиги буоллаҕына, хараҥабытыттан куттанабыт дии, наар үчүгэй эрэ эмоцияны, хайҕалы эрэ билинэ сатыыбыт. Хараҥаттан куттанабыт, куота сатыыбыт. Оттон Сир диэн Сир, сырдык да баар, хараҥа да баар. Бу икки туругу тэҥинэн ылыммыт киһи, икки энергияны толору холбонноҕуна бүтүн – төгүрүк буолар, туолбут ый курдук. Бүтүн буоларга талаһыахтаахпыт.

Биһиги планетабыт цивилизацията икки өрүттээх (дуальный) – сырдык – хараҥа, дьахтар – эр киһи, күн – түүн… Үөһээ дьахтар-эр киһи диэн арахсыы суох, бары биир энергиябыт. Биһиги Сиргэ кэлэрбитигэр ханна, ким буолан төрүүрбүтүн бэйэбит талабыт. Киһи Сиргэ тоҕус халлаан 12 хаттыгаһын ааһаары кэлэр. Билигин биһиги баара-суоҕа 12 хаттыгастан саҥа 4-скэ тахса сатыы сылдьабыт. Атын цивилизациялар куттара сайдан-сайдан биһиэхэ Сир цивилизациятыгар кэлэн көмөлөһө сылдьаллар.

Бу Сиргэ төрүүр – оонньуу курдук. Дуальнай эйгэ буолан икки аҥы араҕыстыбыт – эр киһиэхэ уонна дьахтарга, сырдыкка-хараҥаҕа… Орто дойдуга хараҥа эмоцияттан сырдык эмоцияҕа тахсары билэ кэллибит. Барытын билиэхтээхпит. Барытын билэн баран ортотунан сылдьыахтаахпыт. Ол аата Орто дойдуга ортотун тутуһан олоруу диэн буолар.

Сир энергията чиҥ (плотнай), төһөнөн эмоция хараҥа да, соччонон кини ыйааһына ыарахан, санныгын баттыыр, сүһүөххэр түһэр. Оттон сырдык эмоция чараас, чэпчэки, көтүөххүн кынатыҥ эрэ суох курдук турукка киллэрэр. Киһи киһи курдук сананаргар хараҥаны – ыараханы да, сырдыгы – чэпчэкини да барытын билиэхтээх, оччого эрэ толору буолар. Хараҥаны билбэтэх – сырдыгы сыаналаабат. Төһөнөн хараҥаҕа түһэҕин, соччонон сырдыкка талаһыыҥ күүһүрэр. Оттон хараҥаны көрбөтөҕө, билбэтэҕэ буола, куота сатыы сырыттахха олох бэйэтэ хараҥаҕа умса анньыан сөп. “Атын эмоция эмиэ баар, ону билин, ылын”, – диэн үөрэх.

Хараҥа буолла да, куһаҕан диэн буолбатах. Кыыһырар – хараҥа эмоция, ол гынан баран кыыһырыы да араастаах. Кыыһыран хамсаныаҥ, саҥаны айыаҥ-тутуоҥ, тугу эрэ уларытыаххын баҕарыаҥ. Хамсаныы – сайдыы. Турар уу сытыйар.

Хартыына хаҥас өттүгэр – Хотугу сулус. Сахалар Хотугу сулуһу – халлаан хараҕата дииллэр. Туох барыта уларыйар, арай Хотугу сулус миэстэтиттэн халбаҥнаабат.

Миэхэ көрдөрбүттэринэн: Хотугу сулустан Сир полюһугар сардаҥа түһэн тутан турар. Хотугу сулус суох буоллаҕына, гравитация эмиэ суох буолан хаалар. Буор Кут тутула үрэллэр. Буор Кута суох киһи үөр буолар. Материальнай эппит-сииммит Сиргэ олорорбутугар, тирэнэрбитигэр көмөлөһөр.

Хотугу сулус – материальнай эйгэ символа.

Сир – хараҥа энергиялаах. Биһиги атын религиялар сабыдыалларынан “хара, хараҥа” диэни иһиттибит да “абааһы” диэн өйбүтүгэр киирэр. Ол оннук буолбатах. Сиргэ туох барыта чиҥ, намыһах энергиялаах – материальнай. Ол иһин биһиги эмиэ чиҥ эттээхпит-сииннээхпит.

ДЬАХТАР уонна ЭР КИҺИ

-Туох баар киһи – эн, мин, кини, бары икки атахтаах холбоһон биир бүтүн энергия буолабыт. Хас биирдии киһи – барыбытыттан, бары – биир киһиттэн тутулуктаахпыт.

Бу Орто дойду олоҕун оонньуутугар тоҕо биһиги дьахтар эбэтэр эр киһи буолан кэлэбитий? Үөһээ биһиги оннук арахсыбаппыт, биир энергиябыт эбээт. Тоҕо диэтэххэ Орто дойду – дуальнай оҥоһуулаах. Сиргэ саамай сүрүн арахсыы – эр киһи уонна дьахтар.

Киһи – ийэттэн уонна аҕаттан төрүүр. Дьахтартан уонна эр киһиттэн. Ол аата биһиэхэ – ийэбит да, аҕабыт да тэҥинэн баар. Эр киһи бэйэтин иһигэр дьахтардаах, дьахтар бэйэтин иһигэр – эр киһилээх.

Орто дойдуга киһи бэйэтин иһигэр баары билэ кэлэр. Ону хайдах билэбитий? Бу олоххо көрсөр киһибитин (партнербутун) нөҥүө. Оҕо улар сааһыттан саҕалаан тапталга талаһан барар. Уол кыыһы, кыыс уолу сэргиир. Ити бэйэни билиигэ талаһыы. Партнеруҥ – хаһан баҕарар эн бэйэн сиэркилэҥ. Эн хайдаххын да, кини эмиэ соннук. Эн тугу ылынарыҥ-ылымматыҥ киниэхэ көстөр.

Дьахтар анала.

Дьахтар – Сир оҕото, сирдээҕи киһи. Сир курдук төрүүр. Сир оту-маһы, үүнээйини төрүүр, дьахтар – оҕону.
Дьахтар Сири кытары биир ситимнээх, Сиртэн энергия ылар. Сир – Ийэ. Ол кини иччитэ дьахтарынан сирэйдэнэрэ да туоһулуур – Аан Алахчын Хотун. Сиргэ дьахтар олохтоох киһи, ол иһин сэрэйэн көрөр дьоҕурбут (интуициябыт) эр киһитээҕэр быдан сайдыылаах.

Дьахтар Сир кыыһа буоларын быһыытынан Сир курдук хараҥа энергиялаах, ол куһаҕан диэн буолбатах, плотнай энергияны “хараҥа” диэн ааттыыбыт. Сир – хара, от-мас хара буортан үүнэн тахсар, силиһэ хараҥаҕа сытар. Дьахтар хараҥаттан оҕотун сырдыкка төрүүр, таһаарар. Дьахтар Сиргэ чиҥник үктэнэн турар. Урут купол курдук уһун ырбаахы кэтэрбит, Сир энергиятын хомуйаары.

Намыһах вибрациялаах хараҥаттан тахсан баран үүнээйи сырдыкка, күҥҥэ талаһарын кэриэтэ дьахтар эмиэ сырдыкка, ол аата духуобунаска талаһар айылгылаах. Наар кэрэни кэрэхсиибит, тулабытын киэргэтэбит, бэйэбит эмиэ симэнэрбитин сөбүлүүбүт, кэрэҕэ талаһабыт, тардыһабыт.

Дьахтар эр киһитээҕэр эмоцията баай. Кини эмоцияны салайар Ыйтан олус тутулуктаахпыт. Күҥҥэ санаабыт хаста да уларыйыан сөп. Үөрэбит, кыыһырабыт, силбиэтэнэбит, сыллыыбыт…

Дьахтар эт-хаан өттүнэн эр киһитээҕэр номоҕон эрээри ис хаана туруктаах, тулуурдаах. Төрүүр ыарыытын тулуйабыт эбээт.

Сир биһиги дьиэбит буолан, кинини билэ-көрө, чинчийэ сатаабаппыт, ол иһин эт-хаан өттүнэн күүстээх буоларбыт ирдэммэт.

Эр киһи анала.

Эр киһи санныта кэтит, илиитэ-атаҕа улахан, дьахтартан модороон оҥоһуулаах. Эр киһи – Куйаар уобараһа. Сир – Ийэ эбит буоллаҕына, Халлаан – Аҕа. Бу хартыынаҕа эр киһини Күн курдук көмүс өҥүнэн оҥорбуппун. Биир ситимнээхтэрин көрдөрөөрү.

Куйаарга эмоция суох, биир кэм үрдүк вибрация. Эр киһи халлаантан быһа тутулуктаах буолан эмоцията аҕыйах. Мээнэ ытаабаттар, долгуйбаттар. Эр киһи эмоцияҕа дьахтартан үөрэнэр. Ол иһин наар сирэйбитин өҥөйөн көрөллөр дии: хомойдуҥ, үөрдүҥ, кыыһырдыҥ…

Биир соҕус турукка сылдьаллар, быдан муударайдар. Дьахтар ыһыллан, ытаан-соҥоон бардаҕына – уоскуталлар, көмүскүүллэр, харыстыыллар. Ол иһин хартыынаҕа дьахтар кэннигэр көмүскэл курдук турар.

Уобараһынан эттэххэ, эр киһи бу Сиргэ инопланетянин курдук кэлэр, Сири үөрэтэ-чинчийэ, билэ-көрө. Ол иһин кини этэ-сиинэ күүстээх, улахан. Барытын тутан-хабан көрөрүн сөбүлүүр, бултуур-алтыыр, булар-талар, муораларынан устар, куораттары тутар, сирдэри арыйар, сэриилэһэ барар… Киниэхэ бу cиргэ барыта интэриэһинэй, сонун.

Киһи-аймах олоҕор дьайбыт улахан арыйыылары эр дьон арыйар. Саамай талааннаах уустар, минньигэс астаах повардар, таҥас тигээччилэр, о д.а. эйгэҕэ бастыҥнар – эр дьон. Тоҕо диэтэххэ, кинилэр Куйаары кытары быһа ситимнээхтэр, информацияны быһа ылар оҥоһуулаахтар.

Кини наар бэйэ-бэйэтин кытары күрэстэһэн тахсар – күүһүнэн, өйүнэн, баайынан-дуолунан, сэриитинэн, дьахтарынан. Ким бу Сиргэ күүстээҕин дакаастаһар мөккүөрдээх. Оттон дьахтарга ол наадата суох, кини онто да суох билэр – Сиргэ кини быдан күүстээх энергиялаах.

Эр киһи Сиргэ эттэнэн-сииннэнэн, Буор Кутун буҕатыта кэлэр. Ол иһин уолаттар охсуһаллар дии, эттэрин-сииннэрин боруобалаан, ыарытыннаран үөрэтэн көрөллөр. Эр киһи Сири билиэн баҕарар. Саамай кыраһыабай ойох, саамай баай сир, саамай кэрэ куорат киниэхэ наада.

Ол гынан баран эр киһи Сири дьахтар нөҥүө эрэ билэр кыахтаах. Хас биирдии гений кэннигэр гениальнай дьахтар баар дииллэр буолбат дуо. Эр киһи Сир энергиятын дьахтартан эрэ ылар кыахтаах, быһалыы кыайан ылбат, кини Куйаар оҕото буоллаҕа, “настройката” атын. Оттон дьахтар Куйаары эр киһи эрэ нөҥүө өйдүөн сөп. Эр киһини билиммэт, сэниир, үрдүнэн көрө сылдьар дьахтар хаһан да Куйаар оҥоһуутун өйдүө, ылыныа, билиэ суоҕа.

ДЬҮКЭЭБИЛ УОННА КОД

– Дьүкээбил уота – үөһэттэн түһэр Куйаар информацията. Саха сирэ – Сир сүрэҕэ, картаны да көрдөххө сирбит-уоппут кыраныыссата сүрэххэ майгынныыр. Дьүкээбил уота биһиэхэ оруобуна оройбутунан түһэр. Мээнэҕэ да дьиҥ Итэҕэл, чуолаан бу биһиэхэ эрэ хаалыа дуо? Айылҕабыт Куйаар курдук эмискэ түһэр-тахсар температуралаах.

01 – двоичный код дьүкээбилгэ көстөр.

Дьиктитэ диэн О уонна I – сахалыы рунаҕа баар бэлиэлэр. Ааҕыллыыта – “Сиэр ыыт”. Куйаар сокуонун, ол аата сөбү, сиэри ыыт, тарҕат диэн.

0 уонна 1 математикаҕа сүрүн чыыһылалар. Ону сэргэ дьахтар уонна эр киһи ууһуур уоргаттара эмиэ бу сыыппараларга майгынныыр. Сир шара төгүрүк – О, кинини сир полюһа ортотунан I аҥаардыыр – хараҥа уонна сырдык. Онон бу двоичнай код суолтата барытыгар көстө сылдьар.

0101 – ДНК кода кытары ситимнэнэн барар. Киһи кода – 010101010101. Эн сиргэ сөп информацияны – 01 ылыныаххар диэри төрүү тураҕын. 01 кодка тиийдэххинэ, ол аата Сир тохсус халлаанын 12-с хаттаҕаһыгар тиийэҕин. Онтон Кутуҥ атын галактикаҕа салгыы уһуйулла барар.

***
–Куйаарга икки көстүү баар – хараҥа, тыбыс-тымныы уонна сырдык, куйаас. Саха сиригэр кыһыммыт – тоһуттар тымныы, сайыммыт – өнүрүк куйаас. Температура түһүүтэ-тахсыыта 100С кыраадыс араастаһар. Ол иһин чуолаан Саха сиригэр Куйаар Билиитэ – Саха итэҕэлэ харыстанан, чөл хааллаҕа.

Хартыына кэнники фонугар Киһилээх хайатын моһуоннара көстөр. Киһилээх олус күүстээх энергетикалаах сир. Былырыын Киһилээххэ айылҕалаах ыччат баран сиэр-туом оҥорон кэлбиппит. Элбэх дьиктини көрбүппүт.

Хаҥас өттүгэр – Урааҥхай саха таастара, өбүгэлэрбитин кытары ситим бэлиэтэ, кинилэр биһиэхэ информация биэрэ тураллар.

Уҥа өттүгэр кыыл тотемнарбыт быһыылара көстөр. Уопсайынан, Сиргэ тоҕо араас кыыллар баалларый? Кыыллар киһиэхэ ханнык эрэ майгыны, көрүҥү көрдөрөллөр. Холобур, ленивец баар дии. Маска ыйанан баран турар. Ол гыннар да кини мөдөөнүттэн өлөн хаалбат ээ. Кини бэйэтин тэтимэ бэйэтин айылҕатыгар сөп түбэһэр. Кыыллары көрөн киһи элбэҕи билиэн, элбэххэ үөрэниэн сөп.

Аллараа хаҥас өттүгэр саамай күүстээх мифическэй кыыл – дракон, оттон уҥа кыыллартан саамай күүстээхтэрэ – эһэ ойуулаабыппын. Бу дракон курдук күүстээх энергия Сир анныгар баар. Кинини киһи үһүс хараҕа аһылыннаҕына эрэ көрөр кыахтаах. Магманан, уотунан ыһыахтанар, айылҕа көстүүтүн – вулканы, уоту, ардаҕы, хаары салайар. Кинини кытары дьайсан айылҕа көстүүлэрин тохтотуохха, намыратыахха, уларытыахха сөп. Миэхэ оннук түгэннэр баар буола сылдьыбыттара.

Эһэ – сүдү күүс-уох, булгуруйбат санаа, уордаах кырдьык бэлиэтэ. Киһи бу икки кыыл (биирэ чараас эйгэ, биирэ – материальнай эйгэ) күүһүн аахсан, хайаларын да кытары биир тылы булан, сиэр быһыытынан ортону тутуһан бу Сиргэ олоруохтаах.

Аллараа уу сүүрүгүрэн кэлэн уоту кытары холбоһор. Уу уонна уот, бу икки айылҕа көстүүтүн дьайсыытын түмүгэр Сиргэ олох үөскээбит төрүөтэ. Уоттан өбүгэттэн ситим тардыытын – ДНК спиралинэн көрдөрбүппүн.

Дьахтар турар – удаҕан таҥастаах, дүҥүрдүү турар. Ол аата уһуктубут. Кини кэннигэр эр киһи турар, бухатыыр таҥастаах – Айыылартан айдарыылаах айыы хаан аймаҕын араҥаччыта. Кини эмиэ дүҥүрдээх эрээри үлэлээбэккэ турар, уһукта илик. Бастаан дьахтар уһуктуохтаах, ол кэннэ эр дьоммут уһуктуохтара.

Хартыына ортотунан уот уобараһа барар – Сир, Киһи, Куйаар уоттара. Халлаан уота – Күн, Сир уота – магма, киһи уота – сүрэҕэр. Киһи сүрэҕинэн олоруохтаах. Сүрэх хаһан да албыннаабат.

КЭҺИЛЛИИ

-Билигин Аан дойдуга хаос, буккуллуу бара турар. Матрица таһымыгар патриархат: барыта харчы, былаас эгрегорыгар бас бэринэн турар. Дьахтар энергията – аһынар, харыһыйар, эрэнэр санаа суох буолла. Оттон дьиэ кэргэн иһигэр мартриархат – дьахтар бэйэтин айылҕатынан олорбокко, эр киһи миэстэтин былдьаһан эр киһи сүрүн баттаата. Тэҥ суох буолла да ыһыллыы барар. Ол иһин сэриилэр, айдааннар, иирсээннэр тахса тураллар.

Бэйэтин иһигэр дьахтар энергиятын суох гыммыт эр дьон кэхтэр. Дьахтар бэйэтин билбэтэҕинэ хаһан да эр киһини билиэ, өйдүө суоҕа. Оттон эр киһини билбэтэҕинэ үөһээ тахсыбат, Куйаары билбэт, Куйаарга эрэммэт, итэҕэлэ, көмүскэлэ суох буолар. Тоҕо диэтэххинэ Куйаарга баар муҥура суох тапталы дьахтар эр киһи эрэ нөҥүө билэр кыахтаах.

Билигин буккуллан-тэккиллэн эр дьон эбэтэр кырыктаах, кытаанах буоллулар, эбэтэр букатын дьахтар курдук буоллулар. Дьахталлар бэйэлэрин аналларын умнан эр киһи курдук майгыланнылар, быһыыланнылар-таһааланнылар.

Дьахтар бэйэтин айылҕаттан миэстэтин, аналын буллаҕына эр киһи бэйэтин Куйаартан ыйаахтаммыт аналын булуоҕа, – диэн Светлана этэр.

(Салгыыта бэчээттэниэ)
***
Суруйда Туйаара НУТЧИНА,

Aartyk.Ru